شاركي في النقاش

سجلي الدخول لإضافة تعليق.

التعليقات

26
  1. سكنت في جيزان أكثر من 3 سنوات ..

    وتمنيت إني ما أرجع للرياض أبداً ..


    صحيح إني في البداية ما تأقلمت وكانت الدنيا ضااااااااايقة علي ..


    بس هالشعور طبيعي يكون لأي وحدة انتقلت عن ديرتها وأهلها ..


    وبعد كذا تأقلمت وارتحت راحة عجيبة ..


    والله أهل جيزان مافيه أطيب منهم ..


    صحيح عاداتهم تختلف عن عاداتنا ..


    لكن والله إنهم طيبين وبسيطين لأبعد الحدود ..


    صحيح إن جيزان مافيها التطور والنظافة إللي في الرياض ..


    لكن بعد ما تستقرين فيها بتعرفين الأماكن الحلوة والنظيفة ..


    أما بالنسبة للجو .. هالأيام يكون عندهم موسم غبرة ورطوبة ..


    لكنها ما تستمر ..


    تقريباً شهر أو أكثر شوي ..


    وفي الأوقات الثانية الجو يصير حلو وخاصة وقت الشتاء يصير الجو رائع ..


    وفيها طبيعة خيال .. لكن لازم تسألون شخص عارف المنطقة عشان يدلكم على الأماكن الحلوة ..


    تدرين إني أوّل ما رحت وأنا متضايقة مرة وأصيح .. قالت لي جدتي -الله يرحمها- : أبذكّرك إذا رجعتي للرياض وأنتي تصيحين على جيزان !!


    قلت لها : مستحيييييييييييييييل ..


    والله إنه صار ..


    لي الآن أكثر من 6 سنوات راجعة للرياض وما زال قلبي متعلق في جيزان ..


    يمكن تظنين إن طبيعتي كذا .. يعني أتأقلم مع الأوضاع بسرعة ..


    لا والله .. ما فيه أدلع مني .. ولا أصعب من تأقلمي مع أي تغيّر في حياتي ..


    لكن هذا إللي صار مع جيزان ..


    بصراحة .. جلست أكتب وأكتب بدون ترتيب .. وما أدري بتستفيدين من كلامي وإلا لا ..


    بس حسيت إني لازم أكتب ..


    فيه أشياء كثيرة عندي عن جيزان ..


    حددي وش تبين تعرفين وأنا أقول لك ..


    سلّميلي عليها (جيزان)
  2. الله يسهل عليك في اقامتك وان شاء الله تتأقلمين وتتكيفين..

    مع اني مااعتبرها غربه لان الواحد في بلده ..ومع توفر النت والجوال كأن الواحد بين اهله ...

    واهل جيزان مافي اطيب منهم.. ان جيتي للبساطة والطيبه ولا النخوة ..ونعم والله..

    صح بتفتقدين الترفيه والمجمعات الكبيرة لكن بتتيسر ان شاء الله..

    ولي رد بعد أذن صاحبة الموضوع على مسألة رد العضو الرجل هنا

    يااخواتي اذا الموقع يسمح له وموافق على نكه ثناء التسجيل .. ايش المشكلة ؟؟

    يعني هل لان مافيه رجال يردون على مواضيع البنات ان المنتدى كل رواده نساء ؟؟؟ طبعا لا .. اعرف رجال كثير يتصفحون حواء ويستشهدون بكلام الاخوات فيه ويثنون عليهم من خلال كتابتهم في منتديات ثانيه..

    مسألة انه يجوز ولا مايجوز .. يااختي من باب اولى رسولنا قدوة لنا وبايع الصحابيات وسمع اصواتهم ..يعني تحدث معهم ..

    وانت تردين على سماعة الهاتف... وتقضين حاجتك في السوق وصوتك ليس بعورة ..
    فواضح ان الرد وتبادل الكلام بين الرجل والمرأة ليس بحرام ..بالذات اذا كان الكلام محترم ولائق وأأمنت الفتنه ..وهنا مكان عام والحمدلله..والاخ رد بكل احترام وذوق ..

    لا كلمها مسنجر ولا رسالة خاصة ..

    فلا تحجرون ودين الله واسع ..

    والستر والعفاف مطلب كل بنت شريفه .. بس لاتخلطون بين الامور ..

    والله يهدينا ويهدي بناتنا وشبابنا ويستر عليهم ...

    واسفه على الاطالة بس حبيت اوضح رايي..
  3. @akht_thbkm

    صاحبة الموضوع
    اختي طالبة الجنان وفقك الله ورعاك ريحتيني بكلامك واكيد اني استفدت وان شاء الله اي شي ابي اعرفه ابي اسألك والي يهمني حاليا الفنادق والشقق المفروشه النظيفه الى ان نستاجر ونستقر
    اختي وحده مزنوقه الله لايزنقك في شي ويجزاك خير وبالنسبه لموضوع رد العضو انا بصراحه ماتعودت مع اني اعرف ان هناك رجال لكن والله اول مره من سجلت في المنتدى تحصل معي وقديكون هناك رجال تحت مسمى نسائي ولانعلم الله اعلم ولم اقل ان العضو رده غير مؤدب ولكني احبذ ان لايكون هناك رد من الرجال
    وعموما جزاكم الله الف خير
  4. @ahlam_dayaa_1

    يالله حسستوني انا عايشين في مكان مرعب

    سبحان الله جيزان شكلها مسوية عقدة للناس

    ترى فيها ناس مثلكم مثلهم مافيهم شي ناقص ولا معتوهين

    ويحبون الناس مو متوحشين يعني مستأنسين ويتكلمون عربي !!!

    والي يقول غبار وحر ورطوبة ليه باقي مدن السعودية جوها اروبي الايام هذه ؟

    احنا الغبار هذه موسمها شهر وبعدين يصير الجو امطار ولا اروع منه

    وعلى فكرة مو بس جيزان الي ينقلون لها نقل تأديبي حتى باقي مدن المملكة ينقلون لها وش رايك اعرف عسكري نقلوه جدة نقل تأديبي ..

    بس للمعلومية الفرق ان الي يروحون لجيزان يطلعون منها يبكون مايبغون يتركونها

    اختي صاحبة الموضوع ياهلا فيك ومرحبا تنورينا ان شاءالله
    ترى جيزان مدينة مثلها مثل اي مدينة ثانية فيها كل شي متوفر ولا يغرك المعلومات السئية الي بعض الناس يروجونها عن المنطقة بمجرد انهم شافو مجهولين ومتخلفين من جنسيات ثانية متنسبين للمنطقة وهي منهم براء وساهمو في تشويه صورتها ..

    اتمنى لك اقامة سعيدة واي شي تحتاجينه انا في خدمتك

    اختك
    احلام ضائعة
  5. @lana_t

    هههههههه

    بنات لاتزعلون منها مصدومه من الكلام اللي تسمعه

    اعرف وحده نقل زوجها شروره يعني تقريبا على حدود اليمن بالظبط وانصدمت نفسك بالظبط
    وبعد فتره انبسطت اخر انبساط

    تعرفت على ناس من قبيلتها وتأقلمت
    والله ماكان ودها ترجع بعد 7سنين

    هي تعقدت من السوق بس صارت اذا راحو الرياض بالإجازات تقش حق السنه كلها لها ولعيالها

    رحله سعيده

تابعي تجارب أخرى من هذا القسم.