بسم الله
السلام عليكم
كيفكم يا بنات
ابي ادخل بالموضوع على طول ,, دخلت كذا موضوع هنا بالقسم وتكون البنت منزلة مشكلتها مع زوجها او اهل زوجها وتطلب منكم المساعدة والمشورة,,, على طوووووول بعض الاخوات الله يصلحهن تكون ردودهن الطلاق
تطلقي وارتاحي وربي بيرزقك بلي احسن منه << وش دراكم ؟؟!!!!
وش تبين فيه وهو ما يستاهل اللي يبيعك بيعه وهذا باايع اصلن << اذا بايع ليه تزوجها ؟؟؟
دام ما عندك اطفال منه اتركيه وربي بيعوضك بلي احسن منه <<< وش هالمنطق ؟؟!!!!!!!
انا لو منك ما اقعد عنده دقيقة وحدة وش يصبرني على واحد مثله <<<< هذا لانك مو بالمشكلة قلتي كذا وما تدرين عن اللي بالقلوب !!!
وبعدين طيب؟؟؟ وش اخرت هالردود ؟؟!!
مدري كيف تتحملون مسؤولية هالحل اللي انتم شرتو فيه؟؟؟؟؟؟!!!
الطلاق مو هين افهموني وربي مو هيييين الطلاق امر عظيم
(( ابغض الحلال عند الله الطلاق )) <<< كيف يجيكم قلب تعطون البنت حل الطلاق
انا اعرف بنات صارت لهم مشاكل مع ازواجهم وبنفسهم راحو المحاكم وطلبو الطلاق في منهم ما انحكم لهم الطلاق وارفعو استئناف الييين صار الطلاق وبعد ما صار اللي تبيه ,,, قعدت تتحسر وتتندم وليت اللي جرى ما كان ,,, طيب وش اللي حادك ؟؟!! تدرون وش ردت تقول ؟
ياليت ما سمعت كلام صديقتي فلانة .. ويا ليت ما سمحت لفلانة تدخل بحياتي وقراراتي وياليت وياليت ...!!!!!!!!!
هو حل للمشاكل لكن المفروض يكون اخرررر الحلول
تدرون وش عيبنا في هالزمن ؟
ما عندنا صبر بتقولون لا في وحريم صابرين على بلاوي
بقولكم لا .. ولا يمكن نوصل لصبر حريمنا الاول,,
(( وبشر الصابرين )) << مو اي صبر !!!
ما في حياة كاملة ومثالية ولابد من المشاكل بس عيبنا قمنا نستسهل الامور ونقلل من عظمة الطلاق
يا اخواتي اذا عجزتي تردين او تقدمين حل ادعي للبنت بالخيرة الطيبة اعرضي مشكلتها عند ناس ثقة وجيبي الحل لها لكن مو تسعين بالفرااق بينها وبين زوجها << وشلون يجيني نوم وانا سعيت بالفراق بين زوجين ؟؟؟؟؟؟؟؟؟؟؟؟؟؟؟
اذا هي مقتنعة 100% وتشوف انه زوجها ما ينعاش معه صدقيني ما بتجي وبتقول ابي مساعدة بتطلب الطلاق من نفسها,, دامها مترددة وجت ونزلت موضوع معناتها انها في حيرة
وبعدين وش دراكم بنفسية البنت لما نزلت الموضوع؟؟؟ ساعات احنا كذا نبي نفضفض ونبي اللي يسمعنا ويعطينا النصح لانه نفسيتنا تكون تعبانة وعاجزين عن التفكير,,
في اخوات ما شاء الله عليهم يردون بالدعاء ويكتفون برفع الموضوع,, وفي اللي يقدم الحلول اللي بعيدة عن الطلاق
اذا جاء الطلاق من نفسها ايه هي تتحمل مسؤولية قرارها لكن مو تكونين سبب فيه
شوفي هذي القصة
يحكى بان ابنة رجل حكيم اختلفت مع زوجها وحضرت الى منزل ابيها فسألها عن سبب مجيئها فاخبرته بانها اختلفت مع زوجها وانها تريد الطلاق منه
فقال لها بكل بساطه خلاص اجلسى يا بنتى ولتكن مشيئة الله
ثم ذهب الى الخلا وهو يحمل ابريقه المصنوع من الفخار وبعد فترة من الزمن عاد وهو يبكى بشده
فقالت له ابنته لماذا تبكى يا ابى فقال لها يابنتى ان ابريقى قد انكسر فقالت له ياابى ان الابريق لايساوى شيئا ويمكنك ان تشترى ابريقا جديدا فقال لها يا بنتى ان ابريقى رأى عورتى ورأيت عورته فكيف يهون على ان ابدله..... ففهمت ابنة الرجل قصد والدها ورجعت الى زوجها
يا بنات خلونا نكون محضر خير بموضوع كل بنت جت ووثقت بردودنا ,, لازم نحاسب لكل كلمة نكتبها ولا نفرح الشيطان
وشلون ترضين تكونين عون للشيطان ؟؟؟؟؟؟؟
التفريق بين زوجين من الكبائر الموبقة ..وهي من احب الاعمال الى ابليس
عن جابر بن عبد الله قال: قال رسول الله صلى الله عليه وسلم: "إن إبليس يضع عرشه على الماء، ثم يبعث سراياه، فأدناهم منه منـزلة أعظمهم فتنة، يجيء أحدهم فيقول: فعلت كذا وكذا، فيقول: ما صنعت شيئًا، قال: ثم يجيء أحدهم فيقول: ما تركته حتى فرقت بينه وبين امرأته، قال: فيدنيه منه، ويقول: نعم أنت".
ما في مشكلة الا ولها حل,, وكل رجال له مفتاح وكل زوجة لازم تكون عارفة وش مفتاح زوجها وانا على ثقة انه كل زوجة قادرة انها تكسب زوجها بكل الطرق المشروعة,, يبيلها شوية ذكاء وصبر وتاني << لاتنسون ذكاء وصبر وتأني
وقبل كل هذا لا تنسون الحي القيوم احتسبو الاجر وربنا ما يضيع اجر احد وكل شي له حكمة بهالحياة سواء الزواج من هالشخص او الطلاق منه
ما ابي اطول عليكم بس وربي يضيق صدري لا دخلت موضوع ولقيت البنات ينصحونها بالطلاق
استودعتكم الله
شاركي في النقاش
سجلي الدخول لإضافة تعليق.
التعليقات
17- بارك الله فيك
وغفر لك ولوالديك
والله يعطيك العافيه على هالتنبيه
الله يحرم يدن نغزت في هالكي بورد من النااار - اول شي
ابغض الحلال الطلاق هدا حديث ضعيف والله ما يحل شي ويبغضة
ثاني شي
لو كان سيئ الزوج سكير ولاشكاك
على شو تصبر
لمتى وحنا نشجعها الضعف والخنع
المؤمن القوي احب الى الله من الضعيف
مثل ماهو لة حقوق هي بعد لها حقوق
يطالب بحقوقه تكون كاملة وهي مالها حقوق
لمتى وحنا نحمل المرأة فوق طاقتها
ليش ماتخد حقها كامل كان ماسمعنا المشاكل الي هنا
كان حسب لها الف حساب
بدل مانقول لها اصبري نقول لها تعلمي خوذي حقوقك كاملة
- الله يعطيك على قد نيتك ان شاء الله ويجزاك على كل حرف كتبتة الف خير
والطلاق ماحل وشرع الا لانة احيانا يكون الحل ...ولاكنة ليس كل الحلول ..
وفعلا مثل ماذكرتي احيانا الوحدة تكتب وهي مخنوقة فطلع كل اللي بقلبها من غير ماتنضر للجهة الاخرى للموضوع ..وتكتب راييها من غير ماتكتب رايي الزوج فيتعاطفون معها البنات من غير مايعرفو الجوانب الاخرى للموضوع - انا معك وضدك بعض المشاكل صعب حلها الا بالطلاق كل انسانه ابخص بحالها بس القهر كل القهر ليصار طلاق على شي تافه وبوجود اطفال..مشكوره عالموضوع
- صح لســـــــــانش
مااقدر اعلق على كلامش لانش كفيتي ووفيتي
مواضيع مشابهة
تابعي تجارب أخرى من هذا القسم.