لرسال اللي خلتني استفيد من كل الكراتين
لكل بنات المنتدى الحلوات اللي استفدت منهم بصورة ماهي طبيعية وصرت اعرف اسوي اعمال فنية
اهدي لكم هذا العمل
الفكرة شفتها في قناة اقرأ برنامج مجلة المرأة بس ماكانوا شارحين بالتفصيل بس سريع عرضت الفكرة والشكل النهائي وانا طبقتها بعدين:)
الصندوق يطلع رائئئئئئئئئئئئئع وغير مكلف ابدا اغلى شيء هو الورنيش وممكن يستخدم في اكثر من كرتون
اولاً:
الادوات:
1/2 كوب دقيق
1/2 كوب ماء
فرشة
يخلط الدقيق مع الماء لصنع عجينة ممكن تزيدي الماء على كيفك بس ماتخلي الخليط يسبح
كرتون أحذية
اوراق جرائد ومجلات مقطعة قطع كبيرة
لوان أكرليك بني غامق سعره 5ريال
ورنيش سعره 15ريال ودبابيس اللي رأسها مدور بلون ذهبي او فضي سعرها ريالين
الطريقة:
استخدمي الفرشة وادهني جوانب الكرتون بطبقة من عجينة الدقيق والماء وعلى طول حطي الجريدة فوقها وارجعي حطي طبقة ثانية دقيق وماء وحطي ورقة جريدة وهكذا حتى تحصلي على اكثر من طبقة
كل مازدتي الطبقات زادت سماكة الكرتون
كل مازدتي الطبقات زادت سماكة الكرتون
تاكدي انك لبستي كل الكرتون بورق الجرائد من كل الجهات ومن جوى وبرى
اتركيه حتى ينشف تماما وراح ياخذ ساعتين او ثلاثة وممكن تخليه يوم كامل
راح يصير بهذا الشكل ويكون جاهز للتلوين
بعد كذا خذي برأس الفرشة مباشرة من علبة ألوان الاكرليك ولوني الكرتون خلي يدك سريعة لأن الون يجف بسرعة ولوني كل الكرتونة ماراح تحتاجي تعيدي اللون اكثر من مرة لانه راح يكون ثقيل ويغطي الجريدة من اول مرة
لوني كل الكرتون من برى ومن جوى قاعدت الكرتون لونتها بالوان مائية لانها ماراح تبان اصلا:)
خلي الكرتون شوي علشان تتاكدي تمام انه صار ناشف
رشي الكرتون بالورنيش
جيبي الدبابيس ودخليها في الكرتون على حسب الشكل اللي تبغيه انا سويتها على شكل خطوط
وهذا الشكل النهائي
من الخلف
من الامام
لاحظوا الكرتون راح يطلع جدا قاسي وغير كذا راح يكون شكله كانه صندوق قديم خاصة انه الجرائد راح تنكمش على بعضها وتعطي تأثير زي التشققات
الصندوق ماكلف 10ريال لان الوان الاكرليك ماخلصت لونت بها الصندوق كامل وباقي نصف علبة الالوان
يالله ايش رايكم شدوا همتكم وسووا اشكال حلوة
اعذورني لو كانت الصور ماهي واضحة
المشكلة ماعندي فكرة لهذا الصندوق ايش اسوي فيه:)
