اللهم لك الحمد على كل شيء
ابكتب قصة حادثنا لسببين
الاول ابغاكم تاخذو عضه منه
و
الثاني ابي دعاكم لي ولبنتي ولزوجي
يوم الاحد الي فات طالع زوجي الصبح بدري من دوام على شان عند بنتي انفلونزا وابي اوديها المستشفى
وطلعنا وانا حتى ماصليت وقتها الفجر وفات وقتها وطلعنا وعادي كان عندي الله يسامحني وكنت وقتها
طاير تفكيري بالكوافيرا العصر بروح اصبغ شعري واحاتي يارب يكون ماعندها زحمه
ولاحاتيت صلاتي الي اخرتها استغفر الله
واكيد في بنات كثييير مثلي
وانا ابيكم تاخذون عضه مني
ومشينا وقربنا من المستشفى 200 متر وزوجي كان ماشي 80 70 السرعه ماتزيد وكنت اسولف معه واضحك والعب
مع بنتي واه بس ماراح اقول لو و مالو لكن دايم احط بنتي ورا بالكرسي حقها وهالمره قلت خلاص قريب المستشفى
مابيها تنام ابيها اذا جينا نامت معنا
وفجاءه وانا اسولف الا السياره لوحدها صارت تلف يمين ويسار وزوجي يحاول يسيطر على الوضع والا في فايده
وارتفعت من مكانها تبي تقلب الجهه الثانيه والحمدالله لفها زوجي جهتي وتصدم على سور الحديد الي بالشارع
اكثر من اربع مرات وفي وقتها كنت ماسكه بنتي بيديني الثنتين وصاكه عليها بفخوذي وتاركه نفسي وراسي يضرب
بالدريشه والباب ولما قرب من السور كنت اقول بيوقفها مستحييييييييل نصدم لكن اه بس والله اني شفت المووت
وقفت وفجاءه اغما علي وفي نفس الوقت اسمع بكي بنتي ومافتحت الا على يد واحد يشيل بنتي ويقومنا من
السياره لاتنفجر لان البنزين صار يصب وركبنا سيارته الله يجزاه الجنه يااارب ودنا المستشفى وانا وفمي وخشمي كله
دم
مابي اطول بالتفاصيل لكن الي طلعت منه والحمدالله رضوض وكدمات في نصفي اليمين كامل وراسي وزوجي انتفخ
جزء من راسه وبعض الرضوض
لكن
بنتي المسكينه صار كسر برجلها اليسار وللمعلوميه عمرها 7اشهور فقط
والا عرفنا الا بعد يومين المفروض المستشفى كاشفين عليها كامل لكن تفكيرنا على راسها والحمدالله مافيه
شي ونومها تنويم كامل وسولها الجبس على رجلها وظهرها مع بطنها يالله كل من شافها انكسر خاطره لان توها
صغيره واليوم بس اطرش وترجع وحالتها حاله وزكام وكحه والله تكسر الخاطر اليوم كامل ماكلت والا شربت شي كله
ترجعه بسبب المنوم
خلاصتي من كتابة الحادث الي صابنا اشياء كثيره منها
اني حسيت بالموت والله لحظه مره مرعبه وفي اقل من دقيقه تجي
وفي اي لحظه تجي مافي عمر يعني كنتي كبيره او صغيره
فافكري لو كنتي مكاني هل تحسين هذا وقته تستقبلين ربك
والله اني بكيت بكي مو طبيعي ان الله رحمني وعطاني عمر لو قليل لاني امقصره باشياء كثير ويكفي تاجيل الصلوات
واي احد مثلي والله جد بنات
ارجوكم وانصحكم بعدم التهوان بالصلوات والله ماتدرين متى راح يوقف قلبك لاسمح الله
والله ابد كنت عايشه حياتي عادي مثل اي بنت اليوم بروح الصالون وبروح السوق ومدري ايش
يعني عايشه حياتي والاتوقعت فجاءه كل هذا يصير
والشي الثاني ابيكم تدعون لنا ولبنتي بالشفاء ان شاء الله
ولزوجي الي الله يعينه سيارتنا خلاص صارت عدم وماتصلح وبنشتري سياره وديون والله يعينا يااااااااااارب
واتمنى حتى الي ماتبي ترد ماتطلع الا تدعي لنا لو في قلبها
والله يجزاكم الف خير
شاركي في النقاش
سجلي الدخول لإضافة تعليق.
التعليقات
181- الحمدلله على سلامتكم
- الحمدالله على سلامتكم ياقلبي ..
الله يشفييييييكم ان شاء الله ويخليييييييييييييكم لااهلكم ..
ايه والله صدق الحياة دايم نفكر فيها ونبعد اليوم الشيييييييييينن عنا ماندري ممكن يكون يومنا بعد لاحظ بس مانقول الا الله يهدييييييييينا ويصلح حالنا.. - الحمدالله على سلامتكم ياقلبي ..
الله يشفييييييكم ان شاء الله ويخليييييييييييييكم لااهلكم - الحمدلله على سلامتكم
وكثري من الاستغفار - الحمد لله على سلامتكم .. آخر الأحزان إن شاااء الله ...
مواضيع مشابهة
تابعي تجارب أخرى من هذا القسم.