إخواتي ....
هذي اول مره....اكتب لكم موضوع....ومع اني كنت مخططه اني اكتب شي يفتح النفس كبداية لي في المنتدى ...لكن ما قرأته في منتدى (....)..شي يقهر و يبكي و يكره الواحد في نفسه..
لا يهمني ان قرأت قريباتي موضوعي ..و عجبهم ما عجبهم بكيفهم...
الاسبوع الماضي كانت خالتي عندنا ...و كانت تقول انها تبغى تغير دكتورتها الحالية...
فقلتلها(بحكم اني طالبة طب) ان دكاترة المستشفات الحكومية أكثر تمكننا و (شطارة) من دكاترة الخاص..
قالت لي ...ما ابغى دكتورة تنافخ علي..الوحدة تبغى دكتورة تخفف عنها (بمعنى انها انها تبغى اللي يطبطب و يدلعها) و دكاترة الخاص انا شاريتهم بفلوس..
ما خطر في بالي وقتها...ان أطباء المستشفيات الحكومية فيهم غرور بحكم مكانته و قدر علمه..و هذا شي اشوفه قليل جدا..
لكن ..اليوم و بما انا اقلب في المنتدى المعروف...اللي من زمان ما دخلته...حوالي 3 سنوات..في بداية دراساتي..
قرأت من يقول و يحلف انه شاف استشاري "يتحرش" في احدى طالباته عشان يعطيها العلامه الكامله..
و من يقول ان زملائي طلاب الطب ...و دكاترتي..بهائم شهوانيه..
ما دخلوا هذا التخصص الا لتلمس فروج المريضات ..
و ان الطلاب و الطالبات يجلسون مع بعض على الغداء و يلعبون بلوت في وقت البريك..
تخيلت وقتها مشهد من فلم جنسي...و عالم يختلف تمام الاختلاف عن المكان اللي اداوم له كل يوم..
اولا درجات الطالب و الطالبه مو بيد اي دكتور عشان يعطيني امتياز..
درجاتي بيد لجنه من اطباء و طبيبات درسونا..مو دكتورواحد ...
ومع انه نادر ان اي احد ياخذ امتياز..
مو عشاني ما لقيت احد يبغى "يتحرش"..
بس لانه
شغلنتا مو بالسهوله اللي تتوقعون...
و لا اختباراتنا...
نقعد 5 اسابيع و اكثر نذاكرمادة وحده مثل (.ال-..)من 3-4 مراجع...كلها فوق الالف صفحه ونختبرها في يومين...
عشان ايش؟
قول لي ليش؟
عشان ناس ما تقدرنا..؟
عشان اعالج واحد رمى في عرضي قبل كذا؟او عرض وحده من زميلاتي..اللي بعض الاحيان ما يلاقون وقت يمشطون شعورهم و يغسلون وجيههم قبل ما يلبسون حجابهم ..بما انه ما احد شايفه لا بنت و لا ولد؟
هاه يا من تتهموننا بالفجور و السفور و اننا نبيع انفسنا لكل من اراد؟
في طرق اسهل من انني ادخل كليه الطب...عشان اصيع..
انا لا اقول انني ملاك و لا اخطئ
و لكن
المستشفى مكان شغلي..
و اماكن الصياعه واجد...
و المتخلفين اللي يطلعون علينا الاشاعات...
انا اعرف من هم...و قد شفت منهم كثير....مرضى او مراجعين او مرافقين..يبغى يتعرف ..و رفضناه ...فمن قهره يبغى ينتقم..
و بما انه لا يعرف عني الا انني طبيبه او طالبه طب...قام يشوه سمعتي..عن طريق مهنتي اللي هي اشرف منه ...
و ليش تطاردونا بسيارتكم لمجرد انكم شفتوا طرف البالطو؟
كانه صار رمز (.....)...
و حتى زملائي ما ارضى عليهم...
مو عشاني متعرفه على واحد منهم...و نمون مثل ما يظن البعض...
لا والله..و يشهد الله ان ما اعرف منهم الا اسماء...و بس عشانهم عرفوا بشطارتهم و الكل يتنبئ بمستقبلهم ..
لا ارضى عليهم كلمه..
لانهم مروا بمثل ما مريت به...
و يرمون في اعراضهم مثلنا...لكن هم اهون...اذا خطب ...اهل العروسه ما يشوفون الا راتبه...
احنا الله يخلف علينا ...
يحسبون اني البس ملابس النوم تحت البالطو الابيض...
رسالة للي يظنون انك تشتري ابتسامة الطبيب...
تحت هذه الابتسامة..قهر..
منك..
وما الومهم...انت ...جزء من مجتمع ظلمه..
لا احد يقول لا تعممين على الجميع..
و انا اقول هذا اسلوبكم...
زل طبيب...او لم يزل...فقط لمجرد غيرة أو احساس بالنقص...
انتم عممتم ..
و نحن نعمم...عليكم
شعب الله يخلف عليه ..
علوم الطب تاتي بعد علوم القران و السنه...
فباي حق تعتدون علينا....
عندك مشكله مع طبيب اعتدى على عرضك او "شكيت" انه مو مزبوط .. كما تصف..... شهر باسمه... ولا تعمم...
ليش الهيئة رامينا في مستشفيات في مقطعه و نضطر ناخذ تكاسي و نتحاشر في سيارات عشان ما نختلط بزملائنا في العنبر..
و هاتك من مطاردات شبابنا المتخلف..
ليش تقلقون اهالينا علينا..
و تخلون ابآنا يتصلون علينا كل خمس دقايق عشان يسألني : انتي باي ارض؟
و يتطمن على لا يكون شي جانا من عيال الحرام..
من الاولى انه "ينطرد" من المستشفى الجامعي؟
احنا اللي عايشين على سواقين و باصات الجامعه؟ و الا الطلاب اللي كل واحد عنده سيارة تخرجه من الثانوي و ما ينخاف عليهم؟
مجتمع ذكوري...
يقول مفروض ما نسوق..عشان الفساد لا يكثر...
كأن النساء مصنعه
مع العلم اننا لازم نختلط في الممرات لان المحاضرات في المستشفى الجامعي..
للأخ اللي في منتدى (....).
باي حق تتكلم عني و عن اهلي..وعن عرضي و عن شرفي...
من تكون يا النكرة...
يا من تتدعي الغيرة على المسلمات...
الست انا مسلمة؟
ام اني قد كفرت لاني ما مشيت على كيف رجعيتك و تخلفك
الله يبتليك في عرضك...
و راح يجي يوم ...
تحتاج فيه الينا ...نحن الاطباء..
لنرد لك نفسك الذي بالكاد تلتقطه..
او نولد مرتك اللي ما كانت مهتم فيها ...و انتظرت الى ان قربت تموت..من جهلك...
او ابوك الشيخ الكبير اللي ما صار يعرف وجهك انت و اخوانك..
و امك اللي تدعيلك بالصلاح على فراش الموت بس ما فيه فايده منك
او نعالج حروق ابنك اللي كان سببها اهمالك... و اشتغالك بما لا يخصك...
لكن اذا جاء ذاك اليوم ...و احتجتني فيه ...
ان شاء الله تموت قبل ما يدخلونك باب الطوارئ
و تصير امانة في رقبتي ....
مع اني لا اعرف من تكون يا ظالم ...
و لا اعرف وجهك...
زي انت ما تعرف وجهي...
بس
حسبي الله و نعم الوكيل....
يا ناس...يا عالم
حرام عليكم ......والله حرام وعيب...
وطني...
انا لا افتخر بك ..
قد اكون في اطهر بقاع الارض...
لكن من يمشي عليها ...؟
انا افكر جديا بالاغتراب....
على الاقل...
اكون متوقعه الطعن في الظهر...من اهل ديار الكفر...
بغض النظر ان تعليمهم احسن بكثير من عندنا...
الله لا يوفق من اعتدى على عرضي ولا عرض زميلاتي و لا اعراض المسلمين
ومن استخدمها سلعه لاغراضه السياسيه
اللهم رد كيدهم في نحورهم امين...
ملاحظه:
والله اني اكتب من القهر....قبل لا احد يفكر يحذف الموضوع ...حطوا نفسكم مكاني ..
مهنتنا ليست سهله.. احنا نمرض ايام الاختبارات ... ما هي 50 و لا 60 مرض..احفظيهم وخلاص!!!
ولا هي تخصص واحد..
احنا ندرس كل التخصصات ..
لمدة 7 سنوات...حبيتها او لا ...او ابغى اتخصص فيها او لا ...
و لا احد يقول ليش الطالب يكشف على مريضات و يحضر ولادات و هو مو ناوي يتخصص نساء وولادة...
الكلية تخرج اطباء عامين ...
و انت حظك اذا قبلوا بك في اي تخصص...
يعني مو اي دكتور يتخصص اللي يبغى ..
زي حكاية العلمي و الادبي في المدارس...حسب درجاتك...
و هذا هم فوق همنا
و الناس تحسبنا في العسل قاعدين نخرج و نصور افلام رومانسية و اباحية
و على فكرة اغلب الزملاء متزوجين ...فلا تقولون الشهوة و مدري وشو
و البنات ....عاد هي و حظها اذا اهلها من عايلة دكاترة فولد عمها الدكتور بيتزوجها
و الباقي يقعدون يقطعون فيها الناس و ياكلون من لحمها...و اللي يجيها قولون عصبي وانيهيار و اللي تاخذ مهدئات ..واللي عايشه على لصقات الم المفاصل عشان تقدر تتحمل الكرف..
اتظنون ان من دخل هذا المجال للشهوات يصير فيه كذا...؟
و اسفه على الاطالة___
اختكم..
معدل بعد ما هدئت شوي
اعتذر للي تضايقوا
شاركي في النقاش
سجلي الدخول لإضافة تعليق.
التعليقات
61- حبيبتي
اتقي الله في لسانك
انا طالبة في طب ايضا
لكن
مالك حق تسبين وتشتمين
اعرف قصدك ومعاناتك
لكن النظيف والشريف من اخلاقه يبان والضايع من عنوانه
فمالك حق تسبين او تتهجمين بكلام قوي
اعتدر اليك غاليتي
سلام - كلامك صح حبيبتي يس لاتهتمين اشرق العلوم الدنيويه الطب
- الله يعين
- الله يستررررررررررررررررررر
- انصحك تتركن مهنة الطب فورا اذا هذه اخلاقك وهذا تفكيرك الله يعين اللي بتعالجينهم
مواضيع مشابهة
تابعي تجارب أخرى من هذا القسم.