الله يجزاكم الجنه من غير حساب ابي طريقه الالزانيا باللحم

اهلييييييييين اخواتي طلبي واضح من العنوان ولكم مني جزيل الشكر

3 تعليق 702 مشاهدة

شاركي في النقاش

سجلي الدخول لإضافة تعليق.

التعليقات

2
  1. @anany

    مرحبا
    سألتي عن اكثر شي اعرف اسويه في حياتي
    ولو ان المنتدى متروس صراحة لزانيا وكل طريقة احلى من الثانية بنات المنتدى فنانات ماشاءالله عليهم
    بس انا بعطيج طريقتي
    انا احب اللازانيا تكون مفيوحة قبل لا اصفها بالبايركس في ناس عادي بس انا احبها مفيوحه
    بعد ماتفوحين اللازانيا وتخلصين الحين نجي حق الحمسة
    انا اخذ اللحم والبصل والثوم احطهم مع بعض وفي نفس الوقت
    واذا حسيت ان اللحم زفر عصرت عليه ليمونه
    لما يتغير لون اللحم احط فلفل اخضر و اذا تحبين طماط طري و اهم شي البقدونس
    لما يذبلون تحطين البهارات انا احط فلفل اسود كركم و خلطة بهارات الدجاج وانتي تحطين اللي تحبين ماجي سويا سوس على راحتج بس انا هذا اللي احطه
    بعطين اجيب طماط معجون و احطه على الحمسة وهم الكمية على ذوقج تحبين الحمسة حمرا حيل ولا لا
    عقب الطماط معجون احط الملح و بعدين ما اخليها تنشف اخليها رطبة شوية واذا انشفت اضيف شوية ماي عليها
    خلصنا من الحمسة نجي الحين للبشاميل
    انا احط شوية دهن تقريبا ملعقة و احط 4 ملاعق طحين و ابدا اخلطهم قبل لا احطة على النار اذا تكتل الطحين احط عليه شويه حليب لين يمتزج الخليط ويصير مثل الكريمة
    هني احط الخليط على النار واضيف عليه لتر حليب ( كل ملعقة طحين عليها ربع لتر حليب )
    و ابدأ احرك الى ان يبدأ يثخن
    لما يثخن احط شوية ملح وفلفل اسود وشوية جبن موزرلا
    و اظل احرك الى ان يصير قوامه حلو لا اللي ثقيل ولا ماي مايو

    نبدأ عملية الصف
    في بايركس احط اللزانيا ثم حمسة اللحم بعدين زيتون اسود و مشروم وفلفل اخضر واللي تحبين
    بعدين تحطين البشاميل بعدين سوس اللازانيا وانا اشتريه جاهز من الجمعيات في بنكهة الجبن في مع مشروم في مع بصل وفي بالخضار المشكله وكلهم حلوين احيانا اشتر ي كل الانواع و احط من كل نو ع شوي عقبها احط جبن الموزرلا ثم ابلش طبقه جديده لزانيا لحم زيتون بشاميل و السوس
    وانتي براحتج انا اسوي بس طبقتين ودايما اخلي الجبن بين الطبقات علشان اذا حطيته على الوجه يحترق
    اختم الطبقه الثانية باللازانيا والبشاميل والسوس
    و دخلها الفرن على حرارة 350 لمده ساعه الا ربع الى ساعه
    انا احب اكلها مع الكتشب والحمص ههههههههه غريبه بس الناس اذواق
    اتمنى انها تعجبج دايما لما اسويها الكل يسالني عن الطريقه وصرت مشهورة فيها واي سؤال انا حاضر

    و بالعافية

    تحياتي

تابعي تجارب أخرى من هذا القسم.