تعالو نتذكر الامثال القديمة ..

السلام عليكم ورحمة الله وبركاته ...

أهلين بالجميع .. انا من الناس اللي احب الامثال القديمة .. زحبيت اذكر لكم بعضها .. :)

الحي يحييك ، والميت يزيدك غبن

عدوك موب من قال فيك ، عدوك من بلغك

قــديمك نــديــمك

حلاة الثوب رقعته منه وفيه

جلدن ماهوب جلدك جره على الشوك

قال خذ خير قال: مامعي ماعون

حلال البخيل يلعب به العيار

تجيك التهايم وانت نايم

يامن شرا له من حلاله عله

يضيمونه الرجال و يحطها في ام العيال

انا واخوي على ولد عمي..وانا وولد عمي على الغريب

اللي ماله لسان ياكله الخنفسان

شف وجه العنز واحلب لبن

يجوز العيد بلا حنا

مايفل الحديد الا الحديد

امسك قردك لايجيك اقرد منه

مالك الاخشمك لوهو اعوج

من طق باب الناس طقو بابه

نفس(ن) تعاف ماتسمن

المال عديل الروح

من شافنا بعين نشوفه بثنتين

من تغلىّ تخلىّ

لحيتن احشمها ولحيتن احشم نفسك عنها

مقابل الجيش ولا مقابل العيش

حكي(ن) في الفايت نقصان(ن) في العقل

الين فات الفوت ماينفع الصوت

البيت بيت ابونا والقوم طردوناّ

قابل الصياح بالصياح تسلم

وسلامتكم وياليت اللي عندها من الأمثال القديمة تكتب لنا ..

6 تعليق 1,468 مشاهدة

شاركي في النقاش

سجلي الدخول لإضافة تعليق.

التعليقات

5
  1. @am_shmokhh

    مد رجولك على قد لحافك.
    من فرش فراش يجلس علية .
    عذر البخل رمضان .
    ما همي الا هم العرس ولا وجعي الا وجع الضرس .
    هذا اللي عندي واذا ذكرت شي رجعت لك .
  2. @fy_aayon_zogy

    ماشاء الله عليكم مابقيتو شي كلها قلتوها
    بس في الي مثلين:
    من راقب الناس مات هم
    وكلن يناظر الناس بعين طبعه
  3. @lm3

    العقل ثمره اما حبى واما برك قالوا ثورقالواحلبوه
    ما حك جلدي مثل ظفري
    امثال كثيره لكن امثالكم بعضها غريبه ما سمهت بها
  4. @anoooth

    صاحبة الموضوع
    لمى3
    العقل ثمره اما حبى واما برك قالوا ثورقالواحلبوه ما حك جلدي مثل ظفري امثال كثيره ل…
    ro6bah
    يعطيييييك العافية وتسلمين على هذي الامثال .. فيه امثال اول مره اسمعها

    شكرا وتسلمين على الرد :)

    ------------------------------
    ام شموخه
    تسلمين على الامثال وعطينا بعد ..
    شكررررررررا حبيبتي :)

    --------------------------------------
    في عيون زوجي
    فيه امثال كثيرة ودي بعد اذكر بعض الامثال واذكر تضرب في من .. اببحث واضيفها في الموضوع
    تسلمين على الرد ... ويعطييييييك العافية :)

    ----------------------------------
    زينب**
    شكرررررررررررا على الرد ....... امثال ro6bah هي اللي غريب .. لكن حلوة
    يعطيك العافية ..:)

تابعي تجارب أخرى من هذا القسم.