عسى الله يوفقها اللي بتريحني من شعري

السلام عليكم ورحمة الله وبركااته
عنوان الموضوع يخوف .. تريحني من شعري =) يعني تنتفه ... خخخخخخخخخ
خل اخبركن مشكلتي وان شاء الله بلاقي الحل وياكن..
مشكلتي بشعري .. كان حلو وانا صغيره وبصراحه للحين احبه بس شعري من قدام ( الامام القصه) احسه مره ناشف
هذه طبيعته لان اختي الكبيره نفس الشي فقلت وراثه ولا حول ولاقوه الا بالله
ومن ورا طبيعته متموج بس موجاته تمسكينها ناعمه وتشوفينها كنها مب حلوة
ملمسه حلو بس شكله يضايقني ..
ما اقدر افرده لاني جربت هالشي يوم كنت صغيره ومانفع لان شعري بطبيعته ناعم الملمس يعني طبيعة الشعره ناعمه بس تلتف وتتموج..
بالصيف اعاني الامرين منه
انا استعمل فيه زيوت كل فترة وفترة خصوصا زيت الزيتون وحمامات بعد الاستحمام
ولحظه ما اسشوره يطلع روعه بس من يشم ريحة الرطوبه وما ادراكم ما الرطوبه ينسى شي اسمه نعومه وجمال
اتعذب وياه واااايد ما اقدر اتحكم فيه ..
طبعا غير تعليقات اخواني اللي ماعندهم تعليق غير شعر المزاجيه وهذا شي يخليني انقهر بس اكتمه بخاطري..
كل شوي اسشور لين زهقت وقصيته والحين قصير للرقبه بس بعد المشكله قائمه انه يتموج ويتشعث بالصيف والرطوبه :( وحلي الوحيد اني اسشوره وازيته على طول بزيت الزيتون تخيلي) ؟؟؟!!!
اسشور واخرتها ادهنه يعني ما الحق اتهنى اشوفه ناعم :(
دخيل الله ساعدوني لاني تعبت والله من هالشي
وما احب استخدم له فرد وما ادري شو .. ومن فترة افكر اسوي له جل بس خايفه يتساقط ..
ساعدوني وعسى الله يهون عليكم وبادعي لها من قلبي اللي بحصل بايدها الحل وان شاء الله بادعي للكل والله يسهل امري وامركم ..

10 تعليق 1,065 مشاهدة

شاركي في النقاش

سجلي الدخول لإضافة تعليق.

التعليقات

9
  1. @rym_alryad

    فيه فرد اللي مخصص لالااطفال جربيه ممكن يفيدك انتي تشارينه من المحلات وتسويه لنفسك بالبيت
  2. @gl_okhl

    استعملي شامبو وبلسم من ماركه غارنيه روعه وخذي اللي يناسب شعرك

    فيه للشعر التالف والشعر المجعد والشعر العادي

    وبعد الاستحمام حطي سيروم للشعر

    وانا الحين استعمل زيت الخردل فيه بنات مدحوه للنعومه وان شاء الله يفيد

    اما زيت الزيتون فهو ما يناسب كل الشعر

    بعض البنات يحرق الشعر
  3. @ana_ho_ana

    يا قلبي رحمتك >>> عاطفتها جياشة

    اذا تروشتي حطي فاشكول او فاتكا ع شعرك حول النص ساعة بعدين غسليه بالماء فقط واذا حبيتي تستشورين حطي سيريوم والله يعينك ويوفقك
  4. صاحبة الموضوع
    يزاكم الله خير ياللي رديتوا واللي شفتوا الموضوع << عشان لحد يقول ما دعيت له
    ريم مشكوره حبيبتي بس ما احب اسوي فرد بشعري احسه انعم من اني اسوي له هالسوايا الشينه ههههههههههه
    جل وخل وين الاقي هالماركه ؟ بلاقيها بالمحلات الكبيره يعني شرات باريس غالاري والا وين ؟ وعطيني الاسم بالعنقليزي الله يخليج وانا بطير ادوره وخبريني شو فايدتهم عشان تقولين روعه
    وبخصوص السيريوم كرهته لانه يزيد الطين بله عندي يعني مامنه فايده ..
    أنا هو انا يزاج الله خير حبيبتي انا استخدم فاشكول زيت الزيتون وفاشكول الثوم كل مره واحد فيهم وبصراحه روعه ونفس الطريقه اللي قلتي عليها بس نفس الحاله شعري يستمتع بالرطوبه ويعيش حياته بشده ويعذبني ..
    بانتظر رد جل وخل ويزاكم الله خير وبطير افتش لي على حل بين مشاركات البنات .. ودمتم

تابعي تجارب أخرى من هذا القسم.