امهات الأطفال الخدج هنا التجمع حياكم معانا/ الجزء الخامس

الله يبارك في ايامك ياعسل
الله يسمع منك
و تطلع بنتك عن قريب من المستشفى سليمه معافيه من كل شر
اذا رحتي المستشفى حصنيها وادعي لها واستودعيها الله الذي لاتضيع ودائعه

حتى انا بنتى فى الحضانه وبتعانى من البلغم حتى فى اخر مره قالت الدكتوره ان البلغم احتمال يكون هو سبب قطعه النفس والله اعلم

شكل كل الاطفال الخدج يعانون من البلغم ...الله يعينهم
معقوله يكون سبب انقطاع التنفس..
الله يقر عين كل ام بولديدها.....آمنواااا

السلام عليكم ورحمة الله وبركاته
كل عام وانتم بخير وعيدكم مبارك

كنت حابه اتواصل معاكم كل يوم لكن الظروف منعتني هاليومين لان طفلي ساءت حالته وتوفى فجر السبت
لكني وعدتكم بقصتي وسبب ولاداتي المبكره
حملي الاول نعبت في الاسبوع 30 ورحت للمستشفى وكان عندي طلق والرحم مفتوح 2 سم فنوموني عندهم يراقبوني الساعه 12 بالليل ولما جاء الصباح وصحيت من النوم ماقدرت ارفع جسمي من السرير وكنت اتألم وطلبت الدكتوره وماجاتني الا الساعه 11 الظهر وطبعا لان هذا حملي الاول وانا صغيره مااهتمت فيني لان في بالها اني اتدلع وان هواء بارد دخل جسمي بس وراحت عني وماهمها شي وانا اقول لها عندي الم في كتفي مو قادره ارفع جسمي من السرير قالت لي حاولي وراحت وزاد الالم وجاني زوجي للزياره وشاف وضعي وجلس يصارخ عليهم وجات الاخصائيه بالصدفه وسمعت زوجي وكشفت علي لقت الرحم مفتوح 2 سم وماعندي نزيف وعملت اشعه وشافت الطفل وكل شي بنظرهم سليم وماعندي ولاده لكن شافت وجهي ابيض وبديت افقد وعيي وعملوا لي تحليل دم وكان نازل الى 4 فعرفت ان عندي نزيف داخل ودخلت العمليه الساعه 7 المساء ووجدوا الرحم منفجر والمشيمه منفصله والطفل توفى والمفروض انهم يستأصلون رحمي لكن الاستشاريه الله يجزيها الخير لما عرفت اني بكريه مارضت تشيله وهذي مخاطره لانها قالت بعطيها فرصة تحمل ولكن مع مراقبه والحمدلله طلعت والانفجار اللي داخل الرحم خيطته الدكنوره.
وبعد سنتين حملت وراجعت مع نفس الدكتوره وكنت داخله تجربه مو مضمونه وانا اول وحده تحمل بعد انفجار رحمها وطبعا بالاسبوع 20 تنومت بالمستشفى علشان لو جاني الم او اي مغص ادخل غرفة العمليات وينقذوني لان رحمي ضعيف مره واخذت ابره لتقوية الرئه عند الطفل لان الدكتوره قررت تعمل عمليتي بالاسبوع 30 وطبعا الطفل بيكون صغير لكن الحمد لله وصلت للاسبوع 32 وولدت فراس (طبعا انفجر رحمي بعد ماطعوه مني)
وحطوه بالعنايه للخدج 18 يوم وكان وزنه كيلو و 800 غرام كان صغير مره وكان موصل بأجهزه وابر بجسمه والحليب يعطوه بلي داخل فمه جلس بهالحضانه اسبوع ووزنه نزل وبعدها نقلوه بحضانه ثانيه وكانت مشكلته حنكه ضعيف ورضاعته قليله كان يشرب 15 مل ولما رجع وزنه مثل ماولدته رحت طلعته على مسؤليتي لان ماعنده الا مشكلة الرضاعه ويبغالها صبر لانه المفروض يشرب 35مل لكنه مايقدر واخذته معي وتعبت معاه سنه كامله لانه المفروض كل ساعه اعطيه حليب وكنت اعطيه حليب المستشفى لمدة سنه كامله و الحمد لله وزنه زاد وحتى الدكاتره يقولونها ان الطفل الخديج ينمو احسن من الطفل الطبيعي وكان ولدي دبدوب لحد ماوصل 4 سنين واللحين بدء ينحف فلا تخافوا من شكل اولادكم اللحين وشوفوهم بعد مايطلعوا من الحظانه 3 او 4 شهور والله كل شي يتغير حتى ملامحهم تتغير مع الوزن
وبعد سنتين حملت ببنت لكن مااستمر حملي 23 اسبوع وولدت وتوفت البنت بعد يومين وانفجر رحمي للمره الثالثه.
وبعدها بسنتين حملت وماكنت مقرره احمل لاني تعبت وفيه خطر على وشافتني دكتوره وانجنت ليه احمل وانا وضعي كذا لان حملي ماراح يكمل13اسبوع وفي خطر اني اتوفى وقت العمليه لكني استمريت بحملي وماهمني كلامها ورحت عند دكتوره صديقتي وتنومت بالمستشفى بالاسبوع 16 لاني تعرضت لحادث سياره وتعبت وكان المفروض ان عمليتي لما اكمل 28 اسبوع لكن جاني الم بالاسبوع 25 وولدت وانفجر رحمي والطفل عاش 7 ايام بس .
وهذي مشكلتي اولد اطفالي قبل وقتهم لان رحمي ينفجر ومافي احد عارف السبب حتى الدكاتره لكن الحمد لله والله يحفظ لي فراس ويطلع عيالكم بالسلامه وتشوفونهم قدامكم بصحه وعافيه واعذروني طولت عليكم