استشاره واتمنى المساعده

السلام عليكم

خواتي انا متزوجه من 22 سنه ، بليت بزوج عصبي جدا ومزاجي لابعد حد وجبان بحيث لو صارت له مشاكل برا البيت وماقدر ياخذ حقه جا البيت وحط حرته فيه وضربني وعذبني باشكال وانواع العذاب ، وبعد ماينتهي من تفريغ عقده النفسيه يجي يبكي ويعتذر ، زعلت كثير ورحت لاهلي وتدخلو للصلح ويعتذر منهم ويوعدهم بانه بيعاملني زين ويرجع مره ثانيه ...
يمنعني اروح الحمام ويشوفني اتعذب ويقول وانتم بكرامه اعمليها تحتك ... ويمنعني اصلي وما ارد عليه اصلي قدامه بلا وضوء ولا حجاب اكبر واصلي وانا جالسه وهو يهذر ولا اعيره اهتمام وبس اخلص يضربني ليه صليتي وانا اتكلم معك .. طبعا ماصليت الا بعد ما شفته يمسكني تحقيقات وتفوتني بالصلوات ورى بعض مو صلاة وحده .. واصيح اقول له بصلي ولا كأنه يسمعني ..
يتلكك في الاكل وكل شي بحيث انه يخليني طول اليوم اشتغل واطبخ من فطور لغدا لعشا وكرف بالبيت ولايعجبه شي ... جبت ستة عيال وطالهم ماطالني من التعذيب ، يحبسنا بغرفه بدون اكل او حمام نص يوم ويغيبهم عن المدارس ويمنعهم يذاكرون ونزلت مستوياتهم للحضيض بسبب هلمعامله ويشوفون امهم تنضرب قدامهم ومايقدرون يسوون شي .. اثار الضرب بجسمي مثل اثار الضرب بالسياط قسم بالله .. ان ماكانت اشد وربي ، ويهدد بقتل العيال وقتلي وبعدها قتل نفسه ..مو صاحي بقوه
مانعنا من الخروج مانعرف جيران ولا احد يزورنا ، طرد اهلي ومنعهم من زيارتنا ومنعنا نروح لهم لمدة سنه ...
لسانه طويل يسب ويشتم .. عاق بوالديه حاولت اصلحهم كثير يصلحو وقت ويرجعو من جديد ...
واخيرا وليس اخرا .. وفجأه دخل عليّ انسان اشر من شارون وقال اطلعي برا بيتي انا خطبت وبتزوج وبجيبها البيت وما ابغاها تشوفك بيتها وتبغى تاخذ حريتها فيه .. وبتربي عيالي انا شرطت عليها وهي وافقت وشرطت اني اكون لها لوحدها لانها تغار عليّ وتم الاتفاق وانت مالك مكان عندي .. بعد عشرة فقر ومذله ووالله العظيم اني ما اروح الاسواق الا بالاعياد واشتري من ارخص المحلات للعيال وان بقى شي شريت لي والا لبست اي شي .. وناكل الموجود يوم رز لحاله ويوم بطاطا مقليه ... الخ

المهم تمسكت بثبات نفسيتي وبعيالي وتعوذت من ابليس وتروشت وصليت وضبطت اعصابي .. قلت هذي حرب ولازم ما انهزم فيها .. بيتزوج بالعطا عنه مارجع يذلف بلا رجعه بس عيالي افرط فيهم معصي ..
مرت الايام والمدام عند اهلها << كنه زواجهم مسيار بانتظار هزيمتي ولكن .. يأبى الرحمن الا ان ينصر المظلوم .. طردني من غرفتي ورمى اغراضي وكل يوم يطردني من البيت مية مره وانا ارفض وبكل اصرار وارد جيب الشرطه تطلعني .. وبطلع ؟؟؟؟ استعمل اسلوب التجويع والحرمان مافيه اكل وملابس وادوات دراسيه ومسلزمات الدراسه .. والحمد لله الله يرزقنا من احباب حولنا صديقاتي المقربات ..
طبعا بتقولو وين اهلك .. رايهم اتركيه بعياله باللي مايحفظه مهو برجال .. اللي ايده بالماء مو مثل اللي ايده بالنار .. طبعا مارضيت وزعلو مني ...

الزبده .. اخيرا بعد سنه من زواجه تقريبا استسلم وراح استأجر شقه للمدام ، وطبعا اهملنا علني ، وعلني جدا قال ايش ما اقدر اخليها تنام لوحدها << مدري من ولهان عليك ..:09: وماعندي اوفر لكم كل طلباتكم << بسم الله عليك كنت مغطينا بكرمك يعني ..!!

المهم >> الاخ الظاهر شاف شي من الفروق ويبغى يتمصلح بمميزاتي وبنفس الوقت انا مهمله الحقوق والواجبات .. انا مو طايقته ومو عارفه كيف اقول له .. شكله يبغى يخليني سبير << احتياط يعني متى ما كانت حضرتها ..... جا عندي لحاجته ...

شسوي بالله عليكم حمار وانتم بكرامه حاجته وبس ومايهمه مشاعر ولا احاسيس ..
قال ايش يبغاني ارجع لغرفته اللي طردني منها ولي سنه انام على الارض مع اولادي ولما يشوفي فرشت بطانيه انام عليها بهذل ابو جد اللي جابوني ويصرخ ويسب وما اجلس معهم على الاكل اكل البقايا ان بقى شي ..
بقول شي بعد اهله الاكارم وقفو معه ابوه يقول له طلقها وامه كذلك .. وماني طايقه اشوفهم اقول بنفسي لو حصل بالمستقبل احد اولادي بيتزوج كيف بجتمع وياهم بمكان واحد .. شكلي ما احضر ابرك من شوفة وجوههم ..

وحضرته صاير رومانسي جدا مع المدام وحب وغزل حتى قدام عياله وموهمها انه بار باهله ويمثلون عليها علاقه حميمه تربطهم ببعض وانه بار فيهم وعلاقته معهم ممتازه ، وهي خبر خير ...

بنجن ساعدوني شسوي تكفووووون



والله محتاره شالحل برايكم

هذي سالفتي باختصار