والله يا أختي الحبيبه ان كلام الاخوات الي ردو عليكي جدا حكيم . لكن أنا أبغى أضيف بعض ألأشياء زياده على كلامهم العسل .
أولا وقبل كل شئ أنا أكلمك عن تجربه أنا أكبر منك ومتزوجه مرتين واعرف في هذه الامور وشعري شاب منها ... بعد ما تطلقت من زوجي ألأول بسبب عصبيته الي ودتنا في ستين ألف داهيه ... تزوجت واحد متزوج وعنده ولد .. ونفس الي انتي قاعده تقوليه الحين الولد مو مشكله ... أقسملك بالله العلي العظيم انه الي تاخذ واحد متزوج أو عنده أطفال انها تاكل تبن بمعنى الكلمه .. ترى الي وراه تبع ما منه شبع . خذيها قاعده . وهذا وهو ولد واحد والله العظيم لو أقعد أحكيلك المشاكل الي جاتني من تحت راسه يمكن أخذ كل الصفحات الي في المنتدى وما أخلص ... والله العظيم اني كنت أقول مثلك أنا مطلقه وكمان زيك عندي مشكله صحيه مين راح ياخذني وأخاف يفوتني الوقت وأنا قاعده أنقي وأختار خصوصا ان زوجي الاولي تزوج وصار عنده ولد وبنت وأنا مازلت قاعده أندب حظي مطلقه في بيت أهلي . لكني الحين ندمانه بمعنى الكلمه وأتمنى فعلا ان الزمان يرجع لولرا ومستعده أعيش عمري كله بدون زواج ولا اني أخذ واحد عنده اهتمامات وارتباطات غيري وغير عيالي .. وبعدين انتي لسه صغيره ليش تحملي نفسك قرف تتحملي مسؤولية طفل مو ولدك والله العظيم هذه الايام الواحده فينا يالله يالله تتحمل عيالها الي هم من صلبها
وبعدين انتبهي فعلا زي ما قالولك الاخوات أهله ما قالو عنه عصبي الا لأنه مجنون يعني فعلا عصبيته شئ لا يطاق .؟ صدقيني الرجال العصبي والنكد والي يدقق على كل صغيره وكبيره في البيت انه قلته أحسن أقسم بالله اني أقولها وأنا أعنيها قلته أحسن لأنه يعقد أولاده ويخلي زوجته تكره اليوم الي شافته فيه ويحول جو البيت الى سكنه عسكريه كله رعب وخوق وقلقل . وبعدين لا تنسي ان الرسول صلى الله عليه وسلم عندما جاءه الاعرابي يقول له أوصني يارسول الله ... ايش قاله ؟؟؟؟؟ قاله لا تغضب . وكررها ثلاث مرات . لأن الانسان العصبي والي أقل شئ يثيره ممكن يعمل أي شي لأن الشيطان يكون راكبه . وصدقيني أهلك ما يكرهولك الخير أنا متأكده أنهم نفسهم انك تتزوجي اليوم قبل بكره بس زيجه محترمه ويضمنولك فيها الاستقرار والثبات .هذه حياه كامله بتعيشيها مو يوم والا يومين والاكان قلتلك جربي والله ما حتخسري شئ . لكن الامر لا يحتمل التجربه ... فشل المرأه في زواجها هو دمار حقيقي لها . ومهما حاولت بعد كذا ترقع وتوصل وتتزوج مرتين وثلاثه خلاص في فقلبها جرح ما حيجف الا لمن تموت .
الله يوفقك لما فيه الخير .
@ بنات ابي رايكم اليوم قبل بكرا...دخلتكم بخصوصياتي وقرار مصيري فلاتردوني @
متابعة النقاش، صفحة 4