العبايه ترفرف والقميص مشجر
مرحبا خواتي .. ان شالله الجميع بخير .. حبيت اتناقش معكم بموضوع وأخذ رايكم حسب الشي اللي انا شفته اليوم بالسوق .. ودايمآ مو بس اليوم .. بس اليوم قررت اني اتكلم واشوف ارائكم وبدون طقاق الله يرضى عليكم .. الحين وشفيها لما تروحي للسوق وانتي مرتبه وشكلك انيق مع زوجك ؟؟!! هل هذا بنظركم حرام ؟ يعني اشوف بعض الحريم بالسوق زوجها جنبها ومرتب ومهتم في نفسه وهي الله يهديها نقابها وصخ والعبايه ترفرف ومصفطه وتحتها القميص الملون والمشجر طالع يرفرف مع العبايه !! ويقال انها ساتره لابسه عباية راس ونقاب !!هذا وماننسى ان العبايه لاصق فيها جبنه او مكبوب عليها حليب .. وشنطتها لاصقه بأبطها وواضح اللي مافيها شي منسمه مره .. والرجال عيونه زايغه !! احيانآ اقول بنفسي اللي هذي زوجته ماينلام يناظر الحريم .. صحيح بلقى منكم هجوم لكن اقول الصدق الرسول عليه السلام طلب المرأه تتجمل لزوجها وأوجب عليها هالشي .. انا مااقول البسي عبايه ضيقه وكعب يطقطق او اكشفي وجهك او تعطري او تكحلي .. لكن الترتيب والاهتمام بالنفس مطلوب بأي مكان .. زوجك يشوف ويطالع وماخذته معك للسوق للمكان اللي كله حريم انواع واشكال ليش ماترتبين عمرك ليش مايشوفك زي هالحريم .. اقل شي اغسلي عبايتك ونقابك واكويهم او الغسيل والكوي بعد حرام ويلفت الانظار !!! بصراحه انا ماأيد ان الوحده تاخذ زوجها معاها لسوق لأن السوق كله حريم وبعضهم يدخل حتى محل قمصان النوم والملابس الداخليه بحجة انها تبيه يختارلها ويغث الحريم بالنظرات والحريم ينحرجون ولايقدرون يشترون زي الناس من هالرجال .. طيب تقولوا محرم رغم ان المحرم اللي اعرفه انه بالسفر مو بالسوق بس مو مشكله خذي خواتك صديقاتك اخوانك الصغار بس بصراحه رجال يزاحمون هالحريم بمحلات الملابس شي مقزز .. يمكن عشان يدفعون بعض الرجال مايحب يعطي زوجته بيدها فلوس يحب هو يروح ويدفع .. وبعضهم هو يحب السوق وزوجته ياغافل لك الله !!! ارجع واقول ليش الوحده ماترتب عمرها يعني احنا الحين ماعندنا حل وسط ياغرق ياشرق !! ياان الوحده تسحب الكحل ثلاث امتار وتكشف وجها وانواع الماكياج والعطر او تجي عبايتها كأنها مدعوسه بتريلا .. بصراحه استغرب وبالذات ان زوجها معاها وهيئتها رثه .. اقل شي عشان زوجك مو عشان الناس .