لكل من اعتمرت في اواخر رمضان

أختي في الله:
أهنيك على العمرة وما في أحلى من العمرة برمضان وخصوصا العشر الاواخر السنة الماضية كنت معتمرة بالعشر الاواخر الصراحة متعة وسكينة ولذة روحية ما بعدها لذة الله يكتبها يارب للكل أن شاء الله صج انها تكون زحمة خصوصا يوم 27 رمضان في اليوم هذا لازم تروحين مبجر عشان تحصلين مكان الصراحة اعتمرنا قبل الفجر روعة وبعد اذان الفجر الحرم يخف فيه الزحمة فالتمسي الاوقات اللي يخف فيها الزحمة وفي النهاية يعتمد على الشخص نفسه يعني في ناس وايد يظايقون من الزحمة والناس وأغلب أوقاتهم بالمجمعات والاسوقة بس الانسان الذكي هوا اللي يستغل كل لحظة وهوة بمكة بالتعبد مع ان نومي كان قليل بس سبحان الله اتحسين بنشاط وهمة عالية إذا كنت حاطة بنيتج التعبد وتفريغ نفسج للعبادة
أهم شي تاخذين معاج حبوب مثلا للصداع ، فوار بانادول، وجل للعضلات وأنصحج بجل اسمه روفيناك رخيص مو غالي بس الصراحة فظيع لشد العضلات يخفف الالام اخذي معاج أكثر من واحد ممكن يصادفج أحد معاج يكون محتاجه ، أنا من كل شي كنت ماخذة أكثر من اللي محتاجته سبحان الله الواحد يفرح لما يساعد غيره خصوصا بالحرم
صح مو تنسين انج تخصصين مبلغ من المال عشان تتصدقين بوجبات افطار الصايمين وتكسبين اجر عنهم ان شاء الله، راح تلقين أكثر المطاعم مقابل الحرم مسوين تبرع لوجبات الافطار وفي الاخير ما اقول إلا الله يتقبل منج صالح اعمالج ومو تنسين خواتج في الدعاء
واسفة إذا طولت