يا قلبي عليكي
الله يشفيلك ولدك
انا لو احكيلك حكايتي تبكي اكتر واكتر بس الحمد لله اني بدات اشوف نتيجه جهدي وصبري
انا يا قلبي جبت ولدي الله يشفيه وانا عمري 18 سنه ولما كنت حامل في الشهر التامن قالولي ولدك معااااق ولازم تروحي مستشفى الولاده لانه عندنا مافي حضانه
وبكل بروود قالوها تخيلي وانا حامل صدمه
وهناك في الولاده يفترض انه ولادتي تكون قيصريه لانه حجم الراس كبير وما عندك احد غصبا عني لازم اولد طبيعي ولما كنت ابكي واقول انا خايفه على ولدي كان الرد انه الولد ميت ميت وليش تسوي عمليه وتفضل وصمة عار في بطنك طول عمرك
والله والله انه الكلام دا بالنص اللي سار
المهم بعد جهد وجهيد ولدت بعد ما اتمزقت من كل مكان جاني شرخ في الشرج وسقوط في الرحم
ولما ولدت الولد شالوه من بين رجولي والله وعلى طول مسكوه من الضهر وقالولي شوفي ولدك ضهره مفتوق عشان لاتيجي تقولي مو ولدي واتفاجئوا انه قلت الحمد لله اعرف
وبعد ولادتي جلست اقل من 10 ساعات في المستشفى وعلى طول قالوا لازم تخرجي وجلس الولد في الحضانه بدون اهتمام وكنت اروح ارضعه وبعد اسبوع في الحضانه اتخيلي الولد فتحه على الحبل الشوكي واي بكتيريا توصل فورا على المخ قالو مبروك الولد خروج وروحوا انتو خدوا موعد في مستشفى تاني للمخ والولد كا يوه ودوه الاي مستوصف يسويله غيار
ولما رحت الرياض الدكتور اللي هناك كان في ذهول انه الولد خرج من المستشفى بدا الوضع
المهم وسوينا عمليات وعمليات وعمليات ولما جيت المدينه اخدته لدكتور وبكل بساطه قال
انا اقطع يدي لو الولد رجوله نمت وكبرت لا الرجول تضمر وما منها فايده
المهم ولدي ربنا يسرله الدعاء والحمدلله انه ما اهملنا وواضبنا على العلاج الطبيعي والمراجعات والعمليات وما خلينا حتى برهه رحنا بس اللي هنا هناك
ودحين ياا طويلة العمر ولدي عمره 8 سنوات والحمدلله بيمشي بعكازات ونجح من سنه تانيه وطالع سنه تالته في مدرسه عاديه بس انا حبيت اني ادخله مدرسه اهليه عشان يكون هناك اهتمام وعدد الطلاب اقل
ومخه سليم ميه بالميه الحمدلله
ووالله اني لما كنت في المانيا الدكاتره كانوا معجبين بالنتيجه اللي وصلنالها وانه الاهتمام سوا نتيجه ممتازه
ايش رايك
صح تعبت وربنا يعلم انا جلست قد ايش شبه معتزله الخروجات لانه كنت ابغا اعطيه اكبر قدر من وقتي واهتمامي
صحيح اني جلست خمسه سنوات خايفه من فكرة الحمل
بس الحمدلله جبت اخ له وسليم الحمدلله
حاسه بكل كلمه قلتيها
حاسه بكمية الالم اللي انتي حاسه فيه لما تخرجي وتشوفي الاطفال يلعبوا وولدك ما يلعب
لما تروحي مكان وتلاقي كل النظرات مثبته على ولدك كانه مخلوق غريب جاي من المريخ
لما ولدك يقوللك ليش انا ماقدر العب زيهم
لما ولدك يسالك انا ليش كده
لما يسالك ليش انا لابس حفاضه وفلان وفلان مولابسين
لما يتالم وما تقدري تسويله شي يخفف عنه
لما تمشي وتدعسي على يده بدون ما تدري لانه حايس بيت رجولك
يالله لو اقوللك كيف كانت حالتي النفسيه لما بدات في القسطره البوليه كنت في حالة انهيار كنت ما انام ولا اكل ولا ابغا اشوف احد
بس فتره مؤقته والحمدلله اتعودت على الموضوع وكمان الله يكرمك سرت البراز كمان اسويله زي القصطره عشان اريح بطنه لانه ما يقدر يخرجه لحاله
وااه على موضوع الزواج ما خليت احد من الدكاتره ما سالته والاجابه مبهمه
مانعرف الله اعلم
اهم شي انك ما تحسسيه بالنقص
عامليه زي الاطفال الطبيعيين لا تظهريله زيادة اهتمام خليه مدسوس اول شي عشان لا يسير اعتماده عليكي اعتماد كلي وكمان عشان اخوانه ما يتاثروا ويغاروا منه
اشتريله لبس مصلح زيه زي غيره خرجيه زي الاطفال التانيين وديه الملاهي وديه عند الناس لاتحسسيه انه انتي ما تبغي احد يشوفه مع انه فيه ناس تحسسه انه شي غريب ويحس انه مو مرتاح بس مره في مرره يتعود على الوضع وتتربى الثقه الزايده في نفسه
ازا سالك ليش انا كده واكيد حيسالك يوما ما
خيكي صريحه وقولي لانه انتا عندك كده وكده لا تكزبي عيه وقولي انه ربنا يحبك عشان كده خلاك مريض اخد منك مثلا المشي لكن اعطاك مخ كبير احسن من الناس التانيين وكمان ربنا يحبك لانك تقول الحمدلله انه انتا كده وما تزعل عشان كده ربنا حيدخلك الجنه ان شاء الله
اتوقعي اي سؤال يسالك هوا لانه ماشاء الله مخه سليم
بس نصيحه لاتتهاوني في مسالة دراسته ابدا
ومن دحين حاولي انك توسعي مداركه جيبيله العاب ذكاء وعلميه عليها وحاولي تحفظيه قراان حاولي انك تخليه يختلط بالاطفال اللي حواليكم عشان لا يسير انطوائي خليه اجتماعي وفهمي الاطفال اللي حيلعب معاهم وضعه وانه لازم يراعو شعوره وحاولي انك تحببي الاطفال فيه مو تخليهم يشفقوا عليه لا يحبوه جيبيلهم العاب او حلاوه وخليه يعطيهم هيا انها منه
حاولي انك تخليه يحب الكمبيوتر لانه اعتقد انه احسن مجال ممكن يبدعوا فيه الكمبيوتر لانه ما يحتاج منهم لجهد حركي كبير
وقولي الحمدلله انه اعاقته حركيه بس الحمدلله لو كانت الاعاقه عقليه ترا حتنقهري اكتر عليه
واعيد عليكي
العلاج الطبيعي بس واضبي عليه على ايدي متخصصين
وشدي حيلي وسيبي الامور على الله
اي مساعده لا تترددي انك تطلبيها مني انا بالخدمه
كمان انصحك انك تدخلي مواقع المعاقين منها تشوفي اللي زيك ومنها تتعرفي على اخر المستجدات اللي وصلولها في حالة ولدك
والله يعينك ويصبرك
آآآآآه ... ابنك راح يعيش مشلووووول .. كونوا معي وساعدوني
متابعة النقاش، صفحة 10