اول موضوع لي ( ابي احد يحكم بصراحه حتى لو ضايقني )

بنات انا مريت بوقت عصيب ومازلت احاول اتعافى
واتخلص من تاثير هالموقف

عمري 24 سنه
لي خاله اصغر مني بسنه
علاقتي فيها قويه وكننا خوات
مع انها شخصيتها كثير سيئه تحب تتكبر باستمرار
وتعطي نفسها هاله اكبر من حجمها
هي بنت طاايشه لها علاقات كانت مع شباب كثيير
لكن بالاخر عقلت وصارت تحب واحد بس << امحق عقل

المهم هذا الحكي من زمااان تقريبا من 4 سنوات يعني يوم
كانت 19 وانا 20 المهم انها كثير تتكلم عن اعجاب الشباب فيها
وتقدس نفسها وماخلت احد ما يبيها خصوصا انها تسافر كل سنه
برا لدوله عربيه المهم
انا بنت محافظه جدا ابوي وامي ملتزمين وتربيت على الدين
ولا كان لي علاقات وحكي فاضي
لكن كنت احس بنوع من القهر ليه يجيها كل هالحب
والغزل والمدح وانا لا ؟

لين يوم من الايام دقت تقولي ان حبيبها يبي يهديها شي ويبي يخيرها بين
لونين الظاهر انه كان جهاز جوال جديد وغاالي تقريبا حول 3 الالف ؟

لقيتها فرصه اني احذرها واقولها اكيد يبي منك مقابل ؟
المهم زعلت وصرخت علي وقالت اذا فيه معنى لكلمه الشرف فهو انا ؟
واللي مثلك عمرها ماحبت ولا راح تنحب بيوم من الايام ؟

وصكت السماعه بوجهي ؟

انا تضايقت وزعلت وقلت لامي
قالت كان قلتي لها انا بحب وبنحب
بالحلال ..

فرحت من كلمه امي وصرت ارددها بيني وبين نفسي
كل ما شفتها تكلم حبيبها او تقولي وش قالها اوو ش اهداها

وكنت احس براحه
مع الوقت اقنعتها بانها تنهي علاقتها فيه خصوصا انه
متزوج وزوجته كلمتها وصارت مجموعه عوامل خلتها تنفصل عنه
المهم بعد كم شهر
خطبتها صديقتها لاخوها وتزوجت لها الحين سنه متزوجه .
حالها هو هو نفس الاسلوب القديم تفاخر وكبر
ودايم تحكي عن زوجها وكيف انه يعشقها وعن سفراتها وعن
لبسها تتكبر وتتفاخر طول الوقت

انا تغيرت عليها وتعبت نفسيتي وصرت اكره احد يجيب طاريها
واتهاوش انا وامي دايم عشانها
واتعب اذا زارتنا وانقهر اذا جلست تتكلم عن حياتها قدام اختي الصغيره وامي
خصوصا اذا شفت امي تهتم لها وتسمع منها

لاني انقهر من تضخيمها لنفسها ولحياتها ودايم اقول لنفسي ليه
تتكبر علي وهي ما تزيد عني بشي ..
لا شكلها احلى مني ولا انا فيني شي يعيبني
بس اموت قهر اذا سمعتها تتكلم او تتواصل مع امي

من فتره تهاوشت مع امي عشانهاوقالت لي امي انتي تغاارين منها ؟؟

وبكيت ومت قهر ليه امي تفكر كذا ؟

انا اكره كبرها وغرورها واكره اني تعرضت لمواقف جارحه من جدتي قدامها
مره جدتي قالت لي قدامها بيوم ملكتها (( معليش اصبري وربي بيعطيك ان الله مع الصابرين ))
كان عمري 23 سنه ؟ اصبر ؟ ليه عانس ؟

وغير المواقف اللي تحصل من امها اللي هي جدتي قدامها هذا غير المواقف اللي تحصل منها هي


الللي بي اقوله هل رده فعلي غيره ؟
امي لها حق تقولي اني اغار ؟

هذا من كم شهر بس حاز بخاطري وودي افاتحها بالموضوع واعبر لها عن
رده فعلي وعن انها طبيعي احس بقهر من تصرفاتها (( اللي هي خالتي )) وإلا اكون ملاك لو ما حسيت بشي ؟؟

طبيعي اكره اني اجلس مع شخص يمجد بنفسه ويعظمها ويقدسها وكن ربي ماخلق الا هو ؟

انا تذكرت كلمه امي وضقت وحزنت وقلت ابي احد ينورني ؟

اتكلم مع امي وافهمها شعوري ؟

وهل معها حق بان تصرفي غيره ؟

حتى انها ثاني يوم من الهوشه قالت اذا تحسين بالغيره
حاولي تقرين كتاب تتخلصين منها عشان ترتاحين ؟؟

27 تعليق 2,277 مشاهدة

شاركي في النقاش

سجلي الدخول لإضافة تعليق.

التعليقات

25
  1. @am_kosh

    حبييتي ولا تضايقين نفسك يمكن طريقة كلامك مع امك حسست امك انك تغارين
    وما اكذب عليك حسيت شوي بكلامك غيرة شوي
    يمكن فعلا خالتك مغرورة ومعجبة بنفسها بس لازم تراعينها تراها عروس وبتشوفين السنة الجاية كيف بيصير وضعها انا ما تمنى لها الشر بالعكس بس حياتها بتختلف وبتمل
    بس وش تسوين مهما يكن امك لازم تسمع لخالتك ولازم توجهها او تنتقدها في حياتها
    وانتي لا يضيق خلقك ان شاء الله راح يجيك عريس اللؤطة اللي يستاهلك وترا على فكره توك صغيرة وماشاء الله اخلاقك عالية واحسن منها
    وش تسوين الدنيا مليانة وانا اختك بالمغرورين واللي شايفين انفسهم بس نصيحة طنشي ولا تكبر السالفة براسك بتصيرين فعلا تكرهينها صدق
    طولت عليك ادري وكني بديت اهذري بدون سنع
    وفقك الله لما يحب ويرضى
  2. @ord_32

    صاحبة الموضوع
    لا ياقلبي لا طولتي ولا شي
    وشوله فاتحين هالمنتدى الا للهذره

    انا الحمدلله يجيني يمكن 7 تقدموا لي من عمري 21بس ماجا اللي يستاهلني
    بس انا ما اغار انا احس ان الشخص اللي يتكلم عن نفسه باستمرار
    ويضخم نفسه كنه يقول انت اقل مني ؟تقولين ماعندك ثقه اقولك عندي بس
    انا من الناس اللي مااحكي عن نفسي ابد ولا امدح نفسي ؟
    على العموم شاكره ردك

    بس انا مااحس ان رده فعلي غيره
  3. @bkaa_moyh

    لا المغرور المتكبر منبوذ

    وهذي عندها نقص وتلقين حياتها نكد X نكد فعشان كذا تكمل النقص بالمظاهر قدام الناس

    الله يوفقتس ويسعدتس ويرزقتس الزوج الصالح
  4. @ihmz_osl

    حبيبتي لايضيق صدرك ولا شي خالتك هذي عندها شي اسمه جنون العظمه تحب تبرز نفسها بس سبحان الله لايدخل الجنة من كان في قلبه مثقال ذرة من كبر وانتي باين عليك انك انسانه طيبه ومتواضعه وخلوقه احمدي ربك انتي بنعمه محروم منها المرضى اللي مثلها ألا وهي القناعه بس مثل مالك ثقه بنفسك عززيها فاللي حولك وعاملي خالتك عادي علشان الكل حولك يحس بكبريائك وانك ياجبل مايهزك ريح
  5. @ord_32

    صاحبة الموضوع
    هلا اختي حياك الله

    اشكر ردك

    وفي شي يهمني اوضحه وهو
    الشخص لما يغار يغار من اللي افضل منه وبس
    مايغار من اللي يتكبر عليه ويغيظه باستمرار
    انا اتعرض لإغاضه منها باستمرار
    رده فعلي هي الزعل ليه
    امي سمتها غيره ؟؟

    وانا طرحت الموضوع عشان تقولون لي
    اتكلم مع امي ؟

تابعي تجارب أخرى من هذا القسم.