الله يعلم انها مب شكوى بس مجرد فضفضه !!

بنات حاسه انه خاطري مكسور

والله اني ما قاعده اشتكي لاني لكن ابي افضض اهلي مب يمي وما احب اخبرهم بسوالف مثل هذي عشان ما يتضايقون

الي يعرفني من قبل انا لي سنتين متزوجه و الله ما كتبلي الذريه لين الحين ( الحمد الله راضيه بقسمه الله والحمد الله عايشه مع الموضوع بنفس رضيه)

الي صار انه سلفتي الي متزوجه بعدي بسنه حامل ماشاء الله تبارك الله

انا وسلفتي ماشاء الله مثل الخوات قريبات من بعض حيل لانه نحن الثنتين غريبات بهالديره

وهي اول ما حملت خبرتني قبل اهل زوجي

و الله يعلم اشكثر فرحت لها

طبعا ام زوجي لما عرفت انها حامل قالتلها اصحي انج تخبرين سلفتج ولو شو يصير لين ما تصيرين بالخامس

سلفتي قالتلي دخيلج سوي حالج مب عارفه عشان الخاله زعلانه قلت و لايهمج

المهم الحمد الله دخلت الخامس و رضت عني الخاله وقالت علميها الحين

السالفه مش هنا ( انا طنشت هذا الموضوع)

الي صار انه سلفتي تدرس بالكليه و اليوم ما كان في حد ياخذها للمراجعه
اتصلت علي وانا راجعه من الدوام مرات عليها و رحنا ( والله يشهد اني مستانسه لها حيل)

وهي تدري بهذا الشي رحنا مع بعض و سوت الفحوصات و خبرتني عن النتايج

لما وصلتها البيت ( هي ساكنه مع اهل زوجي) نزلت اسلم على الخاله لما شافتني اني معاها و اني انا موديتها المستشفى بغت تموت ووجها تغير
كاني بوديها اذبحها

والله تحسون انها شاله هم و على طوول ركضت على سلفتي تقولها انت حاسه بشي فيج شي

تصدقون بنات و الله جتني الصيحه و دعيت ربي انه ما يصير شي في سلفتي عشان ما تقول بعد من عيني

تعرفون تفكير بعض العجايز

خالتي تراها طيبه بس ما ادري ليش هالحركات

و الله حزت بخاطري حيييييييل بس بعد عادي طنشت و ما بينت

بس من رجعت البيت و انا فيني اكتئاب كل ما افتح تلفزيون او جريده او ايمل او امر بشارع

الي اشوف شي يذكرني بالحمل و الولاده

ما خبرت زوجي مالازم يعرف

وبس هذي السالفه كنت حاسه انها كاتمه في نفسي و حبيت افضفض

وجزاكم الله اذا كنتوا بتسمعوني و تدعولي انه الله يسخر اموري وامور المسلمات المحرومات