ألو.....ألو....ألو.........
مافيه أحد صاحي الكل شكله نايم يالله نوم العوافي إنشاء الله...
مع العلم إنكم ضيعتوا على أنفسكم أحلى كشته اليوم كنت مجهزه إني بمر على كل وحده فيكم ونطلع للبر وننصب الخيمه ونشب النار وكنت بسويلكم دلة قهوه مهيله تشمون ريحتها وهي باقي على الجمر وجايبه لكم معاها هذاك الصحن وش كبره تمر ومو أي تمر سكري من اللي تحبه قلوبكم...
بعدها بخليكم تقومون تمشون (أدري بتقولون مافيكم حيل بس بالغصب بتمشون خاصة اللي مقربه ولادتهم) ومافيه مانع تلعبون بالرمل وتستانسون وياويل وحده تقول تعبت..
ترجعون عندي الخيمه أكون مجهزه لكم هذيك الكبده السنعه مع شرايح البصل والفلفل الرومي اللي أتحدى وحده تقاوم ريحتها ومنظرها وتقول ماني مشتهيه أحس إني برجع..مع هذاك الخبز الزين وبراد الشاي بالنعناع...
بعدها أذا تبغون تريحون شوي وتاخذون قيلوله ماعندي مانع أهم شي الكل يصحى لصلاة الظهر عشان نصلي جماعه والإمام حقنا مراوي لأن الدور عليها...
بعد الصلاه أنا مجهزه لكم مسابقات إسلاميه وثقافيه وراح ننقسم لفريقين الحوامل اللي من الشهر السادس إلى التاسع في فريق والأقل من الشهر السادس في فريق ونشوف من يفوز..
كمان راح نلعب ألعاب كثير مجهزتها (من دون كلام ..أحكام.. الخطوه)وأي وحده ماتعرف اللعبه بنشرحلها أول طريقتها....
طبعاً نسيت أقول لكم على خبر مابيسعدكم أكيد وهو إن مجنونة قطر مابتلعب معانا لأنها الله يخليها لنا ويقومها بالسلامه راح تكون تجهز لنا هذاك الغدا اللي ما وراه طبعا راح تسويلنا برياني إنما أيه بس كعادتها راح تكون عند الغدا شويه وعندنا شويه وماراح نسلم من تعليقاتها...
بس بما إني المجهزه للكشته فراح أساعدها بالغدى وبسوي سلطة الفتوش اللي تحبونها..
والحين الغدا جاهز وأي شي تبغونه موجود (فلفل،شطه،ليمون،بصل) أهم شي تتغدون زين وبالعافيه إنشاء الله..
على مانخلص الغدا يكون العصر أذن نقوم كلنا نصلي سوا بعد الصلاه نقرأ سوره من القرآن ونحاول نفسرها أو ناخذ حديث ونطلع الدروس اللي فيه...
في هذي الأثناء تكون أنا وياكم تجهز لنا عصير الموز بالفيمتو تسلم يدينها ولا أكبر شيف في الدنيا يسوي مثلها...
في النهايه نقوم نشيل أغراضنا ونرتبها ونحطها في السياره (أكيد كلكم تبون تعرفون وش نوعها)بس مابقولكم شوفوا أوزانا وتوقعوا السياره اللي تناسبنا وتقدر تشيلنا كلنا...
خلا ص الجو بدا يظلم وللأسف الشي الوحيد اللي نسيته هو اللمبات وإلا كان كملنا الكشته لليوم الثاني لكن لا تزعلون خيرها في غيرها....
شفتوا كيف ضيعتوا على أنفسكم هذي الكشته اللي ماتحلمون فيها..
لكن على قولتهم النوم سلطان أكيد النوم جاكم وماقدرتوا تقاومونه خاصة وإنكم ماتصدقون في هالأيام يجيكم فمستحيل إذا جاكم تقولون لا مانبيك...
تصدقون يابنات بعد ماخلصت تمنيت فعلا إن الكلام اللي كتبته يصير لكن أنا عارفه إنه مستحيل عشان كذه الله يجمعنا في الجنه يارب ونشوف بعض ونقول الله تفتكرون أيام الديوانيه وسوالفها....
يارب يارب يارب ياحي ياقيوم ياذا العرش العظيم إجمعنا كلنا أعضا الديوانيه وكل من دخل الديوانيه سواء شارك أوماشارك في جنات النعيم على سرر متقابلين يارب العالمين..
نسيت أقولكم إن الكشته ممنوع فيها إصطحاب الأطفال بإستثناء توائم الديوانيه...
:: ديوانية التوائم :: 2006 - 2007
متابعة النقاش، صفحة 28