انا متزوجه وحاليا انا في اخر ايام النفاس (الاربعين).
فاجأني زوجي بطلب غريب وهو انه قال لي:وش رايك تجلسين بعد النفاس عند اهلك زياده شهرين ثلاثه وحجته ان بيتنا باااااااااارد ويخاف على البيبي من البرد!
ويبيني اجلس عند اهلي لين يخف البرد!
يقول ان حط دفايات وشغل فريونات ومازال البيت بارد!
بصراحه مره تحطمت من طلبه،اخبر الازواج يشتاقون لزوجاتهم ويستنون الاربعين تخلص بفارغ الصبر وانا الله يخلف علي يبيني امدد!
علما بأنه لمح انه ممكن ياخذني خلال هالثلاث شهور بين فترة والثانيه لمدة ساعه كذا للبيت (بيتنا)وياخذ حاجته مني ويرجعني عقب لاهلي
تضايقت والله من هالمنطق حشى..وش كني!
حسيت ما يبيني لنفسي وذاتي..يبيني عشان يلبي رغباته وعقب مع السلامه!
وانا ما ودي بصراحة افرض نفسي عليه ودي يكون مشتاق لي وينتظر رجعتي ودي هو اللي يحرص على رجعتي ويلح عليها.
علما بان خلال فترة النفاس يمر علينا بين فتره والثانيه ماشاء الله لان بيتنا مره قريب عند بيت اهلي فيجي عشان يشوف عياله.
ودي انه يغيب فتره عشان يشتاق لي بس ما اقدر اقول له لاتجي واذا جاء لازم اكون موجوده..واهلي ينشبون لي..ابوكم جاء..روحي عنده..ياعيباه ما جلستي معه ومن هالقبيل.
والله انا مشتاقه له ولبيتي وزي ما انتم عارفين الواحد ماياخذ راحته الا في بيته بس ودي أرجع على كرامه ومعزه ما أبي أفرض نفسي عليه..تكفون ساعدوني.
علما باني انا في العشرينات وهو بالثلاثين ولنا 7 سنوات زواج ماشاء الله.