حبيت اشارككم طريقة في الاستحمام اعطت بشرتي مع الاستمرار بريق ولمعة ونضارة
الحمدلله والفضل لله أولا وأخيرا والتوفيق منه سبحانه اوصلني لمرحلة انا راضية فيها كل الرضا عن بشرتي
اول شي سويته اني رتبت نفسي وطريقة استحمامي وركزت على مستحضرات معينة وماغيرتها خوفا من اني
ارهق بشرتي ..
ماراح اطول عليكم ..بس في كلمة مهمة ابغى اقولها ...(مهما استخدمتِ من مستحضرات غالية وباهظة الثمن ماراح تفيدك ابداً اذا ماكانت طريقة تغذيتك سليمة ..وبشرتك عمرها ماراح تكون نضرة اذا ماكنت حريصة على شرب الكثير من الماء.وأخذ القدر الكافي من النوم)
خلي هذا الشي دايم في بالك وراح توصلي للشي اللي تبغيه بإذن الله.
أولا..** طريقة استحمامي اليومي**طبعا لابد من الاستحمام يوميا مع الجو اللي احنا عايشين فيه ..انا بتكلم من واقع اني جالسة فالبيت وما اطلع بالنهار اتصور استحمام لمرة وحدة جدا كافي ..ودايم احب اخليه قبل النوم .وما يأخذ مني عشرة دقايق..
وهذه اغراض الاستحمام اليومي ..ومالقيت ارق وانعم منها فأي ماركة راح تلاحظون طبعا الاسفنجة ..صحيح هي تستخدم للبيبي بس انا احب استخدمها لنفسي لانها مرة ناعمة وماتسبب خدش للبشرة.ومرطب فازلين قمة في الروعة ريحة ونعومة ..
ثانياً ..**طريقة استحمامي الاسبوعي** اخصص دايم يوم الجمعة للإستحمام طبعا عشان اعود جسمي على روتين معين لاني في هذا الحمام اعمل تقشير وترطيب عميق.
هذه صورة الأدوات اللي بستخدمها في الحمام
اول شي اعمله اغسل شعري بشامبو لانكوم مرة وحدة في الاسبوع.. استخدمه وبعدها اضع ماسك مرطب برضو من لانكوم..يستغرق مني تقريبا 4 دقائق
وبعدين ابدأ في غسل جسمي بموية حارة شويه عشان اساعد على تطرية الجلد وفتح المسام وأبدأ بوضع المقشر على جميع اجزاء جسمي
وابد افرك بنعومة وبدون ما اخدش بشرتي وبدون ما افرك بعنف مجرد توزيع المقشر بأطراف اصابعي واركز على الأماكن المهمة..واترك المقشر يعمل بمهمته وأستغل وقتي بوضع المقشر على اقدامي
وبعد ما اخلص اترك المقشر عشرة دقايق على جسمي وبعدها افتح الموية الحارة وبهدوء ومن دون عنف ابدا افرك جسمي واغسله من المقشر بالموية بس
وبعد ما اخلص وانظف جسمي من المقشروبكذا اكون هيئت بشرتي للماسك المغذي والمرطب...
وجسمي بيكون رطب اضع الماسك الرهيب اللي عن جد بعد استخدامي له حسيت بالفرق..بشرتي والحمدلله بتكون ناعمة ونضرة زي بشرة البيبي بالضبط..وطبعا ماحصلت على النتيجة من يوم ويومين استمريت عليه شهرين ولقيت النتيجة اللي ترضيني نعومة ولمعان وبريق
والماسك يتكون من مواد طبيعية وهي بالضبط
عسل = 300 جرام
زيت جنين القمح= قارورة 60 مل
5 ملاعق كبيرة حليب بودرة
تخلطيها في برطمان وتحفظيها في حرارة الغرفة وتآخذي منها قدر مايكفيك لجسمك وتخلطيها مع عصير ليمونه وحدة او برتقالة وانا افضل البرتقال
وهذه الوصفة راح تكسب جسمك لون موحد وتفتحها مع الوقت وراح تخليها ناعمة مرة
ادهن الماسك بعد ما اخلطه بالعصير الطازج على كل جسمي وحتى اقدامي وما انسى اعمل مساج عشان تتشرب بشرتي الماسك وتستفيد من مكوناته واتركه لمدة 20 دقيقة .
وبعدها اغسل جسمي بدون جل او صابون بس بالموية الفاترة حتى تزول الخلطة تماما وانهي الحمام بمويا باردة جدا للتأكد من غلق المسام ..وأغسل شعري كمان من الماسك.
وقبل ما البس الروب اجيب المرش فيه طبعا موية ورد ارش على كل جسمي ومعروف طبعا فايدة موية الورد للبشرة.
وبعد ما انشف جسمي تماما من الموية ارطب بشرتي بزبدة الكاكاو من بودي شوب...رغم اني ما احب احساس الزيت على جسمي بس حقيقي النتيجة لما اصحى من النوم ترضيني وبعدين هيا مرة فالأسبوع ..
** طريقتي للحمام المغربي ماتتمز عن الطرق اللي تطرح فالمنتدى بس انا احب اخلط الصابون المغربي بورد مجفف مطحون وأهار البابونج واتركه لمدة 15 دقيقة واستخدمه مرة وحدة فالشهر
واستخدم معه لشعري شمع معالج بالصبار من بيوتي فورميلا وهو حقيقي ممتاز
واذا كنت معزومة او طالعة عند صديقاتي طبعا اخلي قروب بيبي جونسن على جنب واستخدم مجموعة الروز من لوكسيتان
واتمنى حقيقي اني قدمت لكم شي تقدرو تستفيدو منه زي ما انا استفدت منكم أشياء كثيرة
وأي سؤال انا حاضرة ..وخلي فبالك دايم التغذية الجيدة+الإستمرار راح يضمن لك بشرة حلوة ومتألقة
ولاتنسى أختي الغالية اذا قرأتي موضوعي واستفدتي منه او لأ..انك تدعي دعوة حلوة في ظهر الغيب لأغلى ناسي (ابويا) بالرحمة والمغفرة ويجمعني فيه في جنات النعيم
[/B]