تكفون طالبتكم طلبه والله ما غيرت المعرف حقي إلا علشان هلموضوع

23 يوليو 2007

السلام عليكم
خواتي اتمنى منكم بل أترجاكن بأن لا تحكمو علي ولا تجرحوني بالرد فا انا والله لم اغير المعرف واكتب الموضوع إلا لانه معذبني وأريد النصيحه

دعوني أخبركن عني أولا فا انا فتاه تجاوزت العمر ال30 جامعيه مثقفه إجتماعيه بشوشة الوجه كما يقال لي
منذو تخرجت من المرحله الثانويه وحتى سن 25 لم يخطبني احد بل كلها كانت مرتين والمرتين كانتا مجرد كلام فقط من غير شي رسمي بمعنى ((جس نبض فقط))

حتى وصلت لسن 25 وتقدم لخطبتي شخص من اول ما رايته لم احبه وكان فيه إختلاف في شخصياتنا لكني وافقت لمجرد ان اكون تزوجت وحتى لا يقال عني عانس واسكت كلام الناس واريح أمي

بعد الزواج بشهرين تطلقت والحمدالله على كل حال وكان هذا بإختياري وبكامل إرادتي بل سعدت من الطلاق اكثر من الزواج
والحين انا مطلقه لي 4 سنوات ونص او اكثر وانا مطلقه ومحد طق بابي للزواج

هاذي حياتي بإختصار

المصيبه هي إني لا أصلي ... طالبتكم لا تفهموني غلط.. حاولت ونجحت فتره بس وبعدها وقفت صلاه اضغط على نفسي واصلي بس اوقف والله يابنات اني ابي اصلي اتعذب كل دقيقه ودي اصلي واقرا قران بس ماادري وش يمنعني إذا شفت احد قعد يصلي اقول في نفسي يا حظها تصلي

المصيبه الاكبر اني انا انسانه فاهمه في امور الدين كثيرررررررررررررا واحب اقرا عن الصحابه وعن الدين والنار والجنه انا عندي خلفيه كبيره في الدين ومتحدثه جيده وانصح كثير .. وكل الي يعرفني من بعيد وقريب يقولون لي انتي تخافين الله وتصدقين في كلامك

بنات كل ما ادعي لربي ادعي لنفسي بالهدايه والله يا بنات اني استحي اني ادعي دعوه لدنيا .. استحي من ربي لاني اعرف اني مقصره بأي وجه اجي لربي وادعي انه يرزقني بالزوج او يرزقني باي شي وانا مقصره معه

تخيلو اني كنت في فتره اقوم الليل واصوم كل خميس واثنين كانت لفتره معينه من الزمن يمكن شهر بس بعدين تغيرت وتركت الصلاه فتره كبيره بالسنه والسنتين وبعدين ارجع ابدا اصلي وبعدها اقطع كم شهر مره ثانيه
لين استحيت و كل ما أرجع ابدا اصلي واقول ربي سامحني وهاذي اخر مره بس بعدين اقطع لين صرت اقول مالي وجه

والله ما ادري وش فيني وقسما بالله ابي اصلي واصلي الصلاه كلها وبوقتها

بنات يمكن غلط اقولكم بس انا دائما اتصدق ما اوقف الصدقه لنفسي ولاهلي وامواتنا واذا حصل لي مشكله اروح اتصدق على طول
واحب اعمل الخير وانصح وقسما بالله حتى نصايحي ابنيها على الدين والحلال والحرام مع اني انا اكثر وحده المفروض ما تتكلم عن الحرام لاني الي اسويه كله حرام

تكفووووون تكفوووون ساعدوني ما ادري وش اسوي بنفسي

ولا تقولون لي عن عقوبه تارك الصلاه المشكله والي يذبح اني اعرف الشي هذا
واعرف اني اذا دعيت ربي ما يستجيب لي
واعرف اذا دعاء احد لي يمكن ربي ما يستجيب علشاني ما اصلي

اذا انا اتسحي من ربي اني ادعي لنفسي شلون اخلي احد يدعيلي

الحين انا بديت بالإستغفاااار قاعده اكثر من الاستغفار والادعيه يمكن ربي يرحم بحالي
احس اني انا من الي قال ربي عليهم (( وطمسنا على قلوبهم))

ودي ربي يحبني علشان يحبب خلقه فيني

كثير عندي ناس اعرفهم في البدايه مره يحبوني واكون ماقصرت معهم بشي.. فتره بس وبعدين يروحون يبعدون ما يتصلون إلا بالنادر احيانا اكون احبهم كثير واسوي كل شي اقدر عليه واساعدهم بس ما يقعدون يروحون.. والقهر ما يكون بينا اي مشاكل مجرد كذا .. يصير انسحاب من غير سبب ويكون منهم هم مو مني انا

على طول اقول هذا عقاب ربي لي.. لان من علامه حب الله لعبده محبة الناس له وهذا الي خلى الناس مو علاقتها قويه معي مثل ما انا ابيهم يصيرون

اعذرووووني كلامي مو مرتب بس اول مره اعبر عن نفسي بالطريقه هاذي

بنات للتوضيح اكثر ترا ماعندي صديقات سوء وبالاصح ماعندي صديقات مقربات يعني محد غيرني ولا احد يأثر فيني.. وانا حياتي الاسريه جدا مستقره وعائلتي يشهد عليها بالاخلاق والدين

ربي شاهد كم تمنين يكون عندي صديقات زي الخوات نتساعد على الخير ونجمع الدنيا والاخره

قولولي وش اسوي عطوني حل.. تكفوووون لا تردوني وانا محتاجه..
طنشوني بكل شي بس مو بشي ممكن يعتق رقبتي من النارر

اسفه على الاطاله وحتى ما اعرف وش كتبت بالضبط وخايقه اقراه مره ثانيه وامسح الكلام وانا من جد ابي المساعده
ماودي تقسون علي بالكلام بس اذا هذا الشي بخليني ارجع للصلاه اقسو علي وجرحوني عل يلين قلبي وما اكون من الناس الي طمس الله على قلوبهم لين اموت

تكفون طالبتكم طلبه والله ما غيرت المعرف حقي إلا علشان هلموضوع

التعليقات

الإعجاز العلمي في تكوّن النبات

في وقتٍ أنت أحوج ما تكون إليه ..!!

أفضل الأدعية في ليلة القدر ومتى تكون؟ 🌙✨

متى تكون دعوةُ الصائم لا تُردّ؟

دعواتكم تكفون