ياويلي اهل زوجي يبغون يسكنون عندي!!!!! الفزعه يابنات

السلام عليكم
بنات ودي استشيركم بشي وابيكم تعلموني انا غلطانه او لا وكيف اتصرف
الله يسلمكم السالفه ومافيها ان اهل زوحي ساكنين في (بيت وقف) يعني كل العايله العمام والعمات وزوجات الاب لهم حق في البيت بالمعني الاصح البيت مو ملك لهم
ابو زوجي متوفي فبما ان زوجي اهو الأكبر فأهو المسؤول عن البيت وعن الاهل
الحين انا في احتمال يطلع لي بيت من الاسكان السنه الجايه يعني عقب فتره وتعرفون انا ساكنه في شقه بعيد عن اهل زوجي وكيف احساس الزوجه ان ودها تطلع ببيت
الحين لما اهل زوجي عرفو ان في بيوت راح تتوزع جلسو يقطون نغزات او يقولونها ان واخيرا بنفتك وبنطلع في بيت ابي افهم اهما وش دخلهم البيت لي انا وزوجي من عزمهم
يمكن تقولون لي هذولا اهل زوجك ومافيها شي
بس راح اشرح لكم الوضع عشان تكونون في الصورة
(الي موجودين في البيت الام وهي لاحول لها ولاقوة يعني العيال كلش ماعندهم احترام لها هواش وصراخ عليها ولما يجي زوجي يسكتون يعملون حالهم مؤدبين وطبعا انا اسكت وماعلم زوجي لأن ماحب آتدخل في مشاكلهم
وعنده اختين في المدرسه وكله بتهاوشون ويصرخون طول اليوم يعني البيت حده ازعاج غير الكلام السم الي ينقط على الام واهي ساكته
وعندهم اخت متزوجه بس الحمدلله والشكر زوجها كل عيوب الدنيا فيه يعني يشرب يزني مع بنات واولاد
واهي في الاسبوع يمكن 5 ايام تنام في بيت اهل زوجي بحكم الخلاف المستمر وعيالها 24 ساعه طق فيهم واهما مايسكتون ولا دقيفه والله ولدي عمره 5 شهور صار كله يقوم من النوم خايف ويصرخ مره وحده يعني مخترع بسبب الصراخ الي يصير لما اروح لهم
وزوجها كل يوم وثاني جاي عند بيتهم يهدد ويصارخ يعني فضيحه في الفريج
وعندهم بعد اخوهم متزوج وزوجته انا على خلاف معاها واهي راعية سوالف وخرابيط
وزوجي الله يهديه مستحيل لما يروح لهم يضحك او يسولف طول الوقت مستحمق وعافس وجهه بسبب الي يسوونه ويبي يفرض شخصيته وحتى انا مستحيل يعطيني وجه لما اروح معاه هناك فأكيد اذا جو معاي البيت راح يعاملني نفسهم وانا مستحيل ارضى بهالشي
فقد مااقدر احاول اخفف روحتي لهم وماروح إلا بعض الاحيان عشان ام زوجي لأنها مالها ذنب)
المهم الحين عقب ماحكيت لكم عن الوضع تخيلو انهم يبون يجون يعيشون معاي كيف باقدر آستحمل
انا فاتحت زوجي امس بالموضوع وقلت له اتمنى ماتزعل وعلمته بالأسباب اهو سكت لأن عرف اني على حق ويعرف كيف عيشة بيتهم حسيته زعل بس حاول مايبين لي انا قلت له حتى لو تبي تعطي بيتكم البيت عطهم بس انا بتم في الشقه لأن ماقدر استحمل اهو قال لا اهما بيروحون يسكنون عند اخوي اذا طلع له بيت او خل يجلسون في نفس البيت الي اهم فيه
الحين يابنات بقيت اعرف الي سويته صح او غلط؟ لأني خفت يفتحون الموضوع لزوجي ويقول لهم اوكي بناخذكم معانه
وشلون اتصرف لاجابو لي الموضوع مره ثانيه ؟
آسفه طولت عليكم بس عن جد محتاره

66 تعليق 19,350 مشاهدة

شاركي في النقاش

سجلي الدخول لإضافة تعليق.

التعليقات

64
  1. @aasoool

    ماظن الي سويتيه غلط
    لان هالبيت لك ولزوجك
    حق من حقوقك
    ولو انهم ناس ما من وراهم مشاكل وسوالف قلنا ميخالف يسكنون معاك ولجل عين تكرم الف عين
    لكن اذا كان الوضع مثل ماقلتي لاا والله زين ماسويتي وزين صارلج موقف وكلمه بوقتها
    عشان بعدين ماتتوهقين فيهم ويجابلونج طوول العمر
    بس نصيحة بالنسبه للام حاولو قد ماتقدرون ماتقصرون معاها لانها مسكينه وحتى عيالها مأذينها ف انتو بروها وقومو فيها لانها مثل ماقلتي مالها ذنب ولو في مجال تاخذونها عندكم والله لج الاجر والمثوبه وسعادة ورضى زوجج والله يوفقج
  2. موقفك صح ولاغبار عليه وتمسكي برأيك واذا صارنقاش والامور تأزمت
    خذي أم زوجك فقط للعيش معك أما الباقي أرفضيهم رفض قاطع
    لأن الام هي الوحيده الواااااااجب عليكم رعايتها وحمل مسؤوليتها من ابنها
    الاكبر واخوانه واخواته يتكفل بهم من يقدر على تحملهم
    والله يكون بعونك وضعكم صعب ومتأزم والامور متداخله ببعض ولازم تكونين
    اكثر حزم وشخصيتك اقوى لتحمين بيتك وزوجك وابناءك منهم
  3. الله يعينك خاصه والبيت فيه اولاد

    اما تسكني بالشقه وهم بالسكن اوالعكس هم بالشقه وانتي بالسكن لان البنات بيتزوجون ويروحون والاولاد بعد

    والبيت ترا من حقوق الزوجه الله يكتب لك الخيره
  4. @ola_klmh

    معاااااااااااااااااااااااج حق هذا بيتج مب ملزوه تشلين حد وماعتقد زوجج يزعل..
    اللله يهنيج فبيتج وادعي يطلعلي بييييييت:)

تابعي تجارب أخرى من هذا القسم.