شاركي في النقاش

سجلي الدخول لإضافة تعليق.

التعليقات

168
  1. صاحبة الموضوع
    حبيبتى ام لوجينا العسولة كباب الحلة علشان خاطر عيونك(فكراكى شريهان)
    تقطعى بصل صغير كتير جوانح او دوائر كما تسمونها وتشوحيه فالسمنة وتضيفى فصين توم مدقوقين و بعدين البهارات والملح والفلفل و اللحمة وتسبيها تنزل ميتها و تشربها على نار هادية تستوى و تاكليها بالف هنا لو تحبى ضيفيلها فلفل وطماطم قبل ما تقفلى عليها

    اما بالنسبة للكونية فادى حاجة تانية خالص ومن الحاجات اللى عارفاكى مش هتحبيها
    الكمونية هى كرشة الخروف
    تقطعيها صغيرة اوى طبعا تنضفيها كويس يعنى تجرديها بالسكين لحد ما تبقى قشطة وبعدين تنضفيها بالمية والخل
    ولما تقطعيها حطيها فحلة على النار واسلقيها نص سليق
    وبعدين قطعى الكبدة والقلب والكلاوى والمصران اللى هو الممبار الواسع التخين قطعيهم فحجم الكرشة وضفيهم للكرشة وزوديهم مية و رجعيها على النار لحد ما تحسى انها خلاص هتستوى
    حطى طاسة فيها زيت على النار و قطعى نص كيلو بصل وشوحيه وبعدين حطى عليهم عصير طماطم والبهار والملح والفلفل والكمون وبعد ما تتسبك حطى الكرشة وكل اللى كان معاها فالتسبيكة وسيبها على نار هادية لحد ما تستوى خالص
    وبعدين خلاص قدميها مع مخلل علشان يعدل نفس اللى هيكلوا

    النهاردة كان الغدا جلاش مطبق وفراخ محمرة
    بكرة ايه؟؟
  2. zeireda ميرسي علي طريقة الشاورما انا كمان بعملها كدة بس كنت حابة اعرف لو في طريقة تانية مثلا ......

    كباب الحلة بيبقي يجينن مع رز ابيض ............

    و انا النهاردة هاعمل ملوخية ورز و فراخ مشوية في الفرن ........

    و انتم يا بنات ....
  3. حبيبتى peli
    مرسى على الكباب الحلة جدااااا
    لكن الكمونية ماما بتعملها كده شبه كباب الحلة خالص بس أنا مش بعرفها
    غالبا أنا كنت كتباها عندى بس مش بعملها هدور عليها وأقولك
    انهاردة ان شاء الله هعمل همبرجر بطريقة لذىذة أوى الشيف مرة جبها
    وعمل مكرونة بيضا والصوص جمبها واللحمة المفرومة فوق الوش

    وامبارح كان فاصوليا ورز ولحمة محمرة
  4. لكن يا جميل الجلاش المطبق ده يطلع ايه؟؟؟؟ :D
    تحسى التلفزيون والاكلات التانية كلت دماغى
    ومش بقيت أعرف أكلنا بيتعمل ازاى
  5. صاحبة الموضوع
    zeireda يا سكرة سلامة دماغك الشر بره وبعيد ماتفتكريش ان انا اللى فلحوسة انا كمان كل شوية اروح لماما اسألها دا ازاى واعمليلى دا وكدا

    ما تنسيش تقوليلى على الكمونية بتاعت مامتك
    والهمبرجر كمان

    اما بالنسبة للجلاش المطبق فبتجيبى الجلاش و تطعيه بالعرض الى 3 اجزاى يبقى عندك شرائح طويلة تلفيها زى ما بتلفى ورق الخس او المنديل و طبعا الحشو لحمة مفرومة لو حادق و مكسرات لو حلو
    والف هنا
    امبارح كنت فاسكندرية و التغدينا بره
    النهاردة لسه معرفش

تابعي تجارب أخرى من هذا القسم.