الى كل زوجة أولى تعالي معي

اللهم يا حي يا قيوم يا ذا الجلال والاكرام
اغفر لزوجة اولى ويسر امرها وفرج كربتها وسخر لها زوجها واجعله قرة عين لها
اللهم ارزقها الذرية الصالحة المباركة
اللهم اجب دعوتها واملأ قلبها بحبك
يا اكرم الاكرمين
يا رب العالمين

طيف المحبه ودمعه ورديه والنور والعوضيه وحده وهموم الله يسلمكم ان شاء الله
ويسخرلكم ازواجكم ويجعل السعاده ماتفارقكم بأذنه تعالى
والله ياخوات مدري وش اللي صايرلي بس اصيح وضايقه فيني الدنيا افكار توديني وتجيبني
مدري ليه حظي كذا انا ماني مرتاحه والله العظيم ماني مرتاحه
كرهت بيتي واحيانا مالي خلق حتى عيالي احس حياتي صعبه الليله اللي ينام فيها زوجي برا مانام اخاف لن بيته الثاني بعيد عني وولدي صغير والباقي كلهم بنات لو اسمع صوت بسه صرت اتنافض من الخوف وتخيل كل شي شين
احس ان زوجي واخته اللي خطبتله ماخافو الله فيني وقالو عيالها صغار ومالها احد قريب منها لا اهل ولااحد اعصابي تعبانه وماني مرتاحه حتى بوجوده لانها ساعات ويروح ويخليني وياليت بيوها يمر ويسأل نفسي اعيش زي كل اللي بعمري مع زوجي لحالي بدون شريك انا ماني كبيرة ودي يكون قريب دايم مني يحس فيني
تخيلو يبنات ان طلعت لي دمامل وحدة تحت الابط اليسار وبالثدي اليسار وانا منسدحة افكر تخيلو اني منسدحة على جنبي اليسار ولاحسيت بالوجع الا يوم صاحت بنتي وقمتلها وسويت لها حليب والله اني ماغيرت لها الا طالعه روحي من الوجع ولا افكر حتى اروح للدكتور بس جالسه للهم
صراحه هذي مي حياه مالها طعم يمر اليوم والاسبوع وانا مادريت انا افكر استغني عن حياتي معاه ياليته يعطيني عيالي ويخليني اروح لهلي واربيهم هناك على الأقل لحطيت راسي على المخدة ماخفت يدق الباب والا ينط علينا حرامي انام وانا مرتاحه
وانا جربت الحاله هذي قبل لا اروح اولد ويوم رحت اولد ارتحت اشبع نوم مو كل شوي نازه
واللحين راسي اربع وعشرين ساعه صداع من قل النوم
ادري كلامي مو مفهوم ولا مرتب بس مالي بعد الله غيركم افضفضلهم يمكن تخففون عني شوي لان والله العظيم اكتب وانا كلي اكتئاب
الله يختارلي مافيه الخير
أسفه على الأطاله

العزيزة ام سلطان انتبهي لصحتك ولعيالك زوجك ماحس فيك مثلك وماتدرين يمكن يرد لك بقدرة قادر
صدقوني بنات احسن شي في الدنيا انك تعتمدين على نفسك تدرون ليه احيانآ كثيرة تتألمين وتتعبين ماتلاقين ردة فعل من زوجك مثل ماكنت تتوقعين ماتلاقينه ياخذك في حضنه ويمسح دمعتك ويقولك سلامتك علشان كذا لازم نيأس منهم ارحم

السلام عليكم
كيف الحال
ان شا الله الجميع بخير
هلا فيك سارة وهلا بكل اخت تنظم لنا في هذا الملف
واخيرا رجعت لكم بعد فترة العلاج الي مضت على خير ولله الحمد
الخير يابنات في مااختاره الله لنا
حنا بشر مانعرف وين يكون الخير
والحكمة عند رب العالمين
رجعت لكم وانا نفسيتي عال العال والحمد لله
ماني محتاجة غير رضا رب العالمين عني
العملية يا صديقاتي فشلت
ولله مااعطا ولله مامنع وهذا فيه حكمه له سبحانه
لكني اقول اللهم اجرني في مصيبتي واخلف لي خيرا منها
اللهم اني رضيت بما كتبت لي
وعسا ان تكرهوا شيئا وهو خير لكم


حبيبتي ام سلطان
ليش هذا الحزن
الدنيا وانا اختك ماتسوا الواحد يسوي بنفسه كذا علشانها
ام سلطان
اسمعي كلامنا وخلي حبيبك وصديقك وونيسك هو الله
والله لازوج ولا ولد بيونسنا غير علاقتنا بربنا
ياام سلطان خذيني مثال لك
والله العظيم اني كنت اشيل قشي بالليلاذا خفت واروح عند زوجي في بيته
اقسم لك بالله هذا الي صار من شدة خوفي وخاصة لو جا برنامج يخوف وانا لحالي
ومرة ورا مرة طفشت وضايقت الناس
صرت اسكر بابي وافتح قناه المجد على القران واشغل نفسي حتى يجيني النوم
والحين تأقلمت على الوضع
حبيبتي لاتخسرين نفسك مثل ماخسرتي زوجك
راحتك وصحتك هي راس مالك
واحتسبي في هذولا الضعوف الي بين يدينك
لايشوفونك كل يوم وكل ليلة دمعتك على خدك
راعي نفسيات عيالك تراهم يحسون حتى لو ماتكلموا
اما زوجك بيرجع لك اذا شاف منك العقل والحكمة
لا تبينين تعلقك به وجريانك وراه وتحتجين بحاجة العيال او الخوف ترا الرجال يفهمون كل شي حتى لو كابرنا وتحججنا بحجج ثانيه
خليك عاقلة وفاهمة وصابرة
خلي هدفك وعلاقتك مع ربك قبل هذا الزوج
تقول لك هذا الكلام وحدة شاب راسها وبالاخير عرفت مصلحة نفسها
اقسم لك بالله وانا مااقول هذا الكلام غرور او مدح في نفسي
ياربي لك الحمد اولا واخيرا وهذا من فضل ربي
واقسم عليكم تذكرون الله بقول ماشا الله تبارك الله
زوجي رجع لي وصار مايرتاح الا عندي ومايناديني غير حبيبتي
بعد ماطار من يديني وطلقني وحصل بيننا من المشاكل ما الله به عليم
صار الحين مثل ماكان قبل زواجه واحسن
وهذا كله بفضل رب العالمين علي ثم لاني خلاص ماعلي منه ان جا وان راح
ان عدل وان ماعدل
انا تعبت من الكلام ومن العتاب وطنش
واثاري هذا هو الحل لجميع مشاكلي
تركته براحته يسوي مايبي سافر ورجع والله مافتحت فمي بكلمه
كلمها جاب لها شال حط مافتحت فمي
مشغوله بدنيتي عنه
فانتي ياام سلطان والكلام لجمع الاخوات وخاصة سارة ووحدة وهموم
خلوكم كذا طنش تعش تنتعش

اكيد صجيت روسكم وطلعت كل الكلام المخزن من اسبوعين لكن والله ماكتبت هذا الا محبة لكم وفي مصلحتكم
وربي يفرج هم الجميع