هاي عزومة متواضعة عملتها لضيوف من كم يوم .. و رح انزل الاطباق و الطرق و الصور مرة وحدة بإذن الله
ان شالله تعجبكم
هاي صورة السفرة بشكل عام ..

وهاد رز بالخلطة .. متل رز الكبسة تقريبا بس بدون دجاج

طريقته
بتقلبي بصل جوانح بشوية زيت زيتون و بتضيفي عليه شوية توم و فلفل اخضر مفروم و زبيب و حب هال و كبش قرنفل .. و جزر مبشور و بهارات الكبسة المطحونة المعتمدة عندك و قلبيهم منيح و بالاخر حطي معجون البندورة
بعدين بتضيفي الرز ( مغسول و منقوع و مصفى) و بتخلطيه مع الخلطة السابقة و بتغمريه بمرقه الدجاج الساخنة او ماء مذوب فيه مكعبين ماجي .. وبس يغلى وطي النار متل اي رز تاني لحد ما تنشف المي
الكبة اللبنية

بتطبخي اللبن بطريقتك .. و لما يغلي بتسقطي فيه حبات الكبة المقلية او المشوية ( انا بشويها ) و خليهم يغلو مع بعض دقيقتين بس و بعدها دقي تومة مع نعنع ناشف و حطيها عاللبن و اطفي النار
الزغاليل المحشية

نظفي الزغاليل متل الدجاج و تبليها قبل بيوم بالليمون و البهارات و زيت الزيتون .. قبل الطبخ احشيها بحشوتك المفضلة ( انا بحشيها متل الدجاج رز مصري و لحمة مفرومة و بقدونس مفروم و لوز و صنوبر ) .. و سكري كل زغلول بعود تنظيف الاسنان و رصيهم بصينية الفرن ( يفضل تحطي تحتهم دوائر بطاطا عشان ما يلزقو بالصينية )
و حطي معهم كاستين مي مذوب فيها ملح او ماجي
بياخدو ساعة تقريبا او ساعة و ربع .. حمري وجههم و قدميهم
صدر التيركي على الطريقة الصينية

هاد الطبق كان المفروض يكون ديك رومي محشي بس ما لقينا الا واحد كبيييير ... جبت صدر تيركي ولما داب قطعته شرايح رفيعة و نقعته بالخلطة ( صويا صوص و زنجبيل و عصير ليمون و زيت زيتون و ملح و بهارات مشكلة )
تاني يوم فرمت فلفل احمر و اخضر و اصفر شرايح طويلة .. و بصل اخضر و جزر عيدان و خلطتهم مع الشرايح المتبلة و حطيتهم كلهم في صينية مع زبدة و زيت وزيتون ... اخدو بالفرن 45 دقيقة و 5 دقايق تحمير
رز ابيض... عشان التشاينيز و اللبنية

و اكيد مو محتاج شرح
سلطة الكولسلو

ملفوف اخضر شرايح رفيعة و جزر مبشور .. توضع في الخلطة لعدة ساعات قبل التقديم عشان يطرى الملفوف
و الخلطة هي لبن و مايونيز و سكر و خل ( الوصفة الاصلية حليب مو لبن )
شيش طاووق بالفرن

صدور دجاج قطعيها مكعبات .. و انقعيها لليلة كاملة في الخلطة ( لبن و معجون بندورة و بصلة و توم و زيت زيتون و بهارات و عصير ليمون ) تخلط في الخلاط و تنقع فيها الصدور المقطعة
تاني يوم شكيها في الاسياخ و ادهني صينية فرن بالزيت و صفي الاسياخ .. اشويها على نار عالية لمدة 15 دقيقة لكل وجه
سلطة الجرجير السريعة

افرمي جرجير فرم خشن .. و حطي معاه زيتون اسود حلقات و مكعبات جبنة بيضا عكاوي او نابلسية .. و تبلي السلطة بعصير ليمون و زيت زيتون بدون ملح الا اذا كانت الجبنة ما فيها ملح بالمرررة
و سلامتكم
