من شهرين كان موعد تطعيم طفلتي و كانت تبلغ من العمر شهرين
المهم رحت فيها للمستوصف و سمعت ان ممكن ترتفع حرارتها عند التطعيم فا قلت خل ادخل على الطبيبه قبل لا اوديها مكان التطعيم علشان تكتبلي على ( ادول ) تحسبا لارتفاع الحراره لا سمح الله .. المهم رحت و خذيت ورقة بها رقم الدور .. و جلست مكان الانتظار و عندما ظهر رقمي على الشاشة دخلت الغرفة و اذا بالطبيبة جالسة و قلت لها اريد ادول لابنتي لأني ابي اطعمها الحين .. و قالتلي اوكي مو مشكلة .. اكتبت على الكمبيوتر الوصفة و قالت لي اخذي الرقم اللي معاج و عطيه الصيدلية يعطونج الدواء .. خرجت من عندها و رحت خذيت الدواء .. مكتوب عليه ( 5 مل عند اللزوم ) و رحت بعدها طعمتها .. قالتلي الممرضة لا تعطينها الرضعة قبل نصف ساعة و عطيها ادول نصف قطارة ! قتلها بس ما عطوني قطارة مع الأدول .. شنو اسوي ؟ قالتلي وريني ! و يوم وريتها قامت اتطق على راسها و تقولي شنوووووووووووو هذاااااااااااا حسبي الله و نعم الوكيل .. هذا الادول مو لعمرها بنتك اصغيره و هذا حق سنة و ما فوق .. و الادول للأطفال شكله غير و معاه قطارة و المفروض تاخذ 0.5 مل مو 5.0 مل ... يعني كنت راح اعطيها 10 اضعاف الكمية .. يعني باختصار انتحار ..
انا طبعا تخربطت و من الصدمة ما عرفت شنو اسوي !
والله و مسكينة راحت معاي حق الصيدلية اللي بالمستوصف و قالتلها على السالفة .. جان اتقول الصيدلانية .. و انا شنو ذنبي الدكتورة كاتبه هالوصفة .. يعني اطلعت الدكتورة غلطانة .. نست اتحط فاصلة قبل الخمسة علشان اتصير نص .. و اكتبت خمسة بدون فاصلة و جذي صارت خمسة كاملة ... و للأسف من كثر ما كنت مصدومة حتى ما رجعت للدكتورة و حاسبتها ...
بس ما اقول الا الحمدلله اللي الله سخر لي هذي الممرضة والا جان الحين الله يعلم شنو صار
... طبعا انا ما اقول لا تثقون فيهم نهائيا .. بالعكس اهم دارسين و اعرف منا بمجالهم .. لكن بالأخير اهم بشر و معرضين للخطأ !
و بالنهاية هذي قصتي للعبرة و اخذ الحذر
و يا ريت اللي عندها سالفة بهالخصوص تكتبها لنا علشان ناخذ العبر و ننتبه اكثر
الموضوع مغلق