السلام عليكم و رحمة الله و بركاته
أولا شفاكِ الله و عافاكِ
ثانيًا اضطرابات الدورة شيء متوقع في هذا السن لأن فوق ال 45 سنة بتكون المرأة قربت من سن انقطاع الطمث و ده بيصاحبه تغيرات فسيولوجية و اضطرابات في الهرمونات بتأدي للاضطرابات في الدورة ما بين نزيف متقطع على مدار الشهر أو زيادة في كمية الدم أو زيادة في طول الدورة عن المعتاد و كل ده علاجه بسيط بإذن الله
المشكلة في الموضوع إن كتير بيرجعوا سبب النزيف ده لأي ورم ليفي في الرحم في حين لو دورنا في نفس الرحم ده قبل 10 سنين كنا هنلاقي نفس الورم الليفي موجود في نفس المكان و بنفس الحجم و ربما يكون بحجم أكبر مما هو عليه الآن
أقصد بكلامي إن الورم الليفي ده ورم حميد و بيكون موجود في نسبة تتعدى ال 90% من النساء بشكل عادي لدرجة إننا بنعتبره شيء طبيعي طالما لا يحدث منه مشاكل و نساء كتير بيكون عندها و لا تدري عنه شيء ولا تشتكي منه و بيظهر في الأشعة بالصدفة لأنه في معظم الأوقات لا يحدث مشاكل و ساعات كتير بيحصل نزيف لأي سبب تاني و يصادف في نفس الوقت اكتشاف الورم الليفي فبيلبس هو التهمة مع إنه لو كنا دورنا في نفس الرحم من زمان كنا لقيناه في نفس مكانه و بنفس حجمه و عادة كمان الورم الليفي حجمه بيقل بعد انقطاع الدورة أصلا.
و ورم بالحجم اللي بتقولي عليه ده 2 او 3 سم نادرا ما يحدث منه مشاكل اللهم إلا في نوع معين منه و هو إذا كان تحت بطانة الرحم مباشرة ده اللي ممكن يعمل شوية نزيف بسيط و علاج ورم بالحجم ده أبدًا لا يكون باستئصال الرحم ده إذا كان أصلا سبب النزيف فما بالك لو لم يكن سبب النزيف و ده اللي برجحه من وصف حجمه و من سنك.
لازم أولا يتم التأكد من سبب النزيف لأنه غالبا في سنك هيكون سببه هرموني زي ما وضحت لحضرتك قبل كده و علاجه دوائي إلا لو لا قدر الله النزيف شديد و غير مستجيب للعلاج الدوائي في هذه الحالة بيضطر الطبيب للاستئصال ربنا يعافيكِ و يعافينا بإذن الله.
أنا لو كان النزيف بسبب الورم فعلا فالورم ممكن يتشال من الرحم بدون استئصال.
خلاصة كلامي إنك تستشيري طبيبة نساء ذات علم و خبرة و أمانة و أضع تحت أمانة مليون خط و ملحوظة مهمة أيضًا مجرد الشهرة لا تعني الأمانة أقصد بالأمانة أي طبيبة أو طبيب مشهور عنه الأمانه عشان متضيعيش وقتك مابين الطبيبة الفلانية قالت كذا و الطبيبة الفلانية قالت كذا.
و ربنا يشفيكِ و يعافيكِ بإذن الله
الورم الليفي
متابعة النقاش، صفحة 4