دعواتكم (( لعل فيكم مجابة ))

بسم الله الرحمن الرحيم

السلام عليكم ورحمة الله وبركاته

كيفكم بنات حواء إن شاء الله طيبين؟؟

يمكن تكون هذي أول مشاركاتي لكني أتابعكم وأتفاعل معاكم بقلبي وإحساسي وأدعيلكم كمان.

يعلم الله إني حزينة ومهمومة فقلت مالي إلا بنات حواء أفضفض لهم شوية :(

مشكلتي يا حبيباتي إنه أختي إللي أصغر من أنخطبت قبلي وملكتها قريب وأنا كنت دايماً أخاف إنه وحدة من أخواتي تنخطب قبلي لأني أنا الكبيرة وكنت أدعي الله إنه هذا الشي ما يحصل لكن قدر الله وحصل..
ومن يوم ما انخطبت أختي في رمضان إلى اليوم هذا وأنا كل يوم أبكي ونفسيتي سيئة حتى صرت منعزلة وما أتكلم كثير لكني الحمد لله صرت أقوم الليل وأدعي الله إنه يرزقني الزوج الصالح وتصير ملكتنا سوا، وفي اليومين هذي بدأت أتحسن لكن المشكلة إني شوية أتفاءل وأضحك وشوية يجيني يأس وإحباط وأبكي، حتى مني قادرة أفرح مع أختي وأساعدها أحس إني أقل منها وإنها حتشوف نفسها علي وهي والله موكذا ، كمان خايفة من كلام الناس ونظراتهم إنها تجرح مشاعري.
والله يا جماعة أحس الدنيا ضاقت بي وماني عارفة إيش أسوي حتى أمي مسكينة مو قادرة تفرح عشاني وهذا الشي كمان مضايقني،
يا بنات هل أنا غلطانة والمفروض ما أحس بكذا؟ هل أنا موطبيعية؟
يعلم الله إني حاولت أصبر وأطنش وأقول اللي كاتبه ربي بيصير وهذا ابتلاء وأنا لازم أصبر لكن اليوم اللي بعده تنقلب نفسيتي والله تعبت واحترت في نفسي وخايفة إنه ربي يعاقبني لأني ما صبرت ولأنه أحياناً يجيني يأس (( الله يغفرلي ويسامحني)).

سامحوني يابنات طولت عليكم والكلام مو مرتب لأني قاعدة أفضفض وأكتب بشكل عشوائي..

دعواتكم لي يا بنوتات بالفرج القريب وأن يرزقني الله الزوج الصالح وتصيرر ملكتي وملكة أختي سوا ((لعل فيكم مجابة ))
الله يفرج همومكم ويفرج قلوبكم ويحقق لكل وحدة فيكم اللي في بالها..

أختكم أسومة