بعد كل هالطمووح ينكتب اني .....

السلام عليكم
انا خلصت الدراسه الجامعيه .. كان عندي طموح كبير في تكملت دراستي والحصول على وظيفه مناسبه لمجالي .. طموحي في تحقيق ذاتي قبل اي شي تزوجت واصبح طموحي الحقيقي في ارضاء زوجي تفننت في الطبخ عشانه اهتميت في معرفة ما اجهله اهتميت في نفسي اكثر ... فضلت ان يشوف براعتي في الطبخ والتنظيف على وجود خادمه ولو بالساعات الا للضروره كنت اطمح اني اكون متفوقه في كل شي في حياتي الزوجيه الى ان انجبت بنتين وظليت على محاولاتي في الموازنه بين بناتي وبينه الى ان التفت ان في حال تعبأت اوراق يكتب وظيفة الزوجه ربة منزل ؟؟ وهذا هو الواقع اصبحت هذه الجمله تؤلمني بل مثل الطعنه لما اقراها ؟ في النهايه شنو حققت ؟ مجرد ربة منزل ؟! هذا ماكنت افكر فيه اني بعد كل هذا الطموح .. بعد اعتزازي بنفسي وانا ادرس لاكمل البكالوريوس واي احد يسالني افتخر اني املك كل هذا الطموح كان املي اني افرح ابوي وامي ويشوفوني مثل ماتمنوا لي ؟ اتذكر اختي تقول لي اذا توظفتي مدرسه ( لان طموحي التدريس ) رح اروح معاك في اي مدرسه تدرسي فيها .. لما ابي انام استلقي على السرير واتخيل نفسي مثل ما تمنيت مدرسه كل يوم اروح واشوف الناس اشوف الدنيا واشوف نفسي وذاتي اكون صداقات متعدده .. يسألون عني واسأل عنهم .. احبب الطالبات في الماده الي ادرسها .. اكون لهم مثل الاخت .. اصحى على واقع مؤلم :( ماسويت شي ؟؟ مجرد ربة منزل ؟! احس اني ناقصه عن الكل من الموظفات والي كونوا شي الانفسهم ؟ حياتي تنظيف ..طبخ .. اهتمام بالبنات .. يوميا اعصب من بنتي .. منطويه على ذاتي ..حتى صديقات الدراسه شوي شوي ابتعدوا وكل وحده مشغوله في حياتها الخاصه .. معقووله هذا الواقع الي اصحى عليه ؟!! ادري اني انا الي اخترت ومالي خيار ثاني اكملت الدراسه وتزوجت كيف اقدم على وظيفه اذا انقبلت رح اكون برره الشرقيه مثل ماهو النظام الي موجود ؟.. صحيح ان بعض البنات توظفوا في مناطق بعيده عن اهاليهم لكنهم ماتزوجوا او اذا متزوجات فحياتهم صعبه ازواجهم مثل العزابيه ؟ اواسي نفسي بهالكلام في النهايه ..الواقع اني ربة منزل ؟؟! :( والله اني في ضيق ما يعلم فيها الا ربي كل يوم يمر علي وانا في الم بس هذي حياتي ؟؟!! الى متى تستمر حياتي كذا والى متى ينكتب على الورق ربة منزل ؟!! :( متى تشوفني امي مدرسه مثل ما دايم كنت اردد لها لما كنت بنت ؟ يكفي ان امي ماعندها اولاد وكان املها فينا تقول انتوا عندي افضل من الف ولد :( وانا اصلا ما حققت لها شي ولا لنفسي ؟

47 تعليق 3,971 مشاهدة

شاركي في النقاش

سجلي الدخول لإضافة تعليق.

التعليقات

45
  1. @bnt_aaz_6

    حبيبتي انتي تدورين الهم ..

    بس همسه احب اقولها ((ربه بيت ))

    من اعظم المهام واجلها الي تكلفتي فيها ...

    حطي كل جهدك على بناتك وزوجك وربيييييهم احسن تربيه لانهم اعظم مهمه يمكن توجهه لك ..

    المفروض تفخرين بالمهمه وتدعين ربي يسهلها عليك ويقدرك عليها ..

    بالنسبه للامور الثانيه...

    انتي المسؤله عنها .. حددي اهدافك وامشي عليها اذا كان مضايقك جلستك بالبيت وتربيه اولادك ..

    حققي طموحك ليش لا بس مو على حساب احد سواء نفسك او زوجك او بناتك ..

    :)
  2. @msrkaa_hanm

    قلبي طموحك خليه تربية نشء ليس للخادمه يد عليه !!
    طموحك خليه اعتماد عائلتك عليك وليس الاعتماد على وجود الخادمه
    طموحك خليه الاهتمام بالصغير قبل الكبير من اخبار اطفالك وزوجك
    طموحك خليه الاهتمام بمسئوليتك امام الله اولا في اولادك وزوجك

    وخليك من الوظيفه الا اذا عيالك يدرسوون وماراح تخلينهم عند الشغاله
    هنا يهوووووووون الموضوع روووحي ودوري طموحك وحاولي توازنين بينهم
  3. @kob_hlyb_1

    بنت عز .
    حبيبتي انتي تدورين الهم .. بس همسه احب اقولها ((ربه بيت )) من اعظم المهام واجلها الي تكلفتي فيها ... حطي كل جهدك على بناتك وزوجك وربيييييهم احسن تربيه لانهم اعظم مهمه يمكن توجهه لك .. المفروض تفخرين بالمهمه وتدعين ربي يسهلها عليك وي…
    سبحان الله غيرك يتمنى يكون في مكانك وانت قاعده بهم وغم
    احمدي ربك ليل نهار وتعوذي من الشيطان الي جايبلك الهم الي تتكلمين عنه
    وشنو احلى من تكونين ربه بيت وتربين بناتك احسن تربيه وترضين زوجك ؟؟
    يعني لما تكونين موظفه وتجين خادمه تربي بناتك وتخدم زوجك وانت مشغوله عنه بامور الوظيفه يكون احسن..؟!!
    اسفه اذا كان ردي عليك حاد وارجو ان تتقبلي راي بصدر رحب:26:
  4. @nbras_alabdaaa

    اجعلي طموحك
    مربية فاضلة اخرجت امة صالحة
    ولم تخرج فرد صالح
    تربية ابنائك والقيام بشئونهم انفع لك وللمجتمع من وظيفة تؤدينها خارج المنزل

    لك الحق بهذالاحساس ولكن كونك ام متعلمة وواعية تنفعين ابنائك اكثر
    والخيرة في ما اختاره الله
  5. @am_rzan21

    بالعكس احلى واقع ربه منزل
    اهم شي شهاده تفتخرين فيها ويفتخرون فيها بناتك
    وكثير يحسدونك شهاده ربه منزل +شهاده جماعيه +سعاده +بنتين حلوات
    وامك اكيد اهم شي عندها سعادتك
    بالعكس لاتفكرين في وراء فكري قدااااااااام
    فكري في بناتك في زوجك
    روحي شوفي المنتدى الي تشكي من زوجها والي مامعها شهاده من اصل والي مطلقه ووووووو وكثير
    حطي نفسك مكانهم كثير يتمنون سعادتك
    اشكري ربك على السعاده
    طيب لو ربي عطاك وظيفه وزوج اعوذ بالله سكران ومبهذل في حياتك والا انسانه عقيم ماعطها عيال كثير يتمنون البنات الي عندك
    هاذي عطايا ربي ولازم نشكره
    هذا الي عطانا ربي لازم نكون قنوعين
    وان شكرتم لازيدنكم
    ادعي ربك واشكريه على النعم الي انتي فيها
    والله يسهل عليك

تابعي تجارب أخرى من هذا القسم.