ورشه عمل بطانيه بيبي لام قسمت,,,منقول

بسم الله الرحمن الرحيم
نبدا الشرح
حاتجيبي 3الوان تليق علي بعضها وطبعا اللون الاساسي اللي انا عملته ابيض حايكون اكتر يعني حوالي 300 جرام و200 جرام من اللونين التانيين
ابدئي 177سلسله وخدي بالك من العدد كويس علشان اي غلط في العدد بيلخبط الشغل

بتعملي غرز حشو علي السلاسل دي

اقطعي الخيط ده ووصلي خيط باللون الثاني في اول غرزه حشو عملتيها

اعملي 4سلاسل تحسب كاول عمود بلفتين ثم اعملي عمودين بلفتين في نفس غرزه الحشو بس من غير ماتقفليهم واقفلي الاثنين مع سلاسل البدايه بغرزه واحده (فشاره)ثم اعملي 3سلاسل

كرري 5 مرات كمان في اول غرزه حشو (يعني اعملي 3عمود بلفتين واقفليهم بغرزه واحده 5مرات كمان)مع عمل 3سلاسل بين كل مجموعتين


سيبي 6غرز حشو وفي الغرزه السابعه اعماي 3 فشاره بنفس الطريقه السابقه


كرري علي طول سطر البدايه الي نهايتها وفي اخر غرزه اعملي 6فشاره زي البدايه وحايكون عندك 26 مجموعه
ودي المجموعه اللي في اخر السطر


لما تخلصي ال6فشاره اللي في اخر السطر اشتغلي علي الجانب الاخر من سطر البدايه وفي نفس الغرزه اللي عملتي فيها المجموعه قيل الاخيره اعملي 3فشاره بنفس الطريقه



وتستمري كده حتي المجموعه النهائيه توصلي بغرزه منزلقه وتقطعب الخبط وتقفلي

خلاص ياقمرات خلصنا الالوان وقطعنا الخيط
والوجه الامامي للشغل في مواجهتك وصلي الابيض في تاني فراغ عملتيه في السطر السابق كده


لاحظي الخيط الاصفر ده علامه نهايه السطر السابق بتوصلي الخيط الابيض في تاني فراغ بعد النهايه

اعملي 3سلاسل تحسب كاول عمود ثم اعملي 4عمود بلفه في نفس الفراغ
ثم في الفراغ التالي اعملي 6عمود بلفه- ثم 5عمود بلفه في الفراغ التالي ثم 5عمود بلفه في الفراغ اللي بعده (يعني 5عمود بلفه مرتين في الفراغين كل فراغ 5عمود )ثم 3عمود بلفه في الفراغ التالي وحاتلاحظي هنا ام ال6مجموعات البدايه خلصوا ودخلتي في بدايه ال3مجموعات
اشتغلي 3عمود بلفه في كل فراغ يقابلك لغايه ال6مجموعات علي الطرف الاخر (ولو عديتي حاتلاقي انك عملتي 48 مجموعه من ال3عمود )
لما توصلي لل6مجموعات عند الطرف الاخر ابدئي اعملي 5عمود بلفه هنا

ثم 5عمود بلفه في الفراغ التالي -6عمود بلفه-5عمود بلفه-5عمود بلفه (كل مجموعه في فراغ منفصل وكده خلصتي ال6مجموعات اللي علي الطرف الاخر وابدئي 3عمود في كل فاغ لغايه ماتوصلي قبل البدايه بفراغ اعملي فيه 5عمود بلفه واقفلي بمنزلقه في اول عمود من السطر
السطر التالي بالابيض برضه اعملي سلسله ثم غرزه حشو في نفس الغرزه ثم سلسلتين وسيبي عمود واعملي غرزه حشو في العمود التالي له وكرري بقي سلسلتين وسيبي عمود واعملي حشو في العمود اللي بعده ولازم يطلع معاكي في نهايه السطر177 فراغ

بعد السطر اللي فات ده بتقفلي بمنزلقه ثم اعملي منزلقه لاول فراغ مكون من سلسلتين واعملي 3سلسله تحسب كاول عمود ثم عمودين في نفس الفراغ- ثم 3عمود في كل من ال7فراغات التاليه (كده عملتي 3عمود 8مرات) -ثم 2عمود في الفراغ التالي وفي ال76 فراغ التالي (كده عملتي 77 مجموعه مكونه من 2عمود )- ثم 8 مجموعات مكونه من 3عمود في ال8 فراغات التاليه - ثم كملي ب2عمود في كل فراغ من الفراغات التاليه حتي اخر الدوره واقفلي بمنزلقه في اول عمود وكده حايكون عندك 356عمود
السطر التالي سطر5- اعملي سلسله ثم غرزه منزلقه في نفس الغرزه ثم سيبي عمود واعملي غرزه حشو في ثاني عمود وهكذا علي مدار السطر وحاتلاحظي انك دايما بتشتغلي في اول عمود من الاعمده اللي في المجموعه المكونه من عمودين علشان تعرفي انك ماشيه صح وحايطلع معاكي 178 فراغ واقطعي الخيط الابيض
السطر 6 - وصلي الخيط اللي باللون اللي عملتي بيه سلسله الاساس وهنا حايكون الاخضر وصليه في اخر فراغ عملتيه في السطر السابق ثم اعملي غرزه حشو في نفس الفراغ واعملي 3سلسله ثم غرزه حشو في الفراغ التالي وهكذا اعملي 3سلسله ثم غرزه حش في الفراغ التالي وعند اكمال 89 فراغ حطي علامه علشان التشبيك وكملي لنهايه الدوره ثم اقفلي بغرزه منزلقه في اول غرزه حشو
وكده الشريط الاول خلص
اعملي الشريط الثاني وعند اخر سطر بنشبك الشريطين في بعض


ونكمل علشان نشوف حانشبك ازاي
انتي خلصتي شريط
بتعملي الثاني لغايه السطر 5 وفي السطر 6 بتشبكي اللون الاخضر وتمشي عادي زي الشريط السابق وعند الفراغ 89 بتحطي علامه وبعدين تعملي بعده 12 فراغ

حطي الشريط السابق موازي له وعلي الوجه الامامي للشغل وعند العلامه اللي انتي حطيتيها عند الفراغ 89 منه
اعملي سلسلتين

دخلي الابره في الفراغ رقم 89 في الشريط الاول واعملي غرزه حشو


ثم سلسله ثم غرزه حشو في تالي فراغ مكون من سلسلتين في الشريط الثاني

وكرري التشبيك لغايه ماتوصلي لاول فراغ عملتيه في السطر ده واقفلي واقطعي الخيط
وهكذا تعملي 5شرايط وتخلصي البطانيه وتشطبي وتكوي
ومبروك علي ابنك او حفيدك او اي بيبي جميل

منقول للامـــــــــــــــــــــــــانه لصاحبه الموضوع الاصليه ام قسمت
وشكرا ودمتم بحفظ الرحمن

ماشاء الله تبارك الرحمن

شغلك رائع

وشرحك حلو

الله يعطيك العافية


ياليت لو عندك باترون مرسوم تنزلينه

الله يوفقك انتي وام قسمت

والله ياام نهله مش عارفه اشكرك ازاي علي تعبك في نقل الموضوع
وطبعا انا يشرفني ويسعدني ان فنانه واستاذه زيك تهتم بموضوع لي وتبذل جهد في نقله للاستفاده
الف شكر ياحبيبتي
بس حبيت بس اصحح خطا في السطر الخامس لو اي بنت حبت تعمل البطانيه
السطر الخامس مكتوب كده
السطر التالي سطر5- اعملي سلسله ثم غرزه منزلقه في نفس الغرزه ثم سيبي عمود واعملي غرزه حشو في ثاني عمود وهكذا علي مدار السطر وحاتلاحظي انك دايما بتشتغلي في اول عمود من الاعمده اللي في المجموعه المكونه من عمودين علشان تعرفي انك ماشيه صح وحايطلع معاكي 178 فراغ واقطعي الخيط الابيض
مفروض انا يكون كده
اعملي سلسله ثم غرزه حشو في نفس الغرزه ثم اعملي 2سلسله وسيبي عمود واعملي غرزه حشو في العمود الذي يليه وهكذا علي مدار السطر
يعني انا نسيت اكتب انك بتعملي سلسلتين
وتقبلي تحياتي وامتناني