في بيتنا عروس تعالو اندلعها ونجهزها سواء

انا من الحبيبة الكويــــــــــــــــت واي طلب انا تحت امرك يالغالية ......ز

مرحبا حبيبتي انسانه طموحه أولا بخصوص البشره وديها لمركز مختص أحسن عشان لا تصير لها مضاعفات من الخلطات الملطوشة من أي مكان ...أنا يوم كنت أجهز عمري للعرس رحت مركز تجميل عندنا في عمان عطوني كريمات تفتيح للوجه والجسم بس تفتيح بدرجة معقولة وبعدين سولي تقشير كرستال واستمريت شهرين عندهم بس فعلا عطاني نتيجة حلوة لاني انا اختج موظفة وكانت بشرتي شوية محترجة من الشمس اما للجسم خلها تسوي حمامات بخار ومغربي ترا وايد يصفي البشره وغير تنظيف بشرة وجها على الاقل كل اسبوعين وخليها تاكل عدل خضروات وفواكة وحليب دافي وأشياء مغذية... أما الشوبنج...فساتين سهره لاتشتري الا اذا كان عندها مناسبة بعد عرسها بس ممكن تشتري فستان سيمبل وناعم تلبسة لزوجها.... بس خلها تشتري جلابيات رسيبشن عشان تطلع فيهم جدام الناس اللي تحب تزورها بعد العرس... أما الملابس الثانية خلها تشتري حسب رغبتها هي بس احسن ما تكثر عشان يمكن تحمل على طول وبعدين تتورط فيهم وما تقدر تلبسهم بس ملابس النوم كثري منها وحاولي تخليها تشتري الامبريلا ستايل يعني اللي يكون ضيق من عند الصدر ووسيع من تحت عشان تقدر تلبسهم اي وقت حتى وهي حامل وخلها تشتري اللي فعلا يناسبها لان الرجاجيل وايد يطالعون ويهتمون وانت ادرى حبيبتي؟؟؟ أما هدية العريس ممكن تشتري ساعة ماركة مثل ما قلتي وممكن تشتري له بوك وميدالية ماركة أو ممكن مسباح...... أنا شريت لريلي مسباح كرستال لون مارون دايم ياخذه بالمناسبات وكل من يشوفة يسألة عنه ... والله يوفقكم بجهاز أختج.

انا من الدمام

بس الله وفقها و يسعدها و يسخر لها زوجها

مبروك وموفقين ان شاء الله

بالنسبه للسوق عندك غرناطه وحياة والفيصليه والمملكه

هذولي عشان التيورات ولبس الطلعه

سيتي ماكس و سيتي بلازا هذي للبس البيت وخليها تكثر من لبس البيت يعني فساتين قصيره
تنانير قصيره
بناطيل جينز وعادي
وبناطيل ميدي وشورتات يعني من كل موديل تاخذ مو تخلي كل لبسها جينز طويل بس حلوو التغيير

العطورات والماكياج خل تروح السويلم صدقيني نفسه نفس اللي عندي وجوه وفافوم بس الفرق انه ارخص
ومجموعة الجسم خل تشتري لها مجموعه وحده بس لان الهدايا الي بتجيها بتلاقين نصها مجموعات جسم وعطور وساعات في ظل غلاء الذهب عرايس هاللصيف يحلمن يشوفن غير هالهدايا

الفساتين اكيد فستان الصباحيه بيكون فخم وخل تجهز لها فستان حرير تفصله تفصيل عشان تضمن محد يكون زيها وخل تخلي موديله نعوم وكيوت يعين لو انعزمت او حفله او خلافه<< حلوه خلافه

العبايات عبايه للطلعه وعبايه للمناسبات وطرحتين فخمات

الجزم ولك الكرامه خل تخليهم بعد ماتشتري التيورات عشان تنسقهم عليهم واهم شي تشتري لها شي واطي ومريح للسفر

وهدية زوجها اتوقع ساعه فخمه
والبشره اذا تقدر تنتظم عند اخصائيه خل تنتظم اصرف لها

والله الله بالساونا والحمام المغربي ترا بيلمع جلدها زين

وقولي لها من الحين تكثر شرب ماء وفواكه وخضار وخل تمر الصيدليه وتاخذ لها كومة فيتامينات ترا الجهاز يهد الحيل مو اذا جاء الزواج الا هي مصفره وتروع

والله يوفقهم

لو افدتك ممكن تدعين لي بالتوفيق والستر يالغلا

خواتي اسفه على تاخري في الرد لانه اليوم كنت برا البيت اشكر كل الي ردوعلي وجزاكم الله خير ويعلم الله اني دعيتلكم جميعا من قلب دعوه صادقه ارجو من الله ان يتقبلها وشكرا مره اخرى بس ودي تخبروني ماهي مكونات مجموعة الحمام وكيف تستخدم بسراحه انا ماعرف الا الجل والرغوه ياليت تفيدوني وكمان ابي اعرف عن الزيوت العطريه وكيف تستخدم اثناء الاستحمام وشكرا مقدما