بنات قطر طلب من فضلكم

اختي اذا انتي تعرفين قطر عدل بقولج على شوارع فيها اهم المحلات وفي غيرها لكن انا ما مريت عليها ممكن الخوات يقولون لج

شارع سلوى بداية من العزيزية الى دوار المدماك وانتي ياية من الغرب رايحه شرق كل المحلات او معظمها على اليمين تلاقينها ممتازة للمطابخ سواء المنيوم او المانية عالمية غاليه او عادية ومستلزمات المطابخ وافرانها وحتى اطباق البوفيه في الحلبي ومحل انصار ستي متنوع واسعاره رخيصة جدا مقارنة بالي حواليه....اذا وصلتي دوار المدماك ورجعتي للشارع من الشرق الى الغرب مره ثانية على يمينج تلاقين محلات السيراميك والاضاءات ووغيرها..

شارع المطار متروس محلات مطابخ وسيراميك مثل كافود المطابخ الأمريكية نابينا ارام سيراميك له فرعين في المطار وشارع سلوى ....الدرويش انتقل الى المطار بعد ما كان عند دوار مدماك في شارع سلوى ..



شارع نجمه تتراوح المستلزمات بين الجيد والرديء لكن الحين المحلات العالمية اتجهت الى هالشارع لكونه تجاري ومهم في نفس الوقت تلاقين فيه سيراميك البشري اللي له فرع في شارع سلوى ..

شارع المرخية فيه محلين مهمين - بالميرا لمستلزمات الفنادق والمطابخ وحذاه بعد محل بنفس الأغراض لكنه يتبع الركن الفرنسي لأنه مديرهم واحد بتلاقين فيه اغراض مفيده جدا للبيت وضرورية مثل الله يعزل حامل سلندرات الغاز ( ترولي ) وزبالة البلدية الخضرا الترولي ادوات خبز الكيكات والبوفيهات ....الخ

الاضاءات في شارع مشيرب ابتداءا من دوار البنك العربي سابقا ( سوق واقف ) الى جمبو للإلكترونيات ومرورا بفندق سوفتيل تلاقين محلات الكهرباء والاضاءة جنب وحول وخلف المنطقة بكبرها ..

المانع للأدوات الكهربائية شارع سلوى ( افران فريزرات - ثلاجات - غسالات واير بول 15 كيلو- ميكروويف ....الخ )- سامسونغ للتكييف وهاير في شارع السد للتكييف لكنه رديء شوي

التلفزيونات وخلافه ال جي شارع مشيرب وافرع ال جي - سوني البيت الحديث جنب مكتبة جرير

وفي بعد في شارع الريان بجنب صيدلية الريم جنب مطعم الحمراء مادري شسمه بالضبط..


الستاير اختي عندج شارع سلوى بالنسبة للراقي والكنترول والغالي ...الجيد والغالي بعد في شارع الأصمخ لكن ابتعدي عن محل اسمه ( الأصدقاء ) من تجربتي الخاصة المريرة ..

وفي نفس الشارع تلاقين سجاد راقي وعادي وموكيت وكله ...وتلاقين بجنب سوق واقف ونتي طالعه من المواقف ورايحه كانج تبين سوق البزار والعطارين تلاقين محلات سجاد متنووعه

واذا تذكرت شي بعد بقولج ^__________^!

السلام عليكم ياحلوه

باسوي لج اقتباس وبارد عليج

الاضاءه جوفي انصار ستي في شارع سلوى عندهم اشياء حلوه ..وحتى السيراميك عندهم حلو