جزاااكم الله خير وتقبل الله منا ومنكم صالح الأعمال
يعلم الله ماسألت عن السعوديات الا ابغى اشعر مثل باقي الجنسيات اللي تبحث عن أهل ديرتها وأعرف أتكلم معهم
الثاني والشاهد الله من كثر ماتضايقت من أستغلال بعض الأجنبيات لك وشعورها أنك تملكين برميل بترول وكنز في جيبي
والله ياخوات أحب أجلس مع المساكين .... بس ماصرنا نفرق بين المسكين وغيره من كثرة اللي خربوا عليهم ويحبوا الشحاذة وبس ..
من يشوفوا ضلال أسود قفزوا عليك .. لو أفتح شنطتي أو أمي وأحد خواتي يفتحوا شنطه أو حتى كيس كل نظراتهم تاكلك وعيني عينك يقولوا أعطينا ويجلسوا يشغولك عن الذكر وهم يألفوا عليك قصص الله أعلم بها .....
وحده من جنسية عربيه جلست جنبي أعطتها أختي تمر ... أكلت وحده وخلت الباقي قالت لها كولي ... قالت لا عيالي الآن ماعندهم ولا خبزه كيف آكل .... ( وشكلها ياخوات مو شكل أم وأهلها بجوع وفقر ) المهم شوي وتحكي قصص حياتها وزوجها مريض بالسرطان ولا أحد يساعدها ... سكتنا شوي وتقول ... أنا شابة وفيه سعودي متزوج كل شوي يكلم على تلفونا ويقول كلام ....... ماأقدر أسمعه ...
( الحرمه بتوصل لنا انها شابه وفي غربه وبدون أقامه ويستغلها سعودي يراودها عن نفسها )
قلنا أقطعي الخط .. سوي أعملي أشتغلي عند بيوت أهلها معروفين ومن هالكلام .. كل مانجيب حل تجيب حالها أنها مسكينه ومعرضه للاستغلال من السعوديين مقابل تاخذ فلوس لأكل عيالها .... ماخلصنا الا راحت لسعودية ثانيه وجلست تسولف معها شوي وتعمل مساج لرجول السعوديه وتجلس عند رجولها كأنها مسكينه ومحتاجه وماطلعت الا وهي ماخذه صدقات والله أعلم بها ...
يوم ثاني وتجي ثانيه من دوله ثانيه .. ماتتكلم الا بالدين وقال الله وقال رسوله وانها أيضا مقيمه بدون أقامه وزوجها توفى وأولادها أيتام والله يابنات يصدقها أي أنسان .... المهم هاذي جلست أشوف وضعها وهي تكلم غيرنا .. بعيني أشوفها تصلي الإشراق جنبهم وعينها على شنطتهم تخيلوا ... شوي وهي بالصلاة وبدون شعور بعد الفاتحة سجدت بدون ماتركع .. وبين السجدتين يادوب ترفع وتسجد بثانيه وترفع وعينها يمين ويسار .... سلمت وكلمت اللي جنبها وشوي والثانيه تفتح شنطتها وتعطيها ....
أنا كنت أسمع كلامها أقول ماشاء الله على دينها .. لما شفت صلاتها وطريقتها في مراااقبه االناس والشنط خاصة وهي في الصلاة وتتلفت .. قلت الدنيا تحتاج لحذر مو كل الناس تثقي فيهم ...
أمي تعطي اللي يشتغلوا في المسجد الحرام من عاملات النظافه والسعوديات المراقبات مش هم أحق ومعروفات وعلى الأقل جوا لرزقعهم بعفاف بدون أستغلال وضحك للناس .. واشتغلوا رغم رواتبهم قليله أيش رأيكم بنات ؟؟
نصيتكم بنات فين ألقى محاضرات الداعيات في الحرم ؟وفين تجلسوا أنتم وربعكم ؟؟وووو
متابعة النقاش، صفحة 2