طريقه شتويه لتقديم التمر ساخن (العفيسة) ميوسه معكم والزمن طوييييييل ،،

اهلين صبايا

والله قاعده ساعه استخير وين احط هالموضوع في اي قسم احترت ومادري وين احطه لانه مثل الحلى بس ساخن :22:
عاد خليت الموضوع يرجع للمشرفه تشوف المكان المناسب وتنقله له الله لا يحرمنا منكم يامشرفات <<<<<<< كنتس ماتلمحين تبين التميز :hahaha:

نرجع لمحور الحديث ولو اني مابعد بديت فيه اصلاً
القصه ومافيها اننا في هالبرد ندور شي دافئ ناكل حتى ماتكون التدفئه خارجيه بس
واللي جاب الموضوع في بالي امس قريت وحده تقول مشروب شتوي وسويته وحسيت اني فعلا دافيه صدق من داخل

المقادير :

كيس صغير تمر منزوع النوى اي نوع ( انا سويت الخلاص )
نص اصبع زبده
كوب طحين بر
ملعقتين سمسم
نصف ملعقه فلفل اسود <<<<< القياس بملعقة الشاي
نص كوب لبن

الطريقه :

احمسي البر في قدر لما يكون احمر شوي يعني يكون غامق
اضيفي له الزبده السايحه وقلبيهم شوي ،،
اضيفي التمر والفلفل الاسود وقلبيه معهم لما يختلطون وبعدها صبي عليه اللبن وغطيه شوي
بعد كذا افتحي القدر وقلبي وقلبي واضيفي السمسم وقلبيهم سوا ،،

سكري النار وخليه يفتر شوي بعدها حطيه في صحن التقديم للتمر وقدميه مع القهوه العربيه :23:

##
باقي التمر خليه في الثلاجه وكل مابغيتي تحطين قهوه طلعي شوي وسخنيه وقدميه دافئ مع القهوه

وبالهناء والشفاء :26:

اللي تسويه رجاءً تكتب تجربتها هنا حتى الكل يستفيد
والله الله بالدعوات الطيبه :)

33 تعليق 16,691 مشاهدة

شاركي في النقاش

سجلي الدخول لإضافة تعليق.

التعليقات

33

تابعي تجارب أخرى من هذا القسم.