برواز جلدة قديمة معتقة .. بالخطوات.. وفي تفصيلات جديدة

السلام عليكم ورحمة الله وبركاته
كنت وعدتكو اليوم اني اعمللكو منظر جديد بالخطوات ووعدتكو احطلكو في بعض المعلومات الي بجوز تكون جديدة على البعض فتابعوا خطوة بخطوة الشرح .. واهم اشي تطلعوا على المعلومات النظرية الي بكتبها أكتر من الصور

لنبدأ

هي صورة الجلدة معلقة وجاهزة


بسم الله خلينا نبدا بالخطوات

هي بعض المواد المطلوبة
اسفنجة للتلوين
مكبس طخ
خشبتين رفاع بنسميهم بيش
حبل ذهبي مجدول
زر منفوخ
كلفة للمنظر الجمالي أسفل الجلد



وبعدين سايكوت ..
وعلبة بزاز .. انتو تختاروها .. ويفضل تكون الها غطا حتى السايكوت ما ينشف
واسرنج كبير لملا البزاز بالسايكوت ..



وطبعا بدنا جلدة .. يفضل مقاسها 100في 60 بطلع هذا المقاس حلو على الحيط

وانتبهوا الجلد أنواع كتير
هذا النوع بسمو عنا جلد بطانة ورقية
لانو قريب من الورق
ميزتو انو بقبل اللون المائي وبيطلع عليه حلو
وفي جلد لميع ناعم .. هذا لازم تستخدمو معا الوان زيتية .. وانتو بتقدروا بعدين الي بتحبوا

وهي وجه الجلد وظهرو

47 تعليق 6,223 مشاهدة

شاركي في النقاش

سجلي الدخول لإضافة تعليق.

التعليقات

46
  1. @khndkgy

    صاحبة الموضوع
    ]والان بداية العمل .. بنعبي السايكوت جوا البزاز
    اكيد عرفتو شو هذا البزاز بما انو اغلب المتابعين اناث
    هذا عبارة عن علبة اكسجين شعر
    بفرغها وبنظفها وبعبيها سايكوت
    انا حكيت قبل هيك بخفف السايكوت بالماء
    ممكن اخففو درجات لكن لهاي الكتابة بس حطو مي 10% والسبب اني بدي تكون الكتابة بارزة كتير ولو خففناها ممكن يروح بروزها .. وبرضو لو ما خففتوها ابدا ما بتنزل من البزاز الا بجهد .. فانتبهوا لهذا الميزان في التخفيف





    ببدا بتسطير اللوحة برصاص خفيف عشات تكون الكتابة مستقيمة



    والآن نبدأ بتخطيط العنوان ولازم يكون العنوان كبير عشان يعطي جمالية الجلدة
    ولاحظوا مو شرط تكونوا خطاطين
    طبعا لو تعلمتوا الخط افضل لكن مو شرط
    ممكن تطبعوا كلمة عن الكمبيوتر وتحددوها بورق الكربونة على الجلة وبعدين تحددوها بالسايكوت




    نبدا بتحديد العنوان زي ما بتحددوا الجلتر على الزجاج بالضبط
    واليوم قرأت موضوع الاخت سمو الروح في طريقة تحديد الجلتر ومسكة البزاز .. ارجعوا للموضوع فنفس الطريقة هون
    لكن خضوا البزاز كويس لانو لما تعبوا بالاسرنج بكون في فقاعات عشان تروح عي الفقاعات .. وحاولوا اكتبوا باريحية حتى ما ترج اديكو لانو كلو ببين على الجلدة



    وهلا نبدا نكتب الآيات .. ولاحظوا مرة تانية هاي الجلدة معناها انو هاي آيات قديمة كتابتها .. عشان هيك مو شرط فيها جمال الخط .. وبرضو لاحظوا كتبت بخط بسمو اندلسي لانو القرآن زمان كان بالكتابة الاندلسية .. واحنا بدنا نبين الجلدة قديمة جدا

  2. @khndkgy

    صاحبة الموضوع
    بس قبل لنتابع اسمحولي أصلي المغرب وراجعلمو ان شاء الله تعالى

    :26:
  3. @khndkgy

    صاحبة الموضوع
    الله يتقبل من الجميع

    وهيك الجلدة انكتبت .. هلا بعد هاي الخطوة اقل اشي استنوا 8 ساعات ليجف السايكوت .. واذا بشمس الخليج الحارقة .. اتوقع ثلاث ساعات تخليها تتقحمش .. ههههههههههههه




    طيب شوفوا مثلا من خصائص السايكوت الحلوة كيف بيمسك بالجلد وكيف بيتثنا
    انا بدي اذا بدكو تدوروا على بديل يكون مثل هيك .. لانو هذه الخاصية في عليها شغل كتير


    وهلا بعد ما نشفت نبدا بتلوين الجلدة ..
    اهم اشي زي ما اتفقنا نطلع الجلدة قديمة
    انتبهوا ..
    طريقة سهلة جدا وبجوز تكون جديدة على الاغلب
    بنجيب اسفنجة وعلبة حطوا فيها ماء عشان نخلط فيها الالوان



    وبعدين بخلط فيها لون اصفر اكسيد ..احنا هيك بنسمي والبعض بسمي اصفر كموني والبعض بسمي اصفر صحراوي
    المهم اصفر في شوية بني محروق



    ونخلطوا كويس.. بس اهم اشي ما بدنا اللون يكون ثقيل ولا بالمرة خفيف .. يعني أخف من قوام اللبن واثقل من قوام عصير الفيمتو مثلا .. ههههههههههه

  4. @khndkgy

    صاحبة الموضوع
    هلا بلون اللون من فوق لتحت بس في المنتصف .. ولا تهتموا لانسجام اللون .. بدنا اياه يكون في مكان اكتر من مكان





    وبعد هيك نفس اللون الاصفر بما تبقى منو بغمقو بلون بني وبلون حولين اللون الاصفر لكن برضو مو بالاطراف





    ولاحظوا اني مستعجل بدي اخلص قبل ما تنشف الالوان مهم جدا

    وما تبقى من اللونين بغمقو بلون اسود وبعتق في الاطراف حولين اللونين

تابعي تجارب أخرى من هذا القسم.