الفرق بين أيكيا السعودية والكويت وأمريكا

هذا الإيميل عن أيكيا

نقلته لكم كماهو لعل الشركة تحسن من خدماتها وتخفض من أسعارها الخيالية
--------------------------------------------------------
السلام عليكم .. وشلونكم .. انا اليوم متكلف وبكتب لكم موضوع لاني منقهر ومنفقعه مرارتي ..

قبل فترة دخلت موقع ايكيا الأمريكي ، ابتفرج على كتلوج 2009 ،
وعلى الفروع وتوزعم بولايات أمريكا واسعارهم لقيتهم متوزعين فقط بـ 19 ولاية من أصل 52 وهذا يدل على انهم مهنا شعبية ولا قدرة تنافسية
واللي لفت نظري فعلاً وشيء احبه وكنت اتمنى ايكيا يبيعونها من زمان اللي هو الأرضيات الخشب ( الباركيه ) .. شفتها بكتلوج إيكيا فرع امريكا المتر المربع بـ دولار و15 سنت يعني ( 4.31 ريال ) يمكنكم تراجعون الأسعار بالكتلوج الأمريكي عبر الرابط :

http://info.ikea-usa.com/IkeaOptin/OnlineBrochure/

رقم الصفحة 300

وسعر نفس القطعة ( باركيه خشب ) لدى إيكيا السعودية بكتلوجهم صفحة رقم 298 ، المتر الواحد بـ 75 ريال !!!!!!!!!!!!!!!!

يعني الفرق 70.69 ريال بكل متر !!!!!!!!!!!!!!!!!


برضه نفس الموضوع .. الخشب الباركيه شوفوا كتلوج السعودية صفحة رقم 298 تلقون على الزاوية يمين رقم 2
.. ارضيه خشب إسمها سلاتين - سعر المتر 34 ريال وتعتبر مخفضه واقل سعر عندهم ... سعرها بأمريكا المتر المربع 69 سنت يعني ( 2.58 ريال سعودي ) يعني الفرق 31.42 ريال بكل
متر
!!!!!!!!!!!!!!!!!!!!!!!!!!!!!
ليش هالإستغلال ؟

وضمان فرع امريكا 15 سنة ، وضمان السعودية 10 سنوات مع ملاحظة ان جونا يحتاج فترة ضمان اطول !!!



اضيفوا إلى ذلك بطاقة عضوية إيكيا اللي ادعت ايكيا السعودية انها الغيت من ايكيا السويدية مع انها للآن معمول فيها بكل فروع العالم وتمنح خصومات واكواب قهوة مجانية لكل زيارة وتعتبر شيء مشجع للزبون ومخسر بنفس الوقت لإيكيا .. لكنهم الغوها لإنهم مايبون يتخلون عن ارباحهم الخيالية ولإنهم اشتهروا وصار لهم زباين دائمين مهب زي قبل يهشون الذبان حول جامعة الملك سعود محدن حولهم
ايضاً ايكيا الكويت ( مجموعة الحميضي ) يسوون تخفيضات 4 مرات بالسنة وينزلون إعلانات بجرايد الكويت فيها تخفيض حقيقي على بضايع جديدة ماتمت 8 شهور عندهم ، وتخفيضات حقيقية مهب على استوكات قديمة قطنت بالمستودعات زي ايكيا السعودية ، وبرضه فيه عمال من إيكيا موظفينهم مهنتهم يشيلون اغراضك
ويوصلونها لشنطة سيارتك ولا تدفع لهم ولا فلس .. وحنا ينقال لنا شيلوا اثاثكم ودفوه للمحاسبين ومن المحاسبين ودوه لشركة التوصيل والتركيب ، ولكم ان تتخيلون شلون الواحد بيشيل دولاب وزنه فوق الـ 44 كيلو وهذي صارت لي انا شخصياً يامحدثكم ( عبدالعزيز ) كنت رايح الظهر باخذ دولاب شفته بالدور العلوي وكتبت بورقة مكان الدولاب بمستودعهم السفلي بأي ممر وبأي مكان القاه ونزلت واخذت عربية قبل مدخل المخزن ودورت الدولاب وجيت اشيله لقيته ثقيل
وزنه 44 كيلو حسب ماهو مدون ببطاقة المعلومات ورحت ادور احد يساعدني من خدمة العملاء ومالقيت احد وباقي على اذان العصر بس 10
دقايق واضطر اشيله بنفسي وادفه للكاشير اللي مشى حرمه قبلي بس بيني وبينكم تستاهل لإنها خواجه وانا ضروطي
طلع للخارج وبرضه مالقيت ولا عامل يساعدني واروح اجيب سيارتي واشيله بنفسي والنهاية .. ورم اسفل ببطني إستمر حوالي 6 اشهر

المهم نرجع نكمل سوالفنا عن فرع الكويت

تخفيضات الكويت توصل لـ 70 % ، وحنا اذا تكلفوا 35 % وعلى شيء مايسوى وقديم وله سنين متكدس عندهم ، مع العلم ان التركيب والتوصيل بفرع الكويت (( مجاااااني وخلال إسبوع واحد فقط )) .. وحنا ياخذون 15 % على التوصيل والتركيب ( كل شيء
ماعدا المطابخ اللي يلحطون عليها 20 % ) والتوصيل فقط بدون تركيب بياخذون منك ( لا يقل عن 150 ريال ) حتى لو بيتك بالسلي جمبهم الـ 150 ماخذينها ماخذينها ... والله والمواعيد الحين يالله تلقى لك موعد عقب 8 ايام ، وشوفوا شلون اثاث الناس مكوم بالرصيف الخارجي على طبيات خشب ينتظرن دورهن للتركيب مع
شركة
TNT
الخايسين .. وش رايكم ؟؟؟

وزود على هذا وذاك شينة نفس واخلاق العمال السعوديين التكارين اللي اذا ماصرت حرمه مهب معطيك وجه ومهتم فيك ولا باللي تبيه .. زود على ان مكانهم شين وإذا جيت تطلع منهم تصيدك إشارة مخرج 17 اللي كلها تريلات ... ياجماعة الخير وش رايكم نقاطعهم بس

وإلا نرسل لإيكيا السويدية ونشتكي غسان السليمان وتوكيلاته الخايسه ؟؟؟؟؟؟؟؟؟؟؟؟؟؟؟؟

56 تعليق 18,506 مشاهدة

شاركي في النقاش

سجلي الدخول لإضافة تعليق.

التعليقات

55
  1. @um_algamar

    مشكورة حبيبتي على النقل بس المشكلة ان اسعارهم (الغالية مقارنة بباقي الدول ) تعتبر ارخص الاسعار الموجودة عندنا,,, يعني استغلال في استغلال.
  2. @gman_alsmaaa

    صاحبة الموضوع
    اهلين اختي ام القمر


    المشكله ان جودة بضايعهم رديئه يعني ما تستاهل هالاسعار


    اروح ادفع زياده شوي وآخذ قطعه افضل من غيرهم


    لعلمك برا يقولون عنه حق الفقراء لانه رخيص وبدون جوده

    وهنا يضحكون ع الناس ويدبلون اسعاره عشر مرات

    اثاثهم ابدا ما يعجبني تعجبني بس اكسسواراتهم المنزليه او مواعينهم

    غير كذا مستحيل آخذ لان ما عندهم اي فخامه

    كنباتهم صناديق ومغطينها بقماش ويبيعون القطعه ب 6000 ..!!

    لانهم لقوا شعب يستهلك بنهم وبدون تمييز بين الجيد والردئ .
  3. @pumpkin_patch

    مع اني مو من محبي ايكيا بس ايكيا السعودية ارخص بكثيير من اللي في امريكا..وعندهم اشكال مو عندنا بامريكا..يا شخية يكفي انه احنا ندفع ضرايب لا و ازيدك من الشعر بيت حتى الاكياس البلاستيك للي تحطون فيها اغراضكم بعد الشراء ..انت تشريها و تقريبا سعرها 3 ريالات هذا الكيس المتوسط.. ..او تجيبي معك اكياس.. و اذا تنسيتها امرك لله..و ضمانهم مو 15 سنه فيه سنه مجاني..و حابة تزيدين تدفعين..مثلا ضمان 3 سنوات 800 دولار..و انت كلما زدت الضمان تدفعين اكثر..بس الميزة انه لو خربت قطعه على سبيل المثال صوفا و ما كان عندهم مثلها..يحق لك تأخذين صوفا جديدة حتى لو كانت طقم و يأخذون القديم..و يعطونك الجديد..عشان ما يكون شكل الطقم مو متناسق..
  4. @ngd_bnt_almgd

    بصراحه ومع احترامي لكل سعودي وانا اولكم

    احنا شعب غبي مع الاسف مو كلنا بس اغلبيتنا يعني يهمنا الشي الغالي حتى لو كان على ظهرونا

    وحسبي الله ونعم الوكيل اللي ما فيه حمايه لنا احنا يالمستهلكين

    تهون ايكيا عن ناس ثانيه

    الله المستعان

    بصراحه يا قلبي موووضوووعك مررررره يقهررررر والله العظيم
  5. @rroorry

    حسبي الله عليهم
    انا بصراحه بيتي كل اكسسواراته من ايكيا
    اما بالنسبه للاثاث الاساسي مو من عندهم لان اسعارهم نااااار
    لكن اكسسواراتهم ناعمه وكيوت وتعجبني ولو الاقي عند غيرهم ما شريت منهم
    و معظم محلات اكسسوارات البيت دفاشه ودقه قديمه ما فيه غير ايكيا اكسسواراتهم ناعمه وحلوه ومو غاليه زي الاثاث

تابعي تجارب أخرى من هذا القسم.