آآآآآآآآخ ياربي تعــــــبت

السلام عليكم ورحمة الله وبركاته

انا قررت إني ارجع لزوجي عشان أولادي

اللي صار ان زوجي كان يدور سكن عشان نسكن فيه

وقبل شوي اتصل وقالي ,, أنا حصلت بيت بس اتصلت اتفاهم وياج ,,

إذا خذيت البيت إنتي شنو بتدفعين ؟؟

قلت له شنو ادفع ؟؟

أنا ادفع اقساط سيارتي وراتب الشغاله وبس

قالي والصرف والأكل مابتدفعين شي؟

قلت له لا طبعآ ,,

قالي ليش ماتدفعين انتي ماعندج مسؤوليات وراتبج اقوى من راتبي

قلت له ابي اشوف نفسي ,,

قالي إنتي انانيه وحقيره

قلت له شكرآ ,,

سكر الخط بوجهي

اتصل مره ثانيه بعد اقل من دقيقتين

وقالي على فكره ورقة طلاقج بتوصل بعد كم يوم ,,

مارديت عليه ,, سكر الخط بوجهي

ورد اتصل بعد اقل من دقيقتين !!

وقالي شوفي بقولج شي ,, ولدج إذا تبغين اطلعينه من المدرسه الخاصه طلعيه لأني مابدفع ولا فلس ,,

ولا بدفع شي لأحد ,, وبعدين غصبن عليج مو من رضاج راتبج بتصرفينه على أولادج يالانانيه يالحقيره ,,

أنا صبرت عليج وعلى حقارتج بما فيه الكفايه وكل مره اقول زوجتي عدله بس طلعتي مو عدله ولاتعرفين الاصول

حقيره وانا دارس حقارتج من زمان ,, حتى رقم جوالي بغيره عشان محد يتصل فيني ولا بسأل عن أحد وبصير نذل

من صج هالمره !!

نفسيتي تعبت ماأقدر اتحمل أكثر من جذي .. يعني شسوي ؟؟


أنا غلطانه لأني قلت له مابساعدك في شي؟

أنا بصراحه اكيد بساعده وقت الجد بس ماادري حسيت بأحساس ماعجبني يوم طلب المساعده وقلت له مابساعدك

الدنيا دارت علي ,, عن جد ذقت الويييييييييل ,,

افكاري متشتته ,,

افكر بأولادي

أفكر بداومي

أفكر بأمي

أفكر بحياتي الجايه مع زوجي وشلون بفتح صفحه جديده وياه

أفكر بالديون اللي صارت علي وأنا قاعده في البيت وشلون بسددها

أفكر بأولادي ومصاريفهم اللي على راسي

مو عارفه شلون اتصرف ,, ماعندي أخ اعتمد عليه

الدوام يحتاج لوحده نفسيتها مرتاحه ,, وأنا نفسيتي مو مستقره

كل شوي بحال ,,

مره اضحك

مره اسكت

مره اسوووولف

وانا محتاجه للشغل عشان اقدر اشيل روحي

بس عن جد تعبـــــــــــــــــــــانه

محتاجه لدعواتكم ,, لاتنسوني ادعولي بالفرج

ماعادت تفرق معاي ,, ارجع لزوجي واواصل عشان الأولاد ,, او اعيش بدونه

كل اللي محتاجه له الهدوء والابتعاد عن المشاكل

مو قادره اركز تعبت من التفكير :44:

45 تعليق 2,745 مشاهدة

شاركي في النقاش

سجلي الدخول لإضافة تعليق.

التعليقات

43
  1. @maatz_bthaty

    الله يعينك يا عسل ويوفقك يارب

    خليكي على موقفك وانتي ما غلطتي و دي فلوسك

    لو كان رجال سنع كان قلتي ما اقدر اساعدك او رفضتي

    ما يسبك ولا يهينك دي الاهانات
    على الاقل يحاول معاكي او يسكت

    خليكي على موقفك

    لأنه لاحظت من حكايات الحريم

    اللي ترضى بالبدايه ... راح تظل طول عمرها

    وياريت يا اختي لو تشوفي مكتب استشارات زوجيه واسأليهم عشان يفيدوكي


    على العموم الله يبرد على قلبك وانتي منك غلطانه


    و خليكي قويه واتماسكي


    و استخيري ربنا


    و اختاري اللي يريحك

    الله يبرد على قلبك
  2. @dbdob_bs_akhla111k

    ياقلبي فديتك
    اسأل الله الذي لا إله الا هو فارج الهم كاشف الغم ان ييسر أمرك ويفرج همك ويشرح صدرك
    ولايذلك لاحد من خلقه ولايجعل له عليك منّه أو فضل ويصلح زوجك ويسخره لك إن كان فيه خير
    ويصرفه عنك وعن عيالك ان كان به شر ويغنيكم عنه ياااااااااااااارب يارحيم
  3. @roh_altot

    ياعيني على الرجولة!!
    اول شئ انتي مو مجبرة حتى تشتغلي وهذا كرم منك انك تدفعي على سيارتك والشغالة
    وردة فعله لما شافك قلتي لا اغتاظ منك وظل كل دقيقتين يتصل ويعطيكي كم كلمة تسم البدن من الغيظ ومفكر انه بيقهرك او انه يمسك من الايد اللي توجع ،،
    هذا كله عشان قلتي له لا
    واللي قهره طناشك له استفزه .......
    لاتزعلي نفسك اللي كاتبه ربي بيصير ..
    وكلي امرك لله
  4. @rosee

    انزين ليش ملزومه تشتغلين

    قولي له انا تعبانه مب قادره اني اكمل اشتغل عشان جيه انا قلت لك اشوف نفسي لاني ما اقدر اشتغل وبقعد بالبيت
    لانك سندي واب عيالي وماشاء الله ريال وفاتح بيت اكيد بتصرف على البيت والريال هو الي يشتغل والمراه تقعد بالبيت
    وطرشي له مسج وشوفي ردة فعله

    بعدين الرياييل ما يون الا بالعياره
    يعني مو لازم كنت تقولين له تشوفين نفسك
    كنتي تقولين له اي عذر واهي وغبي هو بيصدقه فعلا بس تبينين له انك تسوين اي شي عشانه بس مايكون صدق بس فقط لان الرجل يبغي حد ينفخه ويشبع غروره

    وقولي اي كلام خذيه على قد عقله بس لا تعطينه شي نصيحه
    بس كلام
    تعرفين اعرف وايد نسوان ناجحات بحياتهم يتعاملون مع ازواجهم بهاي الطريقه

تابعي تجارب أخرى من هذا القسم.