بنات ضاقت بي الدنيا خلاص أبي أتزوج ولد عمتي ...شوفوا لي حل...الله يحرم وجهكم من النار

ان شاء الله المشرفات مايحذفون موضوعي...بس والله لولا حاجتي لكم ماكنت تكلمت...لأني ماأقدر أتكلم عند أي أحد...
بنات أنا والله تعبت من حياتي وطفشت...
القصة ومافيها ان ولد عمتي خطبني من ابوي...
ومر اسبوعين...وبعدها اتصل ولد عمتي على ابوي وقال له انه يبي يشوفه...فقال له ابوي "انا مشغول الحين...كلمني بعدين"
ورجع ولد عمتي بعد اسبوع كلم ابوي وقال له ابوي نفس الكلام...
لأنه أبوي كان مشغول مع أخوي علشان كانت امتحانات الثانوية العامة وبعدها تسجيل الجامعة..بس المشكلة ان ولد عمتي مايعرف انه فعلا هو مشغول...
وولد عمتي مارجع كلم أبوي لأنه فهم اننا مو موافقين عليه...
وأبوي مو راضي يكلمه ويقول له احنا موافقين...لأنه يقول المفروض هو اللي يتصل عليه...

المهم اني انا كنت موافقة عليه...وطول هالمدة كنت أتخيله انه زوجي...وكيف حياتنا المستقبلية...وووو.......انتوا عارفين كيف تكون نظرة البنت للولد.

المهم اني داخليا اقتنعت فيه كزوج...وماني قادرة أتخيل انه راح من ايدي...مو قادرة اتخيل انه ممكن يكون لبنت غيري...مارح أستحمل اشوفه مع بنت غيري...
حياتي كلها تطفش...
صار لي سنة وانا ادعي اني اتزوج... ولما صار الموضوع انتهى بهالطريقة...
طبعا انا كنت اشوفه قبل مايخطبني وأكثر من مرة دخل علي بالغلط وشافني بدون عباية...وكان له مواقف حلوة معاي بين لي فيها انه هو يحبني أو مهتم فيني بطريقة غير مباشرة...مثل انه لما رحت انام في بيتهم هو اللي وصلنا انا وبنات خالتي لبيتهم وماكان يرضى يخليني امسك اي شي بايدي هو اللي مسك شنطة الملابس وشنطة اليد...ومرة كنت قاعدة في بيتهم وكان معاي امه وخواته وكنا قاعدين نسولف وبعدها سألته سؤال فقال لي بدون مايحس ضمن الكلام "ياحبيبتي"...وغيرها كثير...
وعلى فكرة ترى هو متدين ومايسمع اغاني ومثقف...وكل الأشياء اللي كان يسويها لي كانت بعلم الجميع،،،

بنات ايش أسوي...أنا أبي أتزوجه...أنا مو قادرة أنام الليل من التفكير فيه...والنهار عندي أحس بزهق وطفش ووجهي يبين عليه الحزن...

والله مالقيت غيركم أقول لكم همي عسى انكم تساعدوني...أو تشوفون لي طريقة...
لو تكونون في مكاني ايش تسوون؟؟؟
لاتقولون لي الزواج قسمة ونصيب...لأن هذا مو حل بالنسبة لي...