اعصابي ومرت حماي

مساء الخير والاحساس والطيبة. عندي مشكلة من 5 سنوات.انا وزوجي تزوجنا مع حماي في نفس الليلة وهنا بدات الحكاية.زوجي اكبر من زوجها. اهيا حملت بسرعة وانا بعدها ب4شهور والله ياخواتي اني كرهت نفسي لان حمولتي يسالوني ليش ما حملتي لدرجه اني حسيت اني عقيم؟ودحت سويت تحاليل والحمدلله حملت بعدها. سافرت مع زوجها لشهر العسل وانا ما سفرني زوجي انا احب السفر وزوجي لا واهيا ولا عمرها سافرت الا يوم تزوجت.الله خبر فام زوجها-حماي-يسفرها كل صيف ديره جديده وانا لا.الكل يسالني ليش اهيا سافرت وانتي لا وكنت احتر واتهاوش مع زوجي. ولدت وسوت هولليله على ولدها والحمدلله انا بعد رزقني الله بولد.انا عندي 2 واهيا بعد.حياتي ارتبطت مع حياتها الناس قاموا يقارنون بيننا واهيا للاسف رشيقة وجميله بدون مكياج وانا متينه واحط دايم مكياج.حتى حمولتي دايم يقارنون عيالي مع عيالها ليش ولدج ما مشا ولدها مشى ليش ولدج ظعيف وولدها متين ليش ولدج يلبس حفاظة وولدها لا. صرت اكرهها لان حمولتي يقارنون بيننا واحنا نعيش في بيت واحد مع خالتي.واهيا قام تقط نقزات: هزولي السمينات مساكين وتتكلم عن الرجيم وانا قاعدة.والله ياخواتي اني كرهت نفسي وزوجي وحياتي.حتا اذاطلعت اهيا مع خالتي يوصللي حجي من الناس اني ليش ما اطلع مع خالتي. انا مابي اعيش حياتي جذيه من تسووي هالمراه شي قالو حمولتي ليش مو انتي. ترا في حريم حما غيرنا بس انا المقرودة.كرهت عيالها وزوجها اللي يدللها وحتا الحلم قمت احلم اني زانطتها. شنو اسووي؟؟؟؟

25 تعليق 3,095 مشاهدة

شاركي في النقاش

سجلي الدخول لإضافة تعليق.

التعليقات

23
  1. @sfr_sbaah

    اسفهيها وماعليك منها بس انتي من بكررررررررررره سوي رجيم وخذي اشياء تفتح بشرتك وتصفيها وشجعي نفسك بنفسك وماراح تخسرين شي وخليك واثقه من نفسك
  2. @htyf_alroh

    الله يعينك ولا تكبرين الموضوع إذا ماغلطت عليك بشي خلاص صفي نيتك لله ولا عليك من كلام الناس لانهم ماراح يسكتون وعيشي حياتك للربك ثم لنفسك وزوجك وعيالك ولا عليك من احد الله يوفقك لكل خير
  3. @allom

    هي على حد كلامك مالها ذنب والمشكلها موفيها

    المشكله في المقارنات اللي بتحصل

    انتي ماعليكي من كلام الناس رضا الناس غاية لا تدرك

    والمقارانات هذي تصير في كل بيت بس انتي طنشي وماعليكي من احد
  4. @dnya_aatshanh

    شوفي اختى انا نفس حالتك بس انا تزوجت قبلها بخمس سنوات ... مع العلم انها بنفس سني بالتماام بس انا تزوجت صغيره وهي تزوجت كبيره
    .... تخيلي خمس سنوات عايشه مع اهل زوجي على الحلوة والمره ... ولمن تزوجت وجاات عندنا ..... بدات المقااارنه بيني وبينها .... نسواا الماضي وصاروا يشوفوني كاني جديده ,, نسوا العشره طواال خمس سنوات ... فضلوها على كثير .. المدح لها بس .. والذم لي .. هي دايما صح .. وانا دايما غلط .. هي الطيبه المره السنعه ... وانا حسبي الله عليهم بس ...
    هي سعيده ومبسوطه مع زوجها وطيبه مع عمتها ... وانا العكس .... هي الطباخه ... وانا العكس ... العزايم والسمرات لها لوحدها ... وانا مايكلفون يرفعون علي سماعة التليفون او يدقون على بابي بالغلط ..... واطفالها اغلىىى عندهم من اطفالي .... وهم اللي حياتهم مثاليه ... وانا اللي حياتي زفت ...... مع العلم اني والحمد لله احب زوجي ويحبني ولا بينا مشااكل ,, وكنت خلااال الخمس سنواات مافيه اطيب مني لهم
    لاااكن لمن جااات وشفت الفرق في المعامله (((( قاطعتهم لان كرامتي ماتسمح يدوسون عليها اكثر من كذاا )))
  5. احس ان مقارنة الناس خلتك تغارين منها

    اهم شيء زوجك يا قلبي وش عليك من الناس يصطفلون

    لا تخربين بيتك بيدك ولا تخلقين عداوات انتي في غنى عنها كل شيء ارزاق تقسم من عند رب العالمين ما تدرين عن داخلها يمكن انها تحسن صلتها بربها فحبب الناس فيها ورفع قدرها ترى ما يعلم بالدواخل غير الله مع تمنياتي لك براحة البال
    اختك الفردوس المفقود

تابعي تجارب أخرى من هذا القسم.