تخانقت مع اختي الصغيرة ونفسيتي تعبت

السلام عليكم اخواتي

انا دحين في زيارة لجده من حوالي تلاتة اسابيع .

جلست عند اهلي اسبوعين ودحين جا زوجي واخدنا شقه عشان لسه فيه مناسبات حتحضرها هنا

معليش حبيت اكتب التفاصيل لاتنط لي وحدة تقول انيت كدابة انتي في الرياض زي ما حصل غيري!!:09:

المهم اني فترة الاسبوعين اللي قعدتها عند اهلي كنت كالعادة مبسوطة وعلاقتي مع الجميع طيبة ولله الحمد . عندي اخت عمرها 18 سنة متفتحة شويه ودايما انتقدها بس بهدوء واحس ان في نفسها مني حاجة رغم محبتها لاولادي .
لكن ماجاء في بالي ابدا انها شايلة عليه كتير.

الموقف اللي حصل انو كنت احكي مع اختي الوسطى وعلقنا على رسائل الشريط في احدى القنوات قامت الصغيرة قالت وانتم ايش لكم بالناس؟؟ قلت احنا ما نعرفهم بس نعلق على اسلوب بعض الستات والبنات في الرسائل .

شويه الا تجي بنت اختي التانية وهي صغيرة تبغى تشرب في كاسه كان اخوي شارب فيها قبل كده ..الا تقعد تصارخ في اختي ام البنت وتقول هادي الكاسه شرب فيها فلان ولو تغسليها بديتول ما تنظف ما تخلي بنتك تشرب منها !

قلت عيب عليكي هادا اخوكي وهادا مش اسلوب تتكلمي فيه عنو.( خاصة قدام بناتي وبنات اختي الوسطى).

قامت تقول هادا بيدخن ووسخ وماني عارفة ايش؟ قلت مهما كان ما تقولي هالكلام عنو . قالت انتي اصلا بتحبي تنكدي وانتي وانتي ..طبعا كنت ارد عليها بهدوء لكن لما شفتها تجاوزت حدها وما راعت وجود بناتي والاطفال والكبار حوالينا رديت عليها لحد ما سكتت.

بصراحة انا مسكت نفسي من التأثر هديك الساعة ومن حسن حظي انو زوجي جا من الرياض في نفس الليلة ورحنا شقتنا.

ما قدرت انام وبكره الصبح قعدت ابكي لحد ما ارتفع علي الضغط وتعبت .

اناما حكيت مع ماما ولا مع احد عن الموقف ولا حتى مع اختي اللي حضرت الموقف لكني من جوا مجروحة منها خاصة اني كنت اعزها بقووووووووة واحس حاجة انكسرت في نفسي منها .

ما ادري ليه كتبت الموضوع؟؟ يمكن لاني ابغى افضفض لحد وما لقيت .

ويمكن لاني كرهت بيت اهلي وماعاد دخلته من بعد الموقف وماعاد ابغى اشوفها من كل قلبي كرهت شوفتها بعد صدمتي فيها.

لان بصراحة كل اخواني واخواتي يحترموني وعمري ما احد رفع صوتوا عليه او تخانقت مع احد .

اهلي كل شويه يدقوا يقولوا تعالي وانا اعتذر كل يوم بعذر شكل بس مو قادرة اروح ابد ابد حاسة اني حبكي اول ما ادخل البيت .



33 تعليق 5,510 مشاهدة

شاركي في النقاش

سجلي الدخول لإضافة تعليق.

التعليقات

29
  1. امممم

    صراحه احس انك شديتي عليها

    هي قالت لك انه يدخن وبررت ليش قالت كذا

    يعني كان سكتي وخلاص
  2. @sanddi

    الموضوع ياأم الأئمة ابسط من أنة يصير مشكلة وتزعلي منة ويرفع ضغطك
    يمكن أختك زعلانة من شي ثاني وحطت حرتها فيك بدون ماتكون قاصده
    تصرفك سليم ودفاعك عن اخوك في محلة
    بس انت خذي موقف عشان ماتتكرر الحركه وتصير اختك تضبط نفسها شوي لما تكلم أي احد
    انت تو زوجك جاي خليك معة يومين بدون ماتكلمين اخواتك ولما تروحين لهم بيني انك شوية ماخذة موقف بدون ماتتكلمين في الموضوع وهي راح تحس او ان اختك الثانية بتلاحظ وتقلها
    غاليتي صديقيني مافي احد في الدنيا يستاهل انك تزعلين عشانه حتى لو كانوا عيالك ولما تخسرين صحتك مافي أحد يقدر يساعدك
    الموقف كان يضايق صح بس مو للدرجة هاذي حاولي ان مواضيع زي كذا ماتزعلك ابدا عشان صحتك
  3. @am_alaym_1

    صاحبة الموضوع
    الله يجزاكم خير اخواتي

    انا ما شديت عليها بالعكس هي اللي قلت ادبها وكنت ارد عليها بعقل وبرود لحد ما حسيتها تجاوت حدها وتغافلت عن شخصي وعمري .

    اختي ساندي الله يسعدك اكتر حاجة مضايقتني انها تغيرت معايا ومع غيري اشوف لسانها طولت حتى سمعتها مرة تقول لماما (اسكتي) تضايقت من كلمتها بس سكت.

    بصراحة انا ملاحظة انها صارت تقلد البنات اللي في المسلسلات الكويتية وتحاول تعمل يزهم خاصة في الجرأة وطوالة اللسان واحنا ما نحب كده
  4. مسكينه ما قالت الكلام هذا الا من حرصها ..
    وفعلا كلامها صحيح مو صحي شرب مويا من بعد اي احد مو عاد مدخن ..
    انتي شديتي مررره وما اشوفها تستاهل اللي سويتيه لها

    وشكلها تحب اولادكم ولا ام البنت ما تكلمت؟؟؟؟؟ تتكلم هي وتحرق دمها ليش ؟؟؟؟؟؟؟؟؟

تابعي تجارب أخرى من هذا القسم.