السلام عليكم ورحمة الله و بركاته
انا كنت كاتبه موضوع قبل رمضان اني كذبت على أمي و هذا رابط الموضوع للي حابه تعرف شسالفه
http://forum.hawaaworld.com/showthread.php?t=1879201
المهم يا بنات اللي صار سبحان الله رحمه لأمي من رب العالمين
طبعا انا قلت لكم ان الوالده تعبت ووديناها المستشفى و قال الدكتور ان الوالده يلزمها راحه ولازم محد يزعلها و سووا لها دخول للمستشفى
طبعا الدكتور جا و قال ان امي جتها جلطه خفيفه بالمخ بس عدت على خير و صار عندها ضعف في الجزء الأيمن من جسمها يعني ايدها ورجلها اليمين تحركها بس بثقل
وقبل رمضان بيوم الا يرن تلفون البيت ولا ابوي يشيل التلفون و طلع منو المتصل؟؟؟؟؟؟؟؟؟
خالي اللي متصل يسلم يا سبحان الله صار له 5 سنوات ما سأل و الحين جاي يتصل؟؟ شنو اللي ذكره فينا؟؟
ما اقول غير سبحان مغير القلوب سبحان الله
طبعا سلم على ابوي و ابوي يرد عليه مستغرب بعدين سأل عن امي وينها قال له ابوي انها بالمستشفى
يقول ابوي امبين من صوته انه تخرع عليها
قال اشفيها اختي عسى ما شر
قال له ابوي جتها جلطه خفيفه و عدت على خير (وانا اقول بقلبي لو اني انا اللي راده عليه جان قلت له حاشتها الجلطة من اللي سويته فيها بس ما عليه ربنا كريم)
وسال اي مستشفى و هو متخرع
ابوي قال بمستشفى الفلاني يقول ابوي ما حبيت اعطيه العنوان كامل لأني خفت على امج لأني مادري شنهي نواياه يمكن يروح لها المستشفى و يغثها بالكلام كعادته
المفاجأه الثانيه اني كنت عند امي بالمستشفى و تونا مخلصين الفحوصات وقاعدين مرتاحين كان اول يوم رمضان ولا اشوف زول رجال داخل علينا
ولا هو خالي انا قعدت اطالعه متفاجأه ولا قدرت اتكلم بس واقفه و اطالع فيه و امي كانت منسدحه على سريرها تبي تنام ما انتبهت له
جان يقول السلام عليكم
اهني امي انتبهت من الصوت و تلتفت عليه و تشوفه وسكتت ماهي مستوعبه جان يقرب لها و يطيح على راسها و يبكي بكي كأنه جاهل و يحضن امي بصدره و يبكي و امي بس تبكي و تبكي و يمسح دموعها ويحب راسها مره
يا بنات منظرهم و هم بهالحاله يبكي الحجر الا انا ما بكيت بس اطالع امي خايفه عليها
و حسيت اني اكره خالي كره استغفر الله يا ربي
وعادت المياة لمجاريها قام يزوها و حتى لما طلعت من المستشفى جانا للبيت يسلم عليها و ما غير يحب راسها و يمسح عليه ووجهه اشوف فيه الندم و الحسره على امي
بنات امي خلاص سامحته وابوي سامحه لأنه بعد غلط في ابوي قبل
الا انا يا بنات عجزت اني اسامحه و الله ما اشتهي اشوف وجهه ولا اسلم عليه
اللي سواه بامي مو شويه
الحين امي صارت ما تقدر تمشي مثل اول ولا تحرك يدها مثل اول و تمشي على الويل جير ( العربانه)
ادري يا بنات هذا قضاء و قدر بس كل اللي صار لها من سبت اخوها
الحين يجي يزورنا البيت و الله ما اشتهي اسلم عليه من ادري انه عندنا اقعد بغرفتي ما اطلع له ماني قادره اسامحه على اللي سواه
طبعا شعوري هذا ما قلته لأحد ساكته و كاتمه بقلبي هذا الإحساس
ما اقدر اقول الله يسامحه ولاني قادره ادعي عليه و اتحسب عليه بس ودي اني ما اشوفه ابد ولا ابيه يذكرني
يااااا الله شنو انقرف اذا سمعته ينادي اسمي ودي اقول له اسكت مابي اسمع صوتك
بس والله انا متحمله عشان امي حبيبتي الله يخليها يا رب
بنات ادعوا لأمي ان ربي يشفيها و ترجع تمشي و تتحرك مثل اول
جزاكم الله خير
شاركي في النقاش
سجلي الدخول لإضافة تعليق.
التعليقات
32- ياختي ومن عفى واصلح فأجره على الله
استغفري وتسامحي مو علشانه علشان ترضين ربك انتي بشهر كريم
فيه ايه في القران بمعناها ان اللي يدخلون الجنه العافين عن الناس وانت الحمد لله بيدك تعفين
وتصير لك من الاعمال الصالحه اللي تتقربين لله فيها وتقولين يارب انا اعفيت عن خالي لرضاك يارب فاعفو عني
الله يشفي امميتك ويخليها لكم ويطول بعمرها ويعطيها الصحه والعافيه ويلين قلبك ويرزقك من حيث لاتدرين
دعواتي لك اختي بالتوفيق - الله يشفي امك ويعافيها وتكون اخر المصايب ان شاء الله بس تصرفك وعدم مسامحتك لخالك شي طبيعي من حبك لامك بس اكيد انتي البك طيب ومع الايام رج تسامحيه هادا بس اولها الواحد بكون زعلان ومدايق الله بعين وضلك اقرأي الرقية الشرعية على امك وان شاء الله بترجع متل اول
- انت اهم شي عندك امك ... الحمد لله على سلامتها وربي يطول بعمرها لكم
انتي كل قيام ليل اقرأي عليها سوره البقره بنيه ان البركه اللي بهالسورة تنزل على امك وعليك
واهم شي امك انها ارتاحت نفسيا عشان اشافت اخوها ... وايش ماصار بينهم يظل اخوها وتلاقيها فرحانه من داخلها انه رجع لها
والنفسيه لها دور كبييييييييير بالعلاج
وربي يطمنكم على الوالده - جزاكم الله خير يا بنات كلامكم بكاني
اشكركم
والله ماني قادره حتى اتكلم الحين بس بتابع ردودكم يا حبايبي انتوا - الله يشفي امج ويهديج
مواضيع مشابهة
تابعي تجارب أخرى من هذا القسم.