انا يمكن داخلة الموضوع هنا غلط والموضوع ميخصنيش أساسا
لكن قلت لازم أقول كلمة حق
لأن موضوع الشغالات ده مضايقني من زمان وكان نفسي أعلق عليه
أعرفكم بنفسي الأول
انا أختكم سها من مصر
وعندنا في مصر الوضع مختلف عنكم كتير في حكاية الاعتماد على الشغالة
طبعا الشغالات موجودات
سواء مصريات أو فلبينيات أو الحاجات الغريبة بتاعة شرق آسيا دي
فيه اللي بتجيب شغالة لأنها متعودتش على شغل البيت
وفيه اللي بتجيبها للتفاخر والوجاهة الاجتماعية والبرستيج
لكن يفضل موضوع الشغالات ده محصور في طبقات اجتماعية معينة وشرائح محدودة من الشعب المصري (أو الشرائح اللي بتحاول تقلدها)
لكن عندكم باحس ان الدنيا كلها معتمدة على الشغالة معرفش ليه
وإلا الحياة تخرب ومينفعش تستمر
بالله عليكي يا أختي العزيزة
علشان تريحي نفسك من الغسيل والكوي والمسح والكنس
تجيبي واحدة تقعد على قلبك 24 ساعة؟
وتعلمك الكسل والاتكالية
وتشيلك ذنوب كمان لأن جوزك هيشوفها وأولادك هيشوفوها لو هم كبار شوية
وتخليكي قاعدة في بيتك مش مرتاحة ومش عارفة تاخدي راحتك مع جوزك
وتحسي انك متراقبة طول الوقت
لو قعدت أحكي عيوبها من النهارده للسنة الجاية مش هاخلص
وده كله في مقابل إيه؟
علشان حضرتك تخرجي تروحي زيارة ولا تروحي فرح؟
طول عمر الناس بتروح الزيارات والأفراح بعيالها يا إما تعتذر لو هم بيبيهات صغيرين
علشان تنامي لحد الضهر وتقولي مش قادرة أقوم بدري ومش عايزة أشتغل طول اليوم؟
ده الرسول بيقول اللهم بارك لأمتي في بكورها
وعن تجربة كل الناس ان الوقت الصبح بدري بيبقى أكثر بركة والإنجاز فيه بيبقى أسهل كتير
علشان تنزلي الشغل؟
الموظفة بتحط أولادها في حضانة وده أفضل كتير من انها تجيبلهم واحدة تقعد معاهم في البيت
علشان أول ما تولدي وانتي عندك أطفال صغيرين؟
ما انتوا بتروحوا تقعدوا عند أمهاتكم معززين مكرمين لحد الأربعين وأحيانا بعد الأربعين كمان
انا اللي عايزة اقوله ان احنا عندنا الحياة ماشية عادي جدا من غير شغالة ولا حاجة ومحدش في الوسط بتاعنا بيفكر يجيب شغالة خالص
ومننا الطالبة والموظفة وربة البيت واللي عندها دستة عيال
اشمعنى عندكم الحياة مش هتمشي؟
إيه الفرق؟
لما بنتزنق خالص ومفيش وقت أو مفيش مجهود أو البيت كبير والعيال كتير
أقصى حاجة ممكن نعملها اننا نجيب واحدة تنضف مرة في الأسبوع
هتبقى واحدة جاية تعمل مهمة محددة تاخد فلوسها وتمشي
ودي مفيش فيها مشكلة
لما بنحتاجها بنجيبها
طول ما احنا مش محتاجينها ما بنجيبهاش
ودي حاجة تانية غير انك تجيبي واحدة تقعد على قلبك 24 ساعة وتسببلك كل المشاكل اللي انتوا عارفينها واللي انتوا في غنى عنها
ارجوكم فكروا في كلامي ويا رب ما اكونش ضايقت حد
من قررت الاستغناء عن الخادمة ونجحت في ذلك
متابعة النقاش، صفحة 7