جزاها الله كل خير فى هذا الشهر الكريم كل من تساعدنى فى مشكلتى انا فعلا تعبانة جدا

السلام عليكم ورحمة الله وبركاته
جزاكم الله كل خير يابنات المنتدى وكل رمضان وانتوا طيبين ويارب يغفرلنا كلنا فى الشهر الكريم دة ونفوز برضا الكريم سبحانه وتعالى
اما بعد.....انا يا بنات بمر بمشكلة فى حياتى يمكن تكون مرت بيها بنات كتير غيرى بس انا فعلا تعبانة جدا ومحتاجة حد يخفف عنى او ينصحنى
انا يابنات بنت عندى 22 سنة ومتخرجة من كلية العلوم من عائلة محترمة والحمد لله رب العالمين عندى اخ واحد واخت واحدة متجوزة وعندها ولدين ربنا يخليهم لها,انا اسفة اذا كنت هطول عليكوا بس انا عاوزة احكى حكايتى الى حد ما بالتفصيل عشان تقدروا تحكموا صح
من حوالى سنتين اتقدملى شخص شافنى فى فرح وكان دة قبل امتحاناتى فاجلنا الموضوع شوية لحد ما خلصت امتحاناتى وجاب مامته وباباه واتقدمه رسمى وكانوا عاوزين يعلنوا خطوبة رسمى لكن انا بصراحة كنت لسة خايفة فبالتالى بابا سمحلنا نتكلم مع بعض لفترة وييجى يزورنا فى البيت وقرينا فاتحة مبدئية وابتدينا نتعرف....الحقيقة انه فى البداية كان انسان رائع بمعنى الكلمة كان حنين جدا ومحترم وكان بيود اهلى وبيحترمهم ومكانش بيقصر فى اى واجب...فضلنا كدة فترة لحد ما ابتدى يظهرلى انه بيغير غيرة شديدة شوية من اى حد اتعامل معاه علما بان تعاملاتى مع الناس محدودة جدا بطبيعتى
بدا يحدد علاقتى بجوز اختى وبقرايبى وهكذا واكتشفت كمان انه مش بس غيور دة كمان شكاك جدا ووصل بيه الشك انه بدا يطلع كلام وحش جدا على ابن خالتى مش صحيح طبعا وبالتالى منعنى من بيت خالتى تماما..الى جانب بقة تشدد فى اللبس والخروج حتى مع والدتى وهكذا اختلفنا كتير وطلبت انى احكم ناس كبار جبت ابوه وامه وابويا وامى واتكلمت بمنتهى الصراحة اتنرفز جدا واتعصب وزعل ومشى ومن يومها مكلمنيش خالص خالص بس بصراحة اهله كانوا بيتدخلوا كتير وبيكلموا اهلى عشان يصلحوا بينا وعاوزنى انا اكلمه او ماما تكلمه بس هو مكانش ظاهر خالص فى الصورة بحجة ان كرامته اتجرحت لمجرد انى حكمت ناس كبار فى مشاكلنا
مرت 3 شهور ولقيته بيكلمنى يوم عيد ميلادى وبيقولى احنا مالناش نصيب فى بعض وربنا يوفقك وخلاص كدة
طبعا اتصدمت صدمة عمرى فيه وبكيت كتير بعد ما قفلت معاه وتعبت اوى
وبعدين ابتديت انا اتكلم معاه واتنازل عن حاجات كتير عشان يرجعلى وابتى يعاملنى بجفاء واتحملت ووعدته انى انا اللى اتغير رغم كل حاجة عملها وفعلا رجعنا تانى وابتدى يكلم بابا واتخطبنا وعشت ايام جميلة معاه لانى بحبه اوى لكن هو تعبنى معاه اوى اوى اوى فى الفترة دى ...كان يوم حلو و5 ايام وحش كان بنتقدنى باسلوب وحش جدا وكان بيجرحنى بكلام كتير وكان بيعامل ابويا وحش جدا وواخد موقف من اختى بدون سبب ونفس العيوب اللى فاتت الى جانب انه كمان ابتدى يحس انه دايما متضايق ودايما مكتئب ودايما تعبان وانا كنت بتحمله فى اصعب اوقات حياتى وقد ايه كان بيتعبنى اوى فى عز امتحاناتى وبيحملنى فوق طاقتى عشان ارضيه..ومنعنى انى ازور قرايبى خالص وانى اتعامل مع جوز اختى خالص ..وفضلت كدة ببذل مجهود كبير اوى عشان بس ارضيه وخسرت ناس كتير عشانه وكنا عالحال دة يوم يبقى ملاك معايا وكويس اوى واحس انه بجد بيحبنى اوى ويوم احس انه مش طايقنى ويقسى علية اوى...المهم اخر موقف لما جم اهله عشان يتفقوا على الفرح وابتدى ابويا يتناقش معاهم كاى اب من حقه انه يوافق او يعترض على كلامهم..كانت ردود افعاله فظيعة وصرخ فى البيت باعلى صوته فى وش ابويا وامى وخويا كلمه على الموبايل يعاتبه راح مزعق تانى وساب البيت ومشى..اتصل بية بعدها بشوية يقولى انا بحبك ومش هستغنى عنك ابدا بس اهلك دمرونى
وبعدها بيوم كلمنى بطريقة وحشة خالص وكلم امى وقالها انا عايز انهى الموضوع
وبعدين فضل يبعتلى رسايل عشان يصالحنى بعد ما نهى الموضوع مع امى ويتصل بية بس انا مردتش عليه خالص وفضلنا كدة اسبوع مستنياه ييجى ياخد شبكته...اتصل خاله بامى وقالها ان هو مكانش يقصد هو كان بيقول كدة عشان تناقشيه وطلب منها تتصل هى باهله تراضيهم..
بعدها بكام يوم باباه ومامته راحوا عند امى الشغل وطلبوا منها تحدد معاهم معاد الفرح كان شيئا لم يكن ومش عاملين حتى اعتبار لابويا اللى ابنهم على صوته عليه..وكانوا بيدافعوا عن ابنهم وطلبوا منها ترد عليهم بعد ما تفكر لكن امى مردتش لانها قالتلهم لو انتوا عاوزين الموضوع يمشى لازم يعتذر لابوها الاول لكن معتذرش
فبالتالى امه كلمت امى وقالتلها ليه مردتيش علينا فامى اضطرت تقولها مفيش نصيب راحت قالتلها طب احنا هنيجى ناخد الشبكة وفعلا جه هو وباباه وخدوا الشبكة وانا كلمته كتير وحاولت اخليه يعمل اى حاجة بس كان كل كلامه غلط فظيع فى ابويا واخويا واهلى كلهم وكان مصر ان اهلى داسوا على كرامته وانه مش هيرجع ابدا......
وكانت انهاية اللى انا مش قادرة استوعبها ابدا
اهلى كلهم كانوا ياما بينصحونى بالانفصال واصحابى وكل الناس كانوا بيقولولى انه هيقطعك عن اهلك وعن كل الناس وكمان مش هيعاملك كويس
انان عارفة ان كل شىء نصيب بس انا بجد تعبانة اوى من الفراق
وبكلمه كل شوية لانه بيوحشنى اوى...بس هو بيقولى احنا مش ممكن نبقى لبعض تانى واهلك هما اللى دمروكى مش انا
انا تعبانة اوى ومش عارفة انسى لانى فعلا حبيته اوى
ساعدونى من فضلكم..انصحونى...احكموا على اللى حصل دة...حطوا نفسكوا مكانى وردوا علية
انا اسفة جدا بجد انى طولت عليكم..بس ردوا علية بالله عليكم انا فعلا محتاجة ردكم جدا
شكرا لكم وجزاكم الله كل خير
وكل سنة وانتوا طيبين تانى
السلام عليكم ورحمة الله وبركاته:26: