باقي شهر على رمضان

الله يجزاكم خير على الردود الحلوه
والله ان رمضان حلو الله يبلغنا شوفته
اللحين عرفنا ايش نسوي
طيب الاغلاط الي تحصل في رمضان زيي انا جبت ذبيحه ثنتين وكفتها كلها في الفريزير وماجمدت وبعض اللحم ماثلج لذللك رمضان ذا بيجيب ذبيحه وحده وكذللك
اللحمه المفرومه انا بسوي طريقه اختي تحطها في كيس وتفردها على شكل ورق وتحطها في الفريزير ولما تبيها تطلعها وتسيح من الثلج بسرعه مره حلوه طريقتها
يالله يبنات اتحفونا كمان وينكم

أول شيء بصراحة لازم نعترف أنه رمضان شهر عبادة والاوقات اللي نضيعها في المطبخ احنا اولى فيها ياربات البيوت ؛؛

طويلات العمر نظامي برمضان كالتالي ومرتاحة له مرة والحمد لله لكن لابد من الحوسة أول الشهر أحيانا ( مدري الحماس والا عشان العيال وفرحتهم برمضان وبعدين يرجع نظامي عادي بعد اسبوع ؛ بعد مايملون )

انا غير موظفة ؛؛

**سفرة الفطور ( قهوة ؛ رطب ؛ نوع واحد حلى ؛ فاكهة ؛ عصير طبيعي ؛ مويه )
**سفرة العشاء بعد المغرب ( شوربة ؛ سمبوسه ؛ معجنات خفيفة جبن او زعتر او بيتزا ؛ فاكهة ؛ مويه )
** سفرة السحور ( طبق رئيسي وأكون مجهزة له اللحمة أو الدجاج مع الفطور وهذا أنوع فيه مرة رز مرة معكرونة مرة صينية خضار مع خبز أي شيء ؛ نوع سلطة ؛ فاكهة ؛ لبن ؛ مويه )
* الصباح اصحى مع العيال للمدراس ؛ وارجع انام الى الظهر ..
* اصحى أصلي وأطلع من غرفتي على طول عالمطبخ أجهز أغراض الفطور يعني السفرة تكون عالطاولة بالصالة من الظهر الرطب أطلعها من الفريزر الكاسات الفاكهة ( أنا أحب أطلعها قبل حتى تحتر شوي خصوصا اللي ما يخرب مثل البرتقال والتفاح والا الموز والعنب واللي ممكن يخرب لا أغسله وأتركه بصحنه في الثلاجة ) ..
* بعد تجهيز السفرة أدخل المطبخ أسوي نوع واحد للحلى وبصراحة عندنا ماتفرق لقيمات جبنية أو حتى لو حلى بارد المهم حلى مع القهوة ..
* أجهز الشوربة وطريقتي كالآتي ( أسلق اللحمة في مويه بس وبعد نص ساعه أملحها وبعد عشر دقايق أفرم البصل وأحمس اللحمة معه مع الليمون الأسود والفلفل الأسود والكمون أهم شيء ونصف مكعب الماجي بعدين أحط لها الصلصة وأصفي فوقها موية اللحمة ثم أتركها على النار تفور وأنا مجهزة الشوربة الكويكر مطحونة في الخلاط مع شوية مويه ثم أصبها فوقها وأقصر عليها وأتركها على نار هاديه لمدة نصف ساعة تقريبا ) الشوربة دايما أجهزها وأخلص منها قبل العصر وأنا مطفيه عنها لأنها طبق رئيسي وأحب أصلحه بدري وأرتاح منه ؛ طبعا لما أركب اللحمة أرجع أقرأ هالوقت كله بس أكون قريبة من المطبخ ..
الشوربة الحمراء هي الرئيسية عندنا بس أحب أغير كل ثلاث أو أربع أيام أسوي شكل غير يعني مرة شوربة دجاج مرة شوربة خضار مرة عدس مرة شوربة دجاج بالذرة وهكذا ...
* أطلع السمبوسه من الفريزر بعد العصر حتى تفك ثلجها ؛ السمبوسه ما أحب أعملها بنفس اليوم لأن اليوم كله يضيع وأنا أصلح حشوات وألف ؛ أفرزن تقريبا ثلاث مرات بالشهر حق عشر أيام كل مرة مو أكثر ..
* برضه أطلع نوع ثاني من المعجنات جبن زعتر بيتزا و أنا أفرزنها بعد لكن أكتب لكم الطريقة بوقت ثاني ؛
* بعد صلاة العصر أمسك بنتي جنبي تحل واجباتها وانا أقرأ عندها والله يعينني هالسنة ولدي بأولى بعد الله يصلح لنا ولكم العطا ..
* وبعد العصر بعد أجهز القهوة وأحطها بالترمس وخلاص أنا ارتاح ما عاد عندي شيء لين يأذن المغرب ( قهوتي جاهزة الحلى جاهز ؛ السفرة مصفوفة ؛ الشوربة سويتها باقي السمبوسة والمعجنات بعد المغرب تقليها وتسخنها الشغالة أو أنا بعد ما أصلي المغرب ) ..
* بعد ما أفطر أجهز المويه للشاهي أصلي وأزله بالترمس وأجهز العشاء ..
باقي بارجع لكم

بس باروح انام وبكرة أكمل بإذن الله ؛؛

أكمل لكم ..
* بعد المغرب وبعد ما يخلص القلي وتخلصين من دخلة المطبخ ؛ حطي الفحم وبخري البيت ولما تخلصين حطي المدخنه بغرفتك او دولاب ملابسك وملابس زوجك ..
* بعد العشاء أروح أتجهز لصلاة العشاء ؛ اتحمم وأغير ملابسي وأحيان قبل ما تعشى ما أحب ريحة القلي والطبخ في المسجد أحس أنه فعلا تأذي المصلين وفعلا أتضايق لما أصلي جنب وحدة ريحتها طبخ وحمس وقلي أحس اني بالمطبخ مو بالمسجد وريحتهم تعلق بملابسي وعبايتي ؛ لا تتعطرين للمسجد لكن عالأقل تحممي والبسي ملابس نظيفة وريحتها حلوة وعباية نظيفة ..
* لما أرجع من الصلاة أجهز السحور ؛ سحورنا بدري العشرين الاولى 12 او 12 ونص بالكثير وحده والعشر الاواخر لا لما نرجع من الصلاة واكون مجهزته قبل اروح وحاطته بالحافظة أو بالفرن واسخنه لو احتجت ..
* قلت لكم انا اجهز اللحم او الدجاج مع تجهيز الشوربة يعني سويت لحمة آخذ نصفها للشوربة ونصفها مع المويه اتركه يبرد شوي بعدين ادخله الثلاجة للسحور ؛ ولو دجاج نفس الشي آخذ اللي احتاج للشوربة والباقي عالثلاجة واطلعه لما أجي من الصلاة ..
* أغسل الرز قبل اروح اصلي ؛ أو اطلب من الشغالة تجهز لي الخضار اذا باسوي صينية خضار ارجع والقاها مقشرة ومغسولة وجاهزة ..
ولو تذكرت شيء رجعت لكم ..

طريقتي في فرزنة المعجنات :
- اعجن العجينة واتركها تتخمر عادي ؛ واجهز حشواتي الدجاح ؛ الجبن بنعناع ؛
السبانخ ...
- بعد كذا احشيها واصفها بصياني القصديربعد ما ادهنها بزيت ( اكيد تعرفونها ) واحمرها بفرن ساخن من تحت بس يعني ما تاخذ اكثر من سبع دقايق بالفرن مو مهم تتحمر اهم شيء تستوي وقبل لا تتحمر طلعيها او خليها تتشقر خفيف من تحت بس من تحت ؛ بعد كذا اطلعها واخليها تبرد بعدين اغطيها بغطاءها وادخلها الفريزر ووقت ما أحتاجها أطلعها ادهن وجهها بالبيض وارش وجهها بالسمسم وادخلها فرن حار اسخنها واحمرها من فوق وتطلع كأنها طازجة ..
- بالنسبة للبيتزا ما أحط عليها أي نوع من الحشوة بس أعملها دوائر صغار وما احط عليها شيء وبعد ما اطلعها من الفريزر قبل ادخلها الفرن احط لها الصلصة والفلفل الرومي والزيتون وادخلها فرن ساخن وآخر شيء قبل لا اطلعها الجبن المازوريللا ؛ نفس الشيء اعمل احيانا أقراص زعتر ادهن وجهها بشوية جبن واغطها بالزعتر وادخلها الفرن ..

تجهيزات ممكن تحفظينها بالثلاجة :
- الشيره للحلويات أحفظها ببرطمان وأحيانا ما اسوي الا مرتين بالشهر ..
- صلصة البيتزا برضه احفظها ببرطمان بالثلاجة ممكن تجلس ثلاث أيام بدل ما تعملينها كل يوم ..
- البصل المفروم ؛ أنا أفرم تقريبا حق ثلاث أيام بس ما أحطه بالفريزير لا احفظه ببرطمان واحطه بكيس داخل درج بالثلاجة حتى ما تطلع ريحته عالأكل وكل ما احتجت آخذ منه حاجتي ..
- المعجنات والسمبوسه والبف والكبة وكل ما يحتاج لف افرزنها ..

حاجات بسيطة ممكن تنقذك ..
- خبز التوست أو المفرود الصغار أو حتى الصامولي ممكن تغنيك عن المعجنات أو السمبوسه جهزي الحشوة واحشيها بسرعه ..
- صياني البسبوسه والكيك السريع او دانه كيك وحلويات الفرن اللي ما تحتاج لف ولا خربطة اخلطي واخبزي ( وعندي كم خلطه احطها لكم بإذن الله وما أبغى الا دعواتكم ) تنقذك بوقت الأزمات أو اذا حبيتي تستثمرين وقتك ..


(((الأهم من هذا كله)))
واللي المفروض نحرص عليه أننا نستغل هالاوقات المباركة وهالشهر الفضيل اللي الحسنات فيه تتضاعف في شيء ينفعنا وما نضيع الوقت بالمطبخ ؛ في الآخر الواحد ياخذ لقمة لقمتين وهو شبعان يعني تعبك كله ووقتك ضاع عشان هاللقمتين وأي شيء ممكن يسد مكانها ؛

- اجمعي كل الكتيبات والمنشورات أو الأشرطة اللي عندك عن رمضان وفضل رمضان وخليها قريبة منك عند جلستك اليومية تقرأين فيها أو تسمعينها وانتي تشتغلين أو تصورينها وتنشرينها ..
- خصصي لك وقت لقراءة القرآن بدون مقاطعة ؛ أنا أفضل بعد صلاة الفجر قبل النوم تقرأين فيه يوميا بدن ما أحد يقطعك ..
- رمضان فرصة للاقلاع عن الذنوب وتجديد العهد مع ربك ؛ ليتنا نستغله كما يجب فماندري ندرك رمضان اللي بعده او لا ؛ عسى الله يبلغنا واياكم صيامه وقيامه ويكتب لنا ولكم فيه القبول ..

زيدوني الغالي والقادريه الله يسعدكم يارب والله استفدت منكم كثير جزاكم الله كل خير

الله يوفقكم بنات
والله محتاجة انا اول مرة يمر علي رمضان في بيت زوجي