ماشاء الله على النضافه والترتيب شي بيفتح النفس ع شي كاسة عصير فريش
بالنسبه لي مخصصه بكل غرفه احتياجاتها مشان اي شي لزمني فيها لاقيه فورا بمتناول ايدي مثلا
الله يعزكم بالحمام حطيت خزانه برفوف ودروج للمناشف والبشاكير وعدة الحلاقه والشامبو والغيارات القطنيه الداخليه ..... لقيتها كتير ريحتني
بالمطبخ كمان جبت خزانه بدروج وحطيت فيها كل المعلبات والبهارات وهيك فضي عندي محل بالخزاين لاواني المطبخ
غرفة المستودع ريحتني من كتير دعاديع مو لازمه بالذات من كراتين الجوالات وقطع الكمبيوتر وشناتي السفر اللي بتاخد محل كبير
اما بالنسبه للتنضيف فباعتبار ان مافي غير انا وزوجي فماعندي فوضى كتير ولو ان زوجي ماشاء الله عنه ما بقصر بس بحاول لملم من وراه مشان ما يتراكم عليي الشغل
والجلي بجليه اول باول ..... يعني بين انك توقفي عالمجلى 5 دقائق بين تستني ليتراكم وتوقفي عليهم ربع ساعه
ونفس الشي بالنسبه للفرن بعد كل طبخه فورا بنضفه واحيانا بحط ورق قصدير وبالذات اذا بدي اعمل مقالي فما بتعذب بتنضيفه بمجرد ما خلص طبخ بشيل القصدير وبكبه وهيك بضل الفرن عم يلمع ع طول
اما الكوي مجرد ما بتطلع قطعه بدها كوي فورا بحط طاولة الكوي وبكويها وبعلقها سواء لازمه بالوقت الحالي ولا لا وهيك برتاح وما بتضل بوجهي وعم تزورني ايمت رح تكويني هههههه :hahaha:
ومجرد ما تتوسخ المغسله على طوووووول بنضفها لان اكرهه شي عندي البقع على المغسله
وطبعا كل يوم لازم غير هوا البيت سواء كان الجو برد او مطر او حتى تلج ولو 5 دقائق باليومبتحسي حالك عم تشمي هوا نضيف ونقي وخليه اول عمل بتعمليه اول ما تفيقي من النوم
كمان حطي شوية بودره بريحه حلوه داخل كيس المكنسه الكهربائيه وهيك لما بتنضفي البيت بتفوح هالروائح الحلوه
واستعملي لمسح الارض هي المساحه كتير مريحه وعمليه وما بتاخد جهد وتعب
يعني باختصار بحاول ما اترك شي يتراكم عليي وبنضف كل شي اول باول
طبعا كان الوضع غير لما كان عندي ابني الله يرحمه وبتذكر بيتي كيف كان طايف ويمكن الشارع انضف منه بس ماكان طالع بايدي شي بحكم مرضه لازم 24 ساعه اقعد جنبه
فالحمدلله على كل حال
ونصيحه لاتدوري عالكمال بس اعملي جهدكم توصلي له وبتصور مع وجود الاولاد فهالشي صعب يتحقق:06:
وخلي عندك قناعه ان انت عم تعملي اللي عليكي والباقي ع رب العالمين