بعد كذا جت الدكتوره الثانيه وسلمت وحاولت تطمني بس لما جت تسوي الكشف آلمتني شوي خاصه اني كنت شاده شوي من الحياء فشكلها تضايقت مني وماعاد صارت ترد علي ولا تجاوبني اذا كلمتها
كاني ناقصه :icon33: بس اقول لعلها خيره
بدا الالم يزيد شوي شوي وكنت كلما تجي الطلقه انسى كل الكلام والادعيه الي حافظتهم من سنين وبس الهى في نفسي
واذا قدرت رددت : لا اله الا الله
واحاول اني مااصرخ والتزم بنصايح البنات وبس اضغط على نفسي واردد هالكلمه واشوف السستر تطالعني وتعرف اني اتألم اذا قعدت اردد هالكلمه وكأنها مستغربه من هالكلمه قلت لها لما هدت الطلقه: انتي ليه مافيه اقرا كتب عن الاسلام والاسلام كويس قالت انا بافكر في الموضوع ولما شافتني اقول كذا توقعت اني بتعجبني فكره كتيب الادعيه
كان نفسي بكتيب الادعيه بس انا قلت لكم انهم خذوا كل اغراضي وماخلوا معي شئ فقالت لي الممرضه تبين اعطيك كتاب وطلعت لي كتاب الافاده فيما جاء في ورد الولاده
ولما شفته كاني مبشره اخذته منها وقعدت اقرأ فيه وادعي وادعي لي ولوالديني ولزوجي ومن وصاني والمسلمين اجمعين
بس لما تجي الطلقه اتركه ومااقدر الا على لا اله الا الله
كانت السستر تطلب مني ارقد على جنبي وكان هالشئ يألم ظهري وكنت اقولها خليني ارقد على ظهري كانت تسمح لي بعض المرات بس لما زاد الطلق رفضت وخلتني بس على جنب ,, مادري وش الحكمه
في الغرفه الثانيه سمعت صوت وحده تولد وحزنت عليها ودعيت لها والحمد لله كلها شويتين وتخلصت وماعاد سمعت لها صوت قلت يارب متى اتخلص انا بعد يارب سهل
بعد شوي تذكرت اني ماصليت العصر وكان باقي شوي ويأذن المغرب
قلت ياخزياه قاعده ادعي وانا ماصليت بس ماكنت على طهاره بعد عينه البول وماكنت اقدر اتحرك من ع السرير خصوصا لما تجيني نوبه الطلق
فقلت في نفسي فاتقوا الله مااستطعتم وسألت الممرضه عن القبله وبما انها مو مسلمه ماعرفت وراحت تسأل لي وخبرتني وكبرت اصلي بعيوني واحاول اقاوم الالم واركز في صلاتي والحمد لله تممتها بس لما دخل وقت المغرب وحاولت اصلي كنت ادوخ ومااعتقد اني كملت صلاتي
الله يتوب علينا ويرحم ضعفنا
بعد كذا قالت لي الممرضه انه بيمر بعد شوي الاستشاري و تغطي بطرحتك قلت لها لا مااابي رجال يدخل قالت مافيه بس هو سوي كلام
مافيه سوي شئ قلت متاكده قالت ايوه قلت اوكي
وفعلا تغطيت ودخل الدكتور واخذ يقرا ملفي و يسألني اذا كنت فاطره او لا وخبرته اني اكلت تمر ع الساعه احدعشر بس شكل ماكان فيني طاقه لاني كنت تعبانه من قبل بالكحه والبلغم وضيق النفس وكان هالشئ يعيق قوه الطلق فطلب من الممرضه انه تشبك لي جلوكوز اعتقد - في الغذايه عشان يعطيني طاقه اكبر
وسألني معلومات عامه و طلع
وبعدها جت ممرضه ثانيه وبرضوا مو مسلمه بس كانت متزوجه وعندها خلفيه وحزم اكثر من الاولى ,, كانوا يسولفون ويضحكون على راسي
وانا مو في حالهم والوقت يمر علي ضيق
ولما حمى الطلق شوي وبما ان النفس عندي ضيق كنت ادفع غصب عني على تحت فكانت الممرضه تنفخ علي وتقول لا يامدام مافيه ادفع بس خذي نفس :mad:
كان الشغله بيدي بس غصب عني من الالم ادفع :44:
ولما كنت احاول اتصبر واخذ نفس من الكمامه اللي يعطوني اياها
ماكانت تسوي لي شئ بس اوخرها احسها تسكر نفسي زياده
فكانت تقول لي لاااااا يامدام لااااااااا بعدين بيبي يصير راسه طويل
مايصلح كذا وبعدين معااااااااااااك :mad:
ياربي
بعدها قالت لي شوفي يامدام انا باسوي لك قسطره اوكي
ولاني قريت قصة ولاده ام اشواق الله يعطيها العافيه وانه الافضل انه الوحده ماترفض لما يقترحون عليها القسطره قلت لها اوكي يالله قسطره
حاولت اقنع نفسي ان الشغله سهله ومافيه الم والحمد لله تمت الشغله على خير
وبعدها راحت الممرضه وحطت في المغذي طلق صناعي بدون مااعرف
يمكن لان طلقي بارد ونفسي ماكان يساعدني وخافوا على نبض الجنين
ومن بعدها بدا الشغل :09: لدرجه ماعاد قدرت اقول شئ بس احاول اني ماااااصرخ ,, وبس اتلوى من داخل واحس الطاقه اللي فيني ضعفت ونفسي ضاق وحسيت اني خلاص باودع الدنيا ,,, وبعدها قاست الدكتوره عنق الرحم وطلع تسعه سانتي وبعدها بشوي فتحوا كشك الولاده اللي بالسرير ولبسوا رجولي غطا
كنت طالبه من زوجي يحللني ويدعي لي
حسيت اني في عالم ثاني مابين الحياه والموت كاني في حفره مظلمه وفيها فتحتين فتحه اشوف فيها الممرضات والدكتوره حولي وكلمه ادفعي يالله ادفعي
وفتحه ثانيه فيها ارواح الاموات واحس روحي مابين هالفتحتين ساعه تقرب من الفتحه الاولى وساعه تقرب من الفتحه الثانيه
وكنت اذا استوعبت كلمه ادفعي حاولت اضغط على نفسي وابذل جهد اكثر
كان التشجيع يحفزني لما يقولون لي شطوره يالله ادفعي ايوه ايوه ايوه
كاني طفله صغيره يأثر فيها مثل هالكلام .. بس من جد الاخلاق والنفسيه الحلوه تأثر على الانسان
طلبت مني الدكتوره اني اكتم صوتي بدل التأوه واستغله في الدفع واضغط جسمي على تحت حتى اساعد نفسي واتخلص
كنت ا حاول اسوي مثل ماتقول بس في الاخير سوو لي توسيع وطلعوا الجنين وكنت اطالعه واقول اكيد ميت:44:
بس وقتها ماكان هامني ,, واقول في نفسي الله يعوضني خير ,, بس كنت مشغوله بوضعي اكثر من اني احزن على فقده
’’ حسيت شئ ثقيل راح من جسمي
وشوي سمعت صوت صياح ولدي الحمد لله يارب طلع مامات صاارت السستر توريني اياه تقول شوفي ياماما ولد
وانا بنفسي طيب خلاص بس روحوا الحين عن وجهي انا مو في حالكم :09:
وبعدها صاروا يخضون بطني شوي وطلعوا منه المشيمه والحوسه
الحمد لله موضوعها تم بسرعه كنت شايله هم هالشغله
قلت ان شاء الله خلاااص انتهى الوضع
لكن الشئ اللي ماحسبت حسابه هو الخياط
:09:
دقوني ثلاث ابر بنج موضعي عشان يتم موضوع الخياطه ومع ذلك كنت شاده واتألم وكل شوي استفسر خلاااااااااااص تكفون خلااااص
وهم يردون دقيقه يامدام صبر يامدام ارخي نفسك يامدام
حسيت الوقت مر علي فيها طووويل وكانت شغلتها ذاك الوقت وحتى فيما بعد شغله ماحسبت حسابها بس يارب لك الحمد العافيه شوي شوي
موضوع الكحه ماصار مناسب مع وجود الخياط فالجروح تأخرت ماتبرى
وبصراحه شايله هم ان الموضوع ما تضبط تمام بس الله يستر
وياليت اللي عندها نصيحه في هالموضوع ماتبخل فيها علي
طلبوا من ارضع الطفل وحطوه علي بس ماارضعته الا شوي لاني كنت تعبانه :09:
انتهى الموضوع الولاده تقريبا على الساعه ثمانيه بالليل وبعدها خبروا زوجي واهلي وماطلعت من غرفه الولاده الا الساعه احدعشر بالليل تقريبا بس ماسمحوا لزوجي ولا لاهلي بالدخول هذاك اليوم الا امي بعد الطلب والاستعطاف عشر دقايق شافتني وتطمنت علي
وقعدت باقي الوقت ماجاني نوم احس اني انولدت من جديد وبس احمد ربي واشكره وادعي لوالديني بالرحمه والمغفره
اللهم اغفر لي ولوالدي وارحمهما كما ربياني صغيرا
هذا والحمد لله رب العالمين
اتمنى انكم تستفيدون من القصه
ابشركم .......... القادم وصل..... بفضل الله
متابعة النقاش، صفحة 15