تجمع لبنات القيصرية/قبل عشر سنين او امس>> تم دمج المواضيع

انا ثلاث قيصريات والحمد لله

السبب الاولى ما هي متجهه الثانيه الرس فوق والثالثة الحظ ما حالفها مع انها كانت متجهه

كلهم في مستشفى حكومي والدكاتره اللي يجي دوره ياااااااااااااحظة فيه


الحمد لله الواحدة ترضى بما كتبه لها الله سبحانه واسال الله العلي العظيم ان يرزقني توم عيااال صالحين لان كلهم بنات بعد العمليه اون حامدة لربي اني ما زلت على قيد الحياه والاطفال اللي في البيت اخر خبرك فيهم لما يجهزونك للعمليه واسوا شي هو تركيب القصدره الله يعوضنا الموانع حبوب وبعد الثانيه لما كملت 1سنه ركبت لولب

سبب الولاده / بالاول نزلت معاي المويات الساعه 12 الظهر ورحت للمستشفى وصكوا علي قالو ولاده طبعا صكتني النفاضه قالوا امشي عشان يمكن يجيك طلق طبيعي ومشيت لحد الليل وماجاني اي آثار طلق بعدها قالوا طلق صناعي وصرت اوصل السماء من الالم وارجع لحد ماانفتح عندي الرحم 7 سم بعدها بكل برود قالولي اممممم الظاهر عندك مشكله ان الرحم مفتوح بس الحوض عندك مسكر بدري ياماما وطول هالوقت مادريتوا انه مسكر الا بعد ماطلعتوا روحي بعدها انخنق اوليدي انلف عليه الحبل السري وشرب مويات ووقف نبضه مادريت الا بسم الله فجاءه اشقلوني غرفة العمليات ماامداني ولا التفت على زوجي من سرعتهم بس الله لايوريك كني بفلم هندي انا وزوجي ماندري وش السالفه طايرة عيوننا صحيت من البنج على الم فضيع من بطني آآآآآآآآآآآآآآآه بطططططططططني وكانت هذي ولادتي الاولى بشكل عام كانت متعسره وعمليتي مؤلمه وطولت ماامشي الا وراسي واصل ركبي مااقدر افرد راسي من الالم

عدد الولادات / ثنتين والثالت بالطريق


مكان الولاده / الاولى بمستشفى المأساة على قولة زوجي وهو فعلا مأساة والثانيه بالحمادي ويالله لك الحمد والشكر فررررررق شاسع بين العمليتين اكتشفت ان البلا مو في العمليه البلا في الدكتور اللي يسويلك العمليه الحمدلله بولادتي الثانيه عشان الدكتور مررره شاطر من اول يوم مشيت وفارده نفسي وكانت العمليه مره كويسه الحمدلله


طبيب الولاده / الاولى من شينه ماحفضت اسمه بس الثاني ياحبيله كان الدكتور عثمان العسلي استشاري فضيع

طريقة التخدير / قلتلهم ان كان عندكم شي اشد من الكامل عطوني اياه
ودكتور التخدير ماادري وش اسمه بس اذكر انه جاني قبل العمليه يسالني كم سؤال وكان هندي على مااعتقد

الاثار النفسيه والجسديه / الاثار النفسيه والجسديه في الاولى زفت الزفت يالله لك الحمدوالشكر على كل حال مثل ماقلتلك عمليتي كانت شينه والنفسيه بعد ولادتي ب3 ايام توفى ابو زوجي الله يرحمه وطبعا كان ولدي اسمه على اسم جده الله يرحمه بس الحمدلله انه شاف اول حفيد له قبل لايموت وهذا اهم شي بس وش اقولك كنت نفسيا بالحضيض لازوجي تهنيت فيه ولا تهنى في ولده ولا تهنينا بفرحه ابوه
لكن الثانيه الحمدلله فرررق كبير نفسيا وجسديا

برنامجي الغذائي وغيره / مافيه اي شي محدد ماني من النوع اللي اكل اشياء الحريم حقت النفاس طبعي قرافه اقرف من كل شي غير مألوف وريحة هذي الاشياء وطعمها يلوع كبدي فعشان كذا ماسويت شي حياة طبيعيه زي كل يوم

بعد الاربعين / نعم استخدمت حبوب مرره حلوه ومامنه اي عوارض وخفيفه اسمها قراسيال وماشفت منها اي شي

شعوري عند دخول غرفة العمليه / آآآآآآآآآآآآآآآآآآآآآآآآآآآآآآه جيتي على الوتر الحساس اصعععععب موقف بحياتي احس اني بودع ووديت ولدي عند اختي وكنا بوقت الصبح بدري وكان نايم ياعيني ومت من الصياح والمشاهق وحاضنته بكل قوه حتى ياقلبي حسيت انه اختنق مني بس اللي قهرني في الموضوع ان زوجي انواع البرود مافيه اي احساس جالسه اشاهق واصايح وهو جنبي في السياره مافكر ولا يلتفت علي ويهديني ولا يطبطب على كتفي قهرني طول الطريق ساكت وانا اصييييييييييح بس ماحولك احد :(

وبس :)

بسم الله الرحمن الرحيم

أولاً:الله يعطيك ألف عافية اختي على طرحك الموضوع المهم لاني تعبت وانا ادور على هالمواضيع وجا بوقته الآن

1)بالنسبه لولادتي الاولى فسببها السكر لان الدكتورة اعطتني موعد للولادة بحيث اني مااتعدا هالموعد علشان الجنين مايتضخم من السكر وتعديته وماجاتني ولاده ودخلت المستشفى وحاولت الدكتورة اني اولد طبيعي بس الظاهر ان الجنين تعب من الطلق والتحاميل وضعفت دقات قلبه فأضطرت الدكتورة تولدني قيصيرية

أما الثانيه فكان عندي الضغط ولله الحمد وأثر على الجنين بنهاية الشهر الثامن وولدوني قبل التاسع لان الضغط قفل على المشيمه وصار مايوصل للجنين الغذاء وسوت لي عملية وياربي لك الحمد

2)عددها:ولادتين والثالثه بالطريق والله يسهل يااارب
3)مكانها:ولدت بمستشفى أسطون واظن اللي ولدتني الدكتورة عزة لاني اتابع الحمل عندها وفعلاً الولادتين سببت لي التصاقات بالرحم وماحملت المره الثالثه هذي الا بتعب ياربي لك الحمد

4)طريقة التخدير:الولادة الاولى كان تخدير كامل وتعب مررررره فيه حتى ولدي ماحبيته ولاشفته الا بعد ماطلعت من المستشفى من كثر التعب لانه يكفي الكحه والبلغم اللي بعد العملية ومع كل كحه ينفك الجرح وطلعت من الاربعين والخياطه ماألتئمت بسبب السكر
أما الولادة الثانيه فبعد ماكشفت علي الدكتورة ودكتور التخدير حصل عندي سوائل بالرئتين وقرر بنج نصفي موكامل لان الكامل يأثر علي وسويت بنج نصفي ولله الحمد احس انه اسهل من البنج الكامل لكن الخوف وقت العملية لانك تشوفين كل شي وتحسين فيهم وتشوفينهم وهم يضغطون على بطنك علشان يطلعون الجنين بس الاحسن انه مافيه كحه وبلغم،برضو فرصه انك تدعين وقت العملية وتقرين وتدعين لزوجك واولادك ،لكني تعبت بعدين من الآالآم بظهري وقالوا لي هذا من تأثير إبرة الظهر

5)الآثار النفسيه بالولادة الثانيه كانت زفت لاني ماشفت بنتي وكانت بالحضانه وانحرمت منها وبعد كانت ولادتي الاولى عند امي اما الثانية فكانت عند اختي لان امي توفت الله يرحمها وكنت مفتقدتها مررررررررره لانك تحتاجين امك باللحضه هذي بالذااات
أما الجسديه فياربي لك الحمد ولك الشكر بحكم السكر والضغط كنت دايماً أتشكى من شي بس الوحده تتحمل وتحتسب الاجر من عند ربها

6)مافي برنامج معين

7)شعوري عند دخولي العمليات:ههههه ابشرك من يوم دريت اني حامل وانا غرفة العمليات ماتفارقني واحس اني هالمره اشد خوف من المرات اللي راحت ماادري ليه واحس اني بموت
ومن يدخلون علي يقولون لي يالله عمليات تبدا الركب والرجلين تتضارب وماتسمعين الا صوت اسناني تتراجف هههه واموووووووووووت من البرد،،وماانسى أوصي زوجي على اولادي دايماً



وبالاخير الله يفرج كربتي وكربة المكروبين والمكروبات من المسلمين والمسلمات يارب العالمين

لاتنسوننا من دعواتكم