شلة الفراشه الماسيه((اطفالنا اكبادنا 5))

ام نفل؟؟انا دورتي منتظمه بالحبوب حمدلله بس مشكلتها مدري وشلون اقولها يعني دورة اي كلام
شبه دورة؟؟ماتعودت عليها كذا:( بعدين مراميه توخذ شاي ولا ايش طبيعتها بالضبط؟؟ماعرفها

صباح الخير
شخباركم بنات وشخبار الكتاكيت؟؟

بسمة خجل..الله يرحمها ويغفرلها ويحسن مثواها الله يصبر عيالها واهلها

انجل مشكورة بجرب الكمون
انوار انا معك لا تستعجلي خلي غلا تكبر شوي اذا انتي تعبانه اهم شي سلامتج وراحتج انا زوجي كان يحن يبي بنت ويا حمادي بعدين يوم شاف شلون تعبانه يقول والله تعوري قلبي وحمادي للحين صغير بس بعد يقولها كمزحه

بالنسبة للدورة ما ادري انا اكره الدكاترة عندنا ما يسوون لج شي

بنات انا متحيرة في شي وقلت مالي الا انتوا

انا مشتركه في دورة الصبح الساعه 9 ولازم اودي حمادي لامي لان خالتي ماتقدر تخليه وياها والدورة قريبه من بيت اهلي الدورة بس االصبح يعني راح اطلع من البيت الساعه 8,30 زوجي مب راضي يقول برد على حمادي وما اقدر اخلي شغلي واجي اخذج اذا تبين روحي نامي بيت اهلج يوم اللي عندج الدورة يعني انام في الاسبوع 3 ليالي تحسون عادي او لا؟ انا مب مجبرة اني اشترك في الدورة بس حابتها .شرايكم انتوا؟؟عدله اخلي زوجي 3 ايام في الاسبوع خصوصا ان الدورة 6 اشهر؟؟؟

وسلامتكم واشوفكم على خير

ام غلا المرميه هي ورق مجفف مثل النعناع تنحط على الشاي تعطي نكهه اكيد تعرفينها المهم طريقتها تاخذين ملعقه صغيره وتحطينها مع كوب مويه وسكر حسب رغبتك وتغلينهم دقيقتين وبعدين اشربيه وبجد راح تشوفين النتيجه بس خليك منتظمه عليه كثير استخدموها والحمد الله جابت نتيجه معهم وانا من عشاق المرميه ما احب الشاي الافيها ...وان شاء الله تفيدك وتلقين فايده من وراي ...

اختي ليبينق اذا هذي الدوره راح تفيدك وانتي تشوفين ان الشهاده راح تفيدك مستقبلا وزوجك راضي كويس 3 ايام حلوه بالاسبوع مو كثير والله يوفقك ويسهل دربك يا عسل

السلام عليكم ورحمة الله وبركاته .

عدت لكم والعود أحمد

عدت لكم وكلي شوق ولهفة للقائكم .

عدت وعدت ولسان حالي يقول كيف طقت صبرا على فراق أحلى شلة .الله الله شاعرة من عربي فصحى لعاميه هذا الشوق لكم ومايسوي .

ترى أعذروني قريت أول صفحة من الملف بس وبحاول أذا فيه وقت أقراء بقية الصفحات وأنهي الواجب المطلوب مني علشان ماتفصلني أبله الفراشة .بس صح نسيت أني أعرفها شخصيا يعني وسطتي قوية وعيني قويه دامني اعرف المديرة شخصيا .

شوفوا أخباري كثيرة وأخبار منوة قلبي بعد صرت مجنونة فيها أموت عليها وأهذري فيها وودي أكلها أحيانا .

بس بابداء باخر أخباري الطازجة مرة ولدي بيوصل الليله من جدة ركب الطيارة قبل شوي .وأنا جالسة أتصفح ملفنا العزيز وأعديت له من الظهر بعض الطبخات والشغالة تكمل الباقي .بينما أنا أقراء الملف .وبنروح أن شاء الله كلنا نستقبله بالمطار بعد ساعة .وأنا متشوقة كثييييييييييييييرا أني أشوف منوة هل تعرف أخوها أو تستنكرة لأنها الحين بسم الله عليها صارت تستنكر اللي تشوفه أول مرررررررررررة .وباخبركم وش يصير .

ومنوة صارت تزحف بس لسى ماحبت رسمي يعني على رجولها ويديها وبسرعة تزحف فقط فهمتن قصدي .وتقول باي باي .وتنادي الشغالة .

مساء الخير ياحلوين
مشكورين كل اللي سألوا عني صدقني موقوفه ويا الشغل صارلي اسبوعين الصبح دوام ومن الساعة 2 الى 10 شغل في البيت وطبعا بعدها أنا مثل القتيله الى الساعة 6 الصبح ونبدأ المشوار من جديد
ادعولي توصلني البشكاره الجديدة
بس شفيهم عيالكم احس انهم عواجيز معنهم أكبر من بنتي لاكن لين الحين محد مشا والأسنان على الخفيف أنا بنتي نهاية الأسبوع القادم بتكمل 11 شهر ها شويه توقف وتبدا تخطي على الخفيف بس سابقه بالأسنان قولو ماشاء الله عندنا 8
سلامي للجميع بدون استثناء ولنا عوده