تكفون بنتي نفسيتها تعبانه من روضتها أبي روضه زينه في جده

السلام عليكم ورحمة الله وبركاته...
أخواتي الحبيبات في منتداي الغالي.. كيف الحال والأحوال..
يا ناس تكفون إلحقوني بنتي بتضيع مني؟؟؟ :( يمكن الموضوع يقلب على إستشارة نفسيه لبنتي وكان المفروض ينحط في منتدى ثاني بس حطيته هنا عشان ودي بروضه زينه لها.. بس لازم أشرح لكم وضعها قبل من باب الفضفضه ومن باب الإستشارة الله يسعدكم تحملوني ترا ما تدرون قد إيش صدري ضايق وهمي واصل السما..بنتي بسم الله عليها عمرها 4 سنين ونص ألحت على من أول السنة إنها تدخل المدرسة كانت دوبها مخلصه 4 سنوات بس أنا ما ودي أسجلها بدري لأني متفرغه وعندي قناعه إني ما أسجلها غير في عمر 5 سنوات، المهم حزنت عليها وسجلتها(ما سجلتها إلا بعد إلحاحها وتصميمها على الذهاب للروضه) وهناك أعرف وحده من قريباتي فيها.
الروضه صغيييييره وقريب من بيتنا تدرون وش يعني صغييييره مافي ساحه عندهم صاله فوق لكل شي لعب وأكل و فصولهم صغيره وما عندهم أركان ولا حلقات ومنهجهم خالي من الوحدات وعندهم بس نظام تحفيظ وتسميع وتعليم الحروف والأرقام وبنتي دوبها جديده حتى لو مو جديده الأطفال ما أحد يبدأ معهم بالكمية هذي كتابه وواجبات وتسميع..والمعلمه يقولون ممتاااااااااااااااااازه (ممتازه تحفيظ)..
ما شاء الله عليها بنتي أول ثلاث أسابيع والمعلمة تشكر فيها وماشاء الله إستيعابها وذكائها بسم الله عليها حتى مديرتهم كانت تقول إن شاء الله تمشي مع الفصل لأنها متأخره عنهم في المدرسة لكن بعد كذا تقول ما شاء الله على بنتك مدرستها تمدح فيها..
المهم بنتي بسم الله عليها حركه شوي في حدود الطبيعي والحمد لله المهم من ثاني أسبوع تقول عاقبتها؟؟ عندها على الجدار حاطه رسمة وجه حزين وتوقف تحته إللي يشاغبون في الفصل ؟؟
المهم تقول بنتي تشتت تفكيرها وتفكير الأطفال قامت وقفتها هناك يعني مزلبتها على الجدار بس بأسلوب مختلف :angry2: ؟؟ وسكت على هذي الحركه أحسب إنها صح. (سامحيني يا بنتي).
المهم بعدها بأسبوع ثاني ألاقي طاولة بنتي محطوطه لوحدها في نص الفصل وكل الأطفال وراها من يمينها البنات صف على ورا ومن يسارها الأولاد صف على ورا ؟؟؟ سألت ليش كذا قالتلي عشان تنتبهلي زين البنت ما شاء الله تشتت تفكيرها مع البنات؟؟ المهم أنا مدري وش فيني أحس إنه جاني خرس :42: مدري طرش كل ذا يصير وأنا ساكته أتأمل أقول يمكن لمصلحتها.. وما ودي أتخاصم معاهم عشان قريبتي ما تصير بيني وبينها مشاكل.
لين ما جا الجد وبدأت بنتي تبكي :icon33: بشكل مستمر طول اليوم من يوم ما تجي من مدرستها لليل فقدت حيويتها فقدت شهيتها للأكل فقدت مرحها وبدأت بنتي نفسيتها يوم ورا يوم في النازل بس ماسكه فيني وتبكي..المدرسه كلها مستغربه مو بس مدرستها المدرسات الثانين يقولون إحنا مصدومين من بنتك وش صار فيها؟؟
أجلس مع المعلمات والمديره نناقش وضعها ألاقي بنتي ما عندها أسباب مره تقول أحبك مره تقول أبغا أجلس معاكي أخرتها صارت تقول ماما ما أبغا أدرس ومن جد صار عندها إضراب ولا عاد تفتح كتب ولا تكتب مع معلماتها وصاحباتها ولا شي... ومعلمتها تقول من يوم ما أبدأ في حصة القرآن أو التسميع تبكي.. تجيني وحده من المعلمات تقولي بسم الله إقري على بنتك وحصنيها ليش كذا تبكي من القرآن (أنا ناقصتكي وتعليقاتك) والله يا ناس ماني مقصره عن بنتي في القرآن والتحصين الحمد لله ما كان فيها أي شي يدل إنها غير طبيعية.
أوديها الصبح على بكا :icon33: والله يكرمكم صارت تستفرغ فطورها والغدا كم لقمه بعدين تبدأ بنتي تغثي وخلاص تمسك بطنها وتبكي ما عاد بتكمل غداها؟؟
في البيت تحولت من طفلة مرحه لطفله جالسه على الكنبه تاكل أظافرها وكل ما أقولها حبيبتي وش فيكي جالسه قومي إلعبي مع أختك (3 سنوات) تبدأ تبكي وتقول ماما الله يخليك حصنيني أنا خايفه ماأبغا أدرس، يا عمري يا بنتي.. أحاول أسحب منها كلام أسألها عن صاحباتها أسألها تبغين فصل ثاني تبغين معلمه ثانيه ما ترد بعدين تقول لا؟؟
والطامة الكبرى مدرستها يوم ما لقو سبب محدد لمشكلتها قالولي خلاص كل هذا دلع ولفت نظر طنشيها وشدي عليها صارو ياخذونها مني الصبح بالبكا وبنتي تفترش الأرض تبكي وتصيح وأنا بكل بساطه أسمع كلامهم من باب إنهم يقولون عادي ياما شفنا زي كذا أطفال بس مع مرور الوقت يتغيرون..
المهم صار كل من يشوف بنتي يقول وش ذا ليش ناحفه أخواتي يطالعون وجهها يقولون لي والله هم المدرسه على وجه بنتك.. تخيلو ما شاء الله بنتي ما تعتبر بيبي إذا دخلت على ناس وعدد منهم جالسين يبغون يسلمون عليها حتى لو ناس تعرفهم من أول ألاقيها على طول تمسك فيني وتبدأ تبكي..
المهم بعدها بدأو في بروفات الحفله حقتهم تكون ساكته من يوم ما أدخلها المسرح وهي تبدأ تبكي وأروح البيت وهي هناك تبكي، يوم من الأيام طلعت من المسرح راحو يدورون عليها ما لقوها، حصلوها عند وحده من المعلمات معلمة تمهيدي ثاني وقاعده وساكته يقولون تعالي مع صاحباتك تبكي تقول لا المهم المدرسه الجديده تقول خلاص خلوها عندي كملت بنتي ذاك الأسبوع عندها والحمد لله تغيرت نفسيتها ما شاء الله 70% :) مع إنها عندها خوف إني أرجعها لفصلها الأول ماهي راضيه تصدقني وإتفقت مع مديرتها إنها تجلس مع الفصل الثاني مستمعه إنفجعت مني المديره تقول حرام عليكي تتعدين مرحلتها وهناك منهجهم أكبير منها قلت ما علي أهم شي ترتاح بنتي نفسياً والدراسه مو مهمه أصلاً بقية حياتها إن شاء الله بتتعلم لكن نفسيتها لو ما تعدلت ذحين وش يعدلها لي بعدين وما ادم إنها مستمعه خلي مدرستها تمشيها معاهم إذا عندهم كتابه أو أرقام تخليها تطلع كتبها هي وتكتب فيها.. بس حسيت إن المديره مو عاجبها كلامي وغصب عنها سمعت كلامي..
الحمد لله مدرستها في الفصل الجديد يوم قلت لها خلاص بتكمل عندك معليش قالت عادي خليها أهم شي تستقر نفسياً والباقي بعدين، تقول الحمد لله بنتك ماشيه معاي زين ما شاء الله وهاديه من غير بكا ولا نكد وألاحظها من أول تمسك فيني أول ما أوديها المدرسه ويفكونها مني بالغصب عشان أرجع البيت لكن ذحين ما شاء الله خلاص أكون واقفه وهي تروح لصاحباتها تكلمهم وتلعب معاهم بعدين أشاورلها من بعيد أقولها مع السلامه خلاص تقولي مع السلامه الحمد لله.. بس صاحباتها في الفصل يقولون عليها هذي مو معانا بس قاعده كذا حتى كتبها مو زينا وآخر شي تقول يا ماما ما خلوني أمسك المكرفون في المسرح كلهم مسكوه ويغنون فيه وأنا ما رضو لي.. ويوم من الأيام غابت مدرستها الجديده ودخلت عندهم وحده متدربه حليييييييييييله مره وماشيه معاها بنتي تقولي مره زين لكن آخر الدوام دقت على جوالي المديره تقولي بسرعه تعالي خذي بنتك قالبه المدرسه بكا وقاعده عندهم في الإداره مسكره عيونها بيدها وتبكي.. أنا خايفه إنه يصير لبنتي نكسه ثانيه لا سمح الله، وأحسها ماهي متطمنه على وضعها ونفسيتها باقي فيها شوائب من أول ومع الأوكل بعد باقي شهيتها مو تمام، مرات تجس نبضي تقولي ماما ما أبغا المدرسه بعدين ترجع تقول لا لا أمزح معاكي بروح المدرسه..
ما قدرت أكلم مدرستها الأولى في شي لأني ما عاد صرت أشوفها كثير تجي متأخره الصبح وتروح بدري آخر الدوام ويوم مره شافتني أخذتني على طول بالهرج تقول الحمد لله بنتك إستقرت ذحين شكلها ما تأقلمت مع صاحباتها والعيال طفشوها ويمكن أنا صوتي عالي في الفصل خلاها تنكمش مني؟؟ المهم أخذتني كذا بالهرج ولا قدرت أقولها شي مسكت نفسي عشان ما أتمشكل مع أحد ما أحب أخلي أحد يشيل في قلبه علي وما عاد همتني ما دام بنتي خلاص لقت المكان المريح لها..
أنا طولت عليكم بالكلام بس والله من حر ما أحس في قلبي وكثير منكم أمهات ويقدرون شعوري الله يسعدكم ويحرم أجسادكم عن النار أبغا منكم كلام يريح قلبي ويطمني على بنتي هل أطنشهم وأبدأ أسحبها شوي شوي قبل لا تنتكس أو أتركها على كيفها مره تروح ومره لا (أصلا هذي سياسة أبوها :arb: ذحين يقولها حبيبتي وقت ما تبغين تروحين قوليلي نوديكي إنت ذحين في إجازه عاد هي تبتسم تفكر بعدين تقول لا بكره ما أبغا أروح وأبوها يقولي إحنا دافعين فلوس في مدرستها عشان تستانس وألا عشان تجيني بنتي بعقد نفسيه؟؟)..
وثاني شي :26: ودي في مدرسه تقريباً تكون قريبه من حي الشرفية أنا أعرف مدرسه حديقة الأطفال وأعرف مستواهم رائع وسبق وإشتغلت في الإداره حقة المدرسة وأعرف إنهم ممتازين بس أنا لي قريبه في الروضه وهذا هو إللي مخليني متردده، أخاف يصير الوضع زي كذا وأخجل منها..
وبعد سمعت بروضة دار الموده كثيير مدحوها وكمان الروضه الرابعه روضه حكوميه بس مدري عنها.. المهم يا أخواتي ساعدوني في إختيار مدرسه مناسبه لبينتي ولكم فاااااااااااائق شكري وتقديري..
أختكم **أفيا** سامحوني..
الله يفرج همكم ساعدوني لا تطنشوني لو بكلمه تطيبون فيها خاطري..

10 تعليق 2,180 مشاهدة

شاركي في النقاش

سجلي الدخول لإضافة تعليق.

التعليقات

9
  1. انا بنتى في دار الحافظين اللى بحى الروضه مدخلتها توسع صدرها المدرسه قسطها 1600 في السنه ومبناه شين لكن عشان تحفيظ ربى مبارك لهم بنتىىىىىىىىىىىىى مبسوطه فيها بيفتحون صيفى دخليها على شرط 3 ايام وشوفى صدقينى بتنبسط ى ولا بعد مسوين حفله تخرج رقمهم .2630885
  2. والله ما قدرت ادخل من غير ما ارد. البنت عمرها 4 سنوات ؟ مررررة صغيرة . حبيبتي اختي لمن دخلت بناتها الروضة قالت لهم بناتي ما ابغاهم يدرسوا يعني لا تعقدوهم ابغاهم يجوا الروضة علشان يلعبوا مع البنات بسس. وعلى كذه مافي احد يقدر يجبر بناتها على الدراسة لانهم صغار وملحقين على الشقى في المدرسة
    اياً كانت الروضة يلي تودوها فيها اشترطي عليهم انهم ما يجبروها على الدراسة وبنتك ياعيوني لمن تقول ما ابغى اروح فلا توديها واليوم يلي تبغى تروح فيه تروح . الله يوفقك انت وبنتك ويرجع لها بهجتها
  3. @afyaaa_3

    صاحبة الموضوع
    السلام عليكم ورحمة الله..
    الله يجزاكي الجنة يا مدام دسبرادو بس أحس إني خلاص ما ودي أدخلها تحفيظ مره ثانيه لين تدخل المدرسه ودي السنة الجايه أدخلها مدرسه تستانس فيها..
    أختي ريال الفسحة << إسمك يهبل يذكرني بأول..
    الله يسعدك يارب ويحققلك ما تمنين الحمد لله على ما قضا وما كتب وهذي السياسة المتبعة الأسبوع هذا وقت ما تبغا تروح تروح بس على كذا مدرستها والمديره يخوفوني يقولون لو هذي طريقتك بتتعود كذا بنتك على طول.. والله ماعاد أدري المهم جزاكم الله خير..
    حبيباتي الحوائيات وينكم أبغا أسماء روضات الله يسعدكم ويحقق لكم مناكم..
  4. دخليها في مدرسة الابتكار

    في حي الخالدية

    مدرسة رااااائعة ومعلمة الروضة راااااااائعة

    روحي وشوفيها بنفسك

    الرقم ما اعرفه

    بس خلف سوق الخالدية
  5. @msrkaa_hanm

    شوفي انا مقدره وضعك وفعلا اسوء شي على الطفل مدرس غير مقدر لحالته ولعمره !!

    بنتي صار معها نفس الشي معلمه ماعندها الا العقاب !! والصوت والتهزيء حتى الضرب تضرب !! تخيلي وفي نفس عمر بنتك يوم ادخلها

    وولدي في الابتدائي اللحين ومدرسه الله بالخير !! نفسيته زفت وبس يدور الاعذار علشان يغيب !!!!!!!!! وابوه يقول احسن خليهخ يصير رجال رافض تغيير المدرسه :( ياناس عمره 6 سنوات اي رجااااااااال !!

    اسال الله العظيم انه يصلح لك بنتك ويحفظها ويخليها لك

تابعي تجارب أخرى من هذا القسم.