محتاجة دعواتكم
السلام عليكم ورحمة الله وبركاته
أخواتي
بأقول لكم قصتي بإيجاز شديد وأتمنى منكم تدعون لي هنا وبظهر الغيب
أنا بنت فيني ولله الحمد كثير من المميزات الشكلية والأخلاقية
تقدم لي شباب كثير وكنت أرفض لأسباب تافهة جدا
كانوا زميلاتي يقولون لي اقري أكيد فيك شي لأن نرسل لك ناس مافيهم أي عيب وأنتي ترفضينهم
وكنت مقتنعه إن ما فيني شي
يوم تقدم بي العمر بديت أتنازل شوي
وهنا تأكدت إن فيني شي
لاحظت إنه إذا تقدم لي أحد ما يناسبني يرجعون يدقون مرة ومرتين وثلاث
وإذا دق أحد اقتنعت فيه ما عاد يدقون أبد
صارت معي كثير
ومن شهر محرم الماضي بديت أنتبه وكل أهلي انتبهوا
والله يا بنات إنهم يدقون ويبدون مميزات عشان أقتنع ولا عاد يدقون
قريت على نفسي وقريت سور البقرة كم ليلة ورحت لشيخ مرة وحدة ولا عاد رحت مرة ثانية ورحت لمكة ودعيت كثير
وبعد ما رجعت تقدم لي واحد أعجبتني صفاته كثير
قلت الحمد لله الله استجاب دعائي
وكانت أمه تقول لأمي اقنعوها
وتخيلوا كالعادة ( خرج ولم يعد ) وما عاد دقوا
والأسبوع الماضي تكرر معي نفس الشي
والله يا بنات تعبت نفسيتي كثير كثير
لأني أتحمس وأفرح وأبني آمال ولا عاد يدقون
عندي لو ما دقوا وخلوني اتعلق أفضل
صرت أستحي من أمي وأبوي وأخواني
لأني كل مرة أقول ما عندي مانع ولا عاد يجون
مدري وش اللي فيني بالضبط
بس والله تعبت مرة مرة مرة
والله إني ما قد حسدت احد وأتمنى الخير لكل الناس
وبلما أشوف وحدة تدور لأخوها أعطيها أرقام بنات يناسبونهم
ولا أدري ليه أنا يصير معي كذا
اللهم لا اعتراض
أعتذر لأني طولت عليكم بس ارجوكم أرجوكم ادعوا لي
إن الله يرزقني زوج خير مما أتمنى عاجلا غير آجل وأن يخلصني مما يمنعني من الزواج