شاركي في النقاش

سجلي الدخول لإضافة تعليق.

التعليقات

768
  1. @rbyaa_alklob_1

    اشكر اختي ام الهتون..على الموضوع الجميل
    لكي نفيد ونستفيد من تجارب الاخوات
    عندي سوال متى الطفل يبداء يقول ابي الحمام او بي بول
    وجزاكم الله خير وجعل الجنه مثونا ومثواكم
  2. @am_alhton_1

    صاحبة الموضوع
    COSMOS
    ام جوجو .. اختنا ام اهتون ماقصرت .. وانا بعد اقول توها بثاني اسبوع ماراح تقللك ابي اروح الحمام اتصور يبيلها وقت اكثر و حتى لو ماكانت تهتم لزعلك استمري انتي بأسلوب الترهيب والترغيب و مع الوقت تبدا تتعلم وانا بنتي كانت نفس بنتك اجلسها ع ال…
    ام جوجو

    ما عليه الغالية سامحيني .. لهاني الشيطان ونسيت ارد على جزئية النونية اللي في الصالة.

    بصراحة انا اشوف ان البداية لازم تكون صح عشان تستمر صح .. والياهل حسب ما يتعود من البداية.

    انا رايي ان الياهل مثل ما نعلمه شو هو البول وشو هي الكاكا المفروض نعلمه في نفس الوقت وين المكان اللي المفروض يسويهم فيه .. بمعنى انه لازم يعرف ان الحمام هو مكان البول والكاكا مب اي مكان ثاني.

    ولا تزعلين مني بس النونية وظيفتها مساعدة الطفل في حالة انه خاف يقعد على المرحاض اللي يكون موجود في الحمام .. لكن مب انج تلاحقينه بها في كل البيت عشان يقعد عليها .. بعدين زوجج يقول خلي النونية في الصالة عشان البنت تشوفها وتتذكر .. طيب اذا كانت البنت في مكان ثاني غير الصالة والنونية مب جدامها فكيف بتتذكر؟؟ .. بهالمنطق مب بعيدة تحصلين نفسج مضطرة تحطين له نونية في المطبخ ونونية في الغرفة ونونية في الصالة ونونية في غرفة الطعام!!!!!!

    يا حبيبتي الطفل لازم يتعلم كيف ومتى يروح الحمام مب انتي اللي تودين له الحمام لين عنده!!

    ومع احترامي لزوجج بس ياليت يوم يقول رايه في مثل هالأمور ما يكون جدام البنت لأنها طبعا بتفهم وبتستسهل موضوع النونية اللي في الصالة واحتمال ما ترضا عقب تروح الحمام.



    COSMOS

    سبحان الله فيكم يا أمهات .. يعني الياهل ما طاع يروح الحمام زعلتو .. واذا حب الحمام بعد زعلتو!! :rolleyes:

    شفيج زعلتي؟؟؟؟؟؟ ... انا امزح وياج ترا :wink:



    شوفي حبيبتي .. ولدي عقب ما بدا يتمكن من موضوع الحمام صار كل يوم عقب ما اجهزه للنوم نتم رايحين يايين على الحمام ثلاث اربع مرات .. يعني شحططة مسائية يومية .. واللي يصير اني اول ما البسه البامبرز واحطه في السرير يتم دقيقتين بالضبط وعقب ينط ويقول لي (ماما ابا حمام) .. واقوم انزله من السرير وادخله الحمام ويسويها وعقب ارجع البسه البامبرز وارجعه السرير .. وبمجرد ما اروح ايلس على الكرسي يقوم على طول ويقول لي (ماما با حمام) واقوم مرة ثانية ادخله الحمام وعقب ما ارجعه السرير وايلس مكاني ينط مرة ثانية ويقول لي انه يبا يروح الحمام .. وهكذا داخلين طالعين من الحمام ... وهذا يحصل بالضبط مثل ما اقوله بدون مبالغة .. وهالكلام يصير لين الحين.

    لكن ......

    مع اني لازلت اغتاظ من ولدي على هالحركات .. ومرات اطفر واتعب من سالفة الحمام رايح ياي كل شوي .. لكن ولا مرة .. واكرر ولا مرة طنشته .. واقول لنفسي: صح السالفة تملل واحسه احيانا ماخذ الموضوع مثل اللعبة لكن مع ذلك هذا أفضل من انه يسويها على نفسه أو في البامبرز .... يعني انظر للجانب الإيجابي في الموضوع وانه صار يفهم أهمية الحمام ويحب يدخل يقضي حاجته هناك حتى لو من باب اللعب والدلع.

    وما باقص عليج .. انا في البداية كنت مفكرة انه يقص علي وانه بس يلعب .. لكني مع ذلك ما طنشته وقلت لنفسي: (افرضي الموضوع كان صدق وانه فعلا يبا يروح الحمام ! .. فمب لازم اخليه يسويها في البامبرز)

    الشاهد في الكلام .. حتى لو كانت بنتج تسوي هالحركات طمع في الحلاوة فوين المشكلة؟؟؟

    على الأقل هي فهمت انها لازم تستخدم الحمام .... وهذه نقطة مهمة جداً.

    انتي استمري على نفس الأسلوب .. اذا سوت حتى لو شوي عطيها واذا ما سوت لا تعطينها ..... واذا صاحت قولي لها (ما يصير تاخذين حلاوة وانتي ما فيج شي) .. وبدل ما تطلعينها من الحمام بالغصب حاولي تقنعينها (يا ماما يالله نطلع الحين نروح نشوف الكرتون وبنرجع عقب شوي وبنشوف اذا بتسوين شي عشان اعطيج الحلاوة اللي تبينها) .. واذا تمت تصيح طنشيها ولا تردين عليها لأنج خلاص فهمتيها وسويتي اللي عليج .. بس خلج ماسكة أعصابج على الآخر.

    واذا صممت تعسكر في الحمام وانتي وراج شي خلي حد يمسك المهمة بدالج وعقب ارجعي شوفيها شو سوت .. أما اذا ما كان عندج حد فانتي مضطرة تتحملين الوضع شوي وان شاء الله لج الأجر على الصبر وطول البال .. وبإذن الله الأمور بتتعدل .... بس ما ادري احس مب زين انج تجبرينها تطلع من الحمام يوم هي تكون تبا تتم.

    وعلى كل حال هذا رايي في شي انا ما جربته .... فأتمنى اذا حد مر بنفس هالظرف يفيدنا أكثر.

    بالنسبة للحمام الافرنجي جربي تخلينها تشوفج وانتي يالسة عليه وراويها كيف تستخدمينه ... تعرفين الدرس العملي له تأثير أكبر على الطفل في حال ما نفع النظري وياه.

    وعلى فكرة البوسة وصلت لولدي :wink:
  3. أم الهتون
    الله يهديج ما ينفع تقولين مالي خلق ومالي نفس طويل .. لأنه بدون الصبر وطول البال ما بتقدرين تعلمينها بالأسلوب الصحيح وبالتالي بتاخذ وقت أطول لين تتعلم. بعدين الأطفال في كل شي يخصهم يحتاجون وقت .. هي حليلها مب مولودة بالفطرة تعرف كيف تستخد…
    ام الهتون ..
    يعطيك العافيه بصراحه كلامك عيين العقل ..
    اليوم شلت الحفاظ عنها طووول اليوم وكل شوي اسألها اذا تبغا الحمام او لا ..
    وبالفعل غيرت انواع المكافأت جبت لها الوان وكراسه لانها تعشق الرسم وجبت لها انواع السي دي اللي تحبها مثل بارني وصرت اكافئها
    اليوم سوت البوبو ( الكاكا )في ملابسها مرتين :( وماهاوشتها ابد حاولت امسك نفسي
    وان شااء الله راح احط الابديت هنا ومشكوره على هالموضوع ...
  4. @am_alhton_1

    صاحبة الموضوع
    ربيع القلوب؛
    اشكر اختي ام الهتون..على الموضوع الجميل لكي نفيد ونستفيد من تجارب الاخوات عندي سوال متى الطفل يبداء يقول ابي الحمام او بي بول وجزاكم الله خير وجعل الجنه مثونا ومثواكم
    يوم يقدر يتحكم في عمره حبيبتي.

    وهذا شي مب متشابه عند كل الأطفال .. يعني مب كل الأطفال يقولون انهم يبون الحمام في نفس الوقت.

    مثلاً في ياهل يقولها عقب اسبوعين من التعليم وفي ياهل ممكن يقولها عقب شهر .. يعني على حسب طبيعية كل طفل.

    وترا الذكاء ماله علاقة بالموضوع .. يعني اللي يقول انه يبا الحمام عقب اسبوعين مب معناه انه احسن او اذكى عن اللي يقول عقب شهر .. لكنها فروقات طبيعية بين الأطفال وكل طفل حسب استعداده وتطور قدرته على التحكم في نفسه.
  5. @am_alhton_1

    صاحبة الموضوع
    سموّره الأموّره
    ام الهتون .. يعطيك العافيه بصراحه كلامك عيين العقل .. اليوم شلت الحفاظ عنها طووول اليوم وكل شوي اسألها اذا تبغا الحمام او لا .. وبالفعل غيرت انواع المكافأت جبت لها الوان وكراسه لانها تعشق الرسم وجبت لها انواع السي دي اللي تحبها مثل بارني …
    يا عيني على الناس الكوووول اللي حاطين اعصابهم في الثلاجة :biggthump

    بارك الله فيج وفي بنتج .. وصدقيني على قد ما بتغتاظين الحين على قد ما بترتاحين في وقت أقصر ان شاء الله.

    الحين .. امنعي عنها كراسة الرسم والألوان وفهميها (ما في رسم وألوان الا يوم تسوين الكاكا في الحمام) .. وحتى لو سوت الكاكا والبول في ثيابها طول اليوم (الله لا يقول بس هذا احتمال وارد يعني لا تتفاجئين) فلا تعطينها الكراسة ابدا الا عقب ما تسويها في الحمام.

    اذكر ولدي في بداياته سوا الكاكا مرة في ثيابه .. فبمنهى الهدوء وديته الحمام وغسلته وبدلت ثيابه وقلت له (ما في سيارة لانك سويت الكاكا في ثيابك .. وما بتلعب بالسيارة الا عقب ما تسوي الكاكا في الحمام) .. طبعا كلمته بهدوء لكن بحزم وبنبرة صوت زعلانة.

    وحطيت السيارة فوق الطاولة .. وحذرته يقرب منها .. وفديته تم طول اليوم يحوم حواليها مب قادر يمسكها وكل شوي اذكره (بتاخذها يوم تسوي الكاكا في الحمام) ..... وتم على هالحالة لين اليوم الثاني .. واول ما سواها في الحمام قال لي وهو بعده على المرحاض (ماما ابا وي وي) (يسمي سيارة الشرطة مالته وي وي :rolleyes:) .. وفعلاً سرت يبتها وعطيته اياها وهو بعده في الحمام :rolleyes:


    وبالمناسبة .. في هالمرحلة لا تكتفين بانج تسألين بنتج بس .. وديها الحمام كل نص ساعة مثلاً حتى لو قالت لج انها ما تبا تسوي شي .. وعقب كم يوم وديها الحمام عقب ساعة وبعدين عقب ساعة ونص .. مع تكرار دخولها الحمام بتفهم الموضوع أكثر ومع الممارسة المستمرة طول اليوم بتتأقلم أكثر وبتتعلم أسرع ان شاء الله.

تابعي تجارب أخرى من هذا القسم.